ନୂଆଦିଲ୍ଲୀ, ୦୯/୦୯: ଭାରତର ଅଧ୍ୟକ୍ଷତାରେ ଜି-୨୦ରେ ୨୧ ତମ ସଦସ୍ୟ ଭାବେ ସାମିଲ ହେଲା ଆଫ୍ରିକୀୟ ସଂଘ । ୨୦୨୩ ଜୁନ୍ ମାସରୁ ଆଫ୍ରିକୀୟ ସଂଘକୁ ଜି-୨୦ରେ ସାମିଲ କରିବାକୁ ଭାରତ ପ୍ରୟାସ ଆରମ୍ଭ କରିଥିଲା । ସଦସ୍ୟ ରାଷ୍ଟ୍ରଙ୍କ ପାଖରୁ ପ୍ରଥମେ ସହମତି ପାଇବା ପରେ ଆଫ୍ରିକୀୟ ସଂଘକୁ ଜି-୨୦ରେ ସାମିଲ କଲା ଭାରତ । ଆଜି ଦିଲ୍ଲୀର ଭାରତ ମଣ୍ଡପମରେ ଶିଖର ସମ୍ମିଳନୀ ଆରମ୍ଭରୁ ହିଁ ପିଏମ ନରେନ୍ଦ୍ର ମୋଦୀ ଆଫ୍ରିକୀୟ ସଂଘକୁ ଜି-୨୦ର ସ୍ଥାୟୀ ସଦସ୍ୟ ରୂପେ ଘୋଷଣା କରିଥିଲେ । ଏହା ସହ ଆଫ୍ରିକୀୟ ସଂଘର ମୁଖ୍ୟ ଅଜାଲୀ ଅସୌମାନୀଙ୍କୁ ସ୍ଥାୟୀ ସଦସ୍ୟ ଭାବେ ନିଜ ସିଟ୍ରେ ବସିବାକୁ ଆମନ୍ତ୍ରଣ କରିଥିଲେ ପିଏମ ମୋଦୀ । ସେପଟେ ଅଜାଲୀ ଅସୌମାନୀ ପିଏମ ମୋଦୀଙ୍କୁ ଏଥିପାଇଁ ଧନ୍ୟବାଦ ଜଣାଇଛନ୍ତି ।
ହେଲେ ଆଫ୍ରିକୀୟ ସଂଘକୁ ଜି-୨୦ରେ ସାମିଲ କରିବାକୁ ଭାରତ କଣ ସବୁ ପଦକ୍ଷେପ ଗ୍ରହଣ କରିଥିଲା ସେନେଇ ଚର୍ଚ୍ଚା ଲାଗିରହିଛି। ଚଳିତବର୍ଷ ଜୁନ୍ ମାସରେ ଅଧ୍ୟକ୍ଷ ଭାବେ ପିଏମ ମୋଦୀ ସମସ୍ତ ସଦସ୍ୟ ରାଷ୍ଟ୍ରଙ୍କୁ ପତ୍ର ଲେଖିଥିଲେ । ତେବେ ଏନେଇ ଜାନୁଆରୀ ମାସରେ ଚିନ୍ତା କରିଥିଲା ଭାରତ । ଭଏସ ଅଫ ଦି ଗ୍ଲୋବାଲ୍ ସାଉଥ୍ ଶିଖର ସମ୍ମିଳନୀ ପରେ ପରେ ଭାରତ ଏହି ଯୋଜନା କରିଥିବା କୁହାଯାଉଛି । ଏହି ଶିଖର ସମ୍ମିଳନୀରେ ୫୫ଟି ଆଫ୍ରିକୀୟ ଦେଶ ଯୋଗ ଦେଇଥିଲେ ।
ତାପରେ ଏହି ଚର୍ଚ୍ଚାକୁ ଭାରତ ଇଥିଓପିଆରେ ଆଗକୁ ବଢ଼ାଇଥିଲା । ତେବେ ଏବେ ଯାଏ ଦକ୍ଷିଣ ଆଫ୍ରିକା ହିଁ ଜି-୨୦ରେ ଏକମାତ୍ର ଆଫ୍ରିକୀୟ ଦେଶ ଭାବେ ସଦସ୍ୟ ଥିଲା । ଭାରତର ପ୍ରସ୍ତାବରେ ପ୍ରଥମେ ଆମେରିକା ଏବଂ ଫ୍ରାନ୍ସ ସମ୍ମତି ଜଣାଇଥିଲେ । ଜି-୨୦ର ସଦସ୍ୟ ଭାବେ ରୁଷ ଏବଂ ଚୀନ୍ ଠାରୁ ସମର୍ଥନ ମାଗିଥିଲା ଭାରତ । ଏହା ଉପରେ ରୁଷ ନିରପେକ୍ଷ ଆଭିମୁଖ୍ୟ ଆପଣାଇବା ସହ ଭାରତର ପ୍ରସ୍ତାବରେ ରାଜି ହୋଇଥିଲା । କିନ୍ତୁ ଚୀନ୍ କୌଣସି ପ୍ରତିକ୍ରିୟା ଦେଇନଥିଲା ।
ଚୀନ ନିରବ ରହିବା ପଛର କାରଣ ଥିଲା ଯେ, ହୁଏତ ଭାରତ ବ୍ରିକ୍ସର ବିସ୍ତାର ପାଇଁ ଚୀନ୍ର ଯୋଜନାକୁ ପଣ୍ଡ କରିପାରେ । କିନ୍ତୁ ଭାରତ ବ୍ରିକ୍ସରେ ନୂଆ ରାଷ୍ଟ୍ରଙ୍କ ସାମିଲ ପାଇଁ ମସର୍ଥନ ଜଣାଇଥିଲା । ଏହାର କିଛି ଦିନ ପରେ ଚୀନର ବୈଦେଶିକ ମନ୍ତ୍ରାଳୟ ଜି-୨୦ର ବିସ୍ତାର ପାଇଁ ନିଜର ସମର୍ଥନ ଜଣାଇଥିଲା । ଆଉ ଏବେ ଜି-୨୦ର ସ୍ଥାୟୀ ସଦସ୍ୟ ହୋଇଛି ଆଫ୍ରିକୀୟ ସଂଘ ।
You can also read: ହିନ୍ଦୁ ହୋଇଥିବାରୁ ନିଜକୁ ଗର୍ବିତ ଅନୁଭବ କରନ୍ତି,ଦିଲ୍ଲୀ ଅକ୍ଷରଧାମ ମନ୍ଦିର ଯିବେ ଋଷି ସୁନକ
