ନୂଆଦିଲ୍ଲୀ,୧୨/୦୨: ଘରୋଇ ଭାରତ ବିପକ୍ଷ ପ୍ରଥମ ଟେଷ୍ଟରେ ଆହତ ହୋଇଥିବା ଇଂଲଣ୍ଡର ପ୍ରମୁଖ ସ୍ପିନର ଜ୍ୟାକ୍‌ ଲିଚ୍‌ ଶେଷ ୩ଟି ମ୍ୟାଚ୍‌ରୁ ବାଦ୍‌ ପଡ଼ିଛନ୍ତି । ତାଙ୍କ ସ୍ଥାନରେ କୌଣସି ବଦଳ ଖେଳାଳି ସାମିଲ୍‌ କରାଯିବନି ବୋଲି ରବିବାର ଇଂଲଣ୍ଡ ଆଣ୍ଡ୍‌ ୱେଲ୍ସ କ୍ରିକେଟ୍‌ ବୋର୍ଡ଼ (ଇସିବି) ସ୍ପଷ୍ଟ କରିଛି ।  ପ୍ରଥମ ଟେଷ୍ଟର ପ୍ରଥମ ଦିବସରେ  ଫିଲ୍ଡିଂ କରୁଥିବାବେଳେ ଲିଚ୍‌ଙ୍କ ବାମ ଆଣ୍ଠୁରେ ଆଘାତ ଲାଗିଥିଲା । ଫଳରେ  ସେ ବୋଲିଂରୁ ଦୂରେଇ ରହିଥିଲେ ଏବଂ ଦ୍ୱିତୀୟ ଟେଷ୍ଟ ଖେଳିନଥିଲେ । 

ଇଂଲଣ୍ଡ ଦଳ ଦ୍ୱିତୀୟ ଟେଷ୍ଟ ଶେଷ ହେବା ପରେ ଆବୁଧାବି ଯାତ୍ରା କରିଥିଲା । ସେଠାରେ ଦଳ ତୃତୀୟ ମ୍ୟାଚ୍‌ ପାଇଁ ପ୍ରସ୍ତୁତି ଜାରି ରଖିଛି । ଦଳ ସହ ଯାତ୍ରା କରିଥିବା ଲିଚ୍‌ ଆବୁଧାବିରୁ  ସିଧାସଳଖ ସ୍ୱଦେଶ ଫେରିବେ ବୋଲି  ଇସିବି ପକ୍ଷରୁ କୁହାଯାଇଛି । ଇଂଲଣ୍ଡ  ଦଳ ସୋମବାର ରାଜକୋଟରେ  ପହଞ୍ଚିବ ଏବଂ ମଙ୍ଗଳବାର ନିରଞ୍ଜନ  ଶାହ ଷ୍ଟାଡିୟମରେ ଅଭ୍ୟାସ କରିବାର  କାର୍ଯ୍ୟକ୍ରମ ରହିଛି । ଲିଚ୍‌ଙ୍କ ଓହରିଯିବା  ଫଳରେ ଏବେ ଅନଭିଜ୍ଞ ରେହାନ  ଅହମ୍ମଦ, ଟମ୍‌ ହାର୍ଟଲି ଓ ସୋଏବ  ବସିର ସ୍ପିନ ବିଭାଗ ସମ୍ଭାଳିବେ । ଅଭିଜ୍ଞ  ବ୍ୟାଟର ଜୋ ରୁଟ ଚତୁର୍ଥ ସ୍ପିନର  ଦାୟିତ୍ୱ ତୁଲାଇବେ ।