ପ୍ରମୂଖ ଖବର
  • ଚତୁର୍ଥ ଟି-ଟ୍ୱେଣ୍ଟ; ଜିମ୍ବାଓ୍ବେକୁ ୧୦ ୱିକେଟ୍‌ରେ ହରାଇ ସିରିଜ କବଜା କଲା ଟିମ୍ ଇଣ୍ଡିଆ, ଆଜି ପଞ୍ଚମ ମୁକାବିଲା
  • ||
  • ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଗୁଳିମାଡ଼, ସୁରକ୍ଷାକର୍ମୀଙ୍କ ଗୁଳିମାଡ଼ରେ ସନ୍ଦିଗ୍ଧ ସୁଟର ମୃତ
  • ||
  • ପାଞ୍ଚ ଦଶନ୍ଧିର ଘଟିବ ଅନ୍ତ, ଆଜି ଖୋଲିବ ଶ୍ରୀମନ୍ଦିର ରତ୍ନଭଣ୍ଡାର, ଦିନ ୧ଟା ପରେ ଶୁଭ ମୁହୂର୍ତ୍ତରେ ଫିଟିବ ତାଲା
  • ||
  • ରାଜ୍ୟରେ ଆସନ୍ତା ଦୁଇ ଦିନ ପ୍ରବଳ ବର୍ଷା ସମ୍ଭାବନା, ୧୮ରେ ଆଉ ଏକ ଘୂର୍ଣ୍ଣିବଳୟ
  • ||

ଆଠଗଡ଼ ବିଜେପିର ଦୁଇ ଶିବିର ଏକାଠ, ଗୋଟିଏ ମଞ୍ଚରେ ନଜର ଆସିଲେ ବ୍ରଜେନ୍ଦ୍ର-ଅଭୟ

ଆଠଗଡ଼,୧୬/୧୦ ଆଠଗଡ଼  ବିଜେପି ଶିବିରରେ ଗୋଷ୍ଠୀ ବିବାଦ ଦୀର୍ଘ ଦିନ ଲାଗି ରହିଛି । ବିଶେଷ କରି ପୂର୍ବତନ ବିଧାୟକ ପ୍ରାର୍ଥୀ ବ୍ରଜେନ୍ଦ୍ର ରାଏ  ଓ ଯୁବନେତା ଅଭୟ ବାରିକଙ୍କ ଶିବିର  ମଧ୍ୟରେ ଆରୋପ, ଆକ୍ଷେପକୁ ନେଇ ଅତୀତରେ ରାଜନୈତିକ ହଟଚମଟ  ସୃଷ୍ଟି ହୋଇଥିଲା । କିନ୍ତୁ ବୁଧବାର ଦୀର୍ଘଦିନ ପରେ ଦୁଇ ନେତା ଦଳୀୟ ସ୍ୱାର୍ଥରେ  ଏକାଠି ହୋଇଥିବା ଦେଖିବାକୁ ମିଳିଛି ।  ଆଠଗଡ଼ରେ ଶାସକ ଦଳ ବିରୋଧରେ  ସଭାରେ ଗୋଟିଏ ଜାଗାରେ ବସି  ଦୁହେଁ ବିକ୍ଷୋଭ ପ୍ରଦର୍ଶନ କରିଛନ୍ତି ।  ରାଜ୍ୟ ବିଜେପି ଉପସଭାପତି ଗୋଲକ  ମହାପାତ୍ରଙ୍କ ଉପସ୍ଥିତିରେ ଆଜି  ଆଠଗଡ଼ରେ ହୋଇଥିବା ଜନଆକ୍ରୋଶ  ଆନ୍ଦୋଳନରେ ଦୁଇ ଶିବିର ନେତା  ଏକାଠି ହେବା ଚର୍ଚ୍ଚା ସୃଷ୍ଟି କରିଛି । 

ଗତ କିଛି ଦିନ ଧରି ଆଠଗଡ଼ରେ  ରାଜନୈତିକ ପାଣିପାଗରେ ଉଷ୍ମତା  ଭରିଛି । ପ୍ରଥମେ ବିଜେବି କଲେଜ  ଛାତ୍ରୀ ରୁଚିକାଙ୍କ ସନ୍ଦେହଜନକ  ମୃତ୍ୟୁ ଘଟଣା ଏବଂ ପରେ ଆବାସ  କେଳେଙ୍କାରୀକୁ ନେଇ ବିରୋଧୀ ମୁଦ୍ଦା  କରିଛନ୍ତି । ସେହିପରି ମନରେଗା ଠାରୁ  ଆରମ୍ଭ କରି ଭତ୍ତା ପର୍ଯ୍ୟନ୍ତ ସବୁଠି  ପିସି କାରବାର ଚାଲିଥିବା ଅଭିଯୋଗ  ହୋଇଛି । ଆଠଗଡ଼ ବ୍ଲକ୍‌ କାର୍ଯ୍ୟାଳୟ  ଏହି ସବୁ କାରବାରର ମୁଖ୍ୟ  କେନ୍ଦ୍ର ପାଲଟିଛି । ବିଜେଡି ସରକାର  ବିଫଳତାକୁ ଲୋକଲୋଚନକୁ  ଆଣିବା ପାଇଁ ବିଜେପି ପକ୍ଷରୁ  ହେଉଥିବା ଜନଆକ୍ରୋଶ ଆନ୍ଦୋଳନ  ଆଜି ଆଠଗଡ଼ ବ୍ଲକ୍‌ ସମ୍ମୁଖରେ  କରାଯାଇଥିଲା । 

ବିଜେପି ନେତା  ଅଭୟ ବାରିକଙ୍କ ନେତୃତ୍ୱରେ ଏକ  ଶୋଭାଯାତ୍ରା ଆଠଗଡ଼ ଜଗନ୍ନାଥ  ମନ୍ଦିରଠାରୁ ବାହାରି ସହର ପରିକ୍ରମା  କରିବା ପରେ ବ୍ଲକ୍‌ କାର୍ଯ୍ୟାଳୟ ଆଗରେ  ବିକ୍ଷୋଭ ପ୍ରଦର୍ଶନ କରିଥିଲେ ।  ଏଥିରେ ରାଜ୍ୟ ସରକାରଙ୍କ ଉପରେ  ବର୍ଷିଥିଲେ ଛାମୁଆ ନେତା । ବିଶେଷ କରି ବିଧାୟକ ତଥା ମନ୍ତ୍ରୀ ରଣେନ୍ଦ୍ର  ପ୍ରତାପ ସ୍ୱାଇଁ ଦୀର୍ଘ ବର୍ଷ ଧରି ଆଠଗଡ଼  ଶାସନ ଦାୟିତ୍ୱରେ ରହିଥିବା କାରଣରୁ  ଦୁର୍ନୀତି ଏବଂ ଭ୍ରଷ୍ଟାଚାର ବଢ଼ିଥିବା  ବିଜେପି ରାଜ୍ୟ ଉପସଭାପତି ଗୋଲକ  ମହାପାତ୍ର କହିଥିଲେ । ଏମାନଙ୍କୁ  ଶାସନ ଗାଦିରୁ ହଟାଇ ଆଠଗଡ଼ବାସୀ  ବିଜେପିକୁ ବିଶ୍ୱାସକୁ ନିଅନ୍ତୁ ବୋଲି  ସେ ଆଠଗଡ଼ବାସୀଙ୍କୁ ଆହ୍ୱାନ  ଦେଇଥିଲେ । 

ଏହି କାର୍ଯ୍ୟକ୍ରମରେ କଟକ  ଜିଲ୍ଲା ବିଜେପି ସାଧାରଣ ସମ୍ପାଦକ  ରାମନାରାୟଣ ମହାନ୍ତି, ମହିଳା ମୋର୍ଚ୍ଚା  ଉପସଭାପତି ଇଲା ପଣ୍ଡା, କଟକ ଲୋକସଭା ମଣ୍ଡଳୀ ସଂଯୋଜକ ସୁକାନ୍ତ  ବିଶ୍ୱାଳ, ବ୍ରଜେନ୍ଦ୍ର ରାଏ ପ୍ରମୁଖ ବକ୍ତବ୍ୟ  ରଖିଥିଲେ । ତେବେ ଗୋଟିଏ ମଞ୍ଚରେ  ବ୍ରଜେନ୍ଦ୍ର ଓ ଅଭୟଙ୍କ ବିଜେଡିକୁ  ମିଳିତ ଆକ୍ରମଣ ରାଜନୈତିକ  ଚର୍ଚ୍ଚା ସୃଷ୍ଟି କରିଛି । ଏହାପୂର୍ବରୁ  ଉଭୟଙ୍କୁ କୌଣସି ଗୋଟିଏ ମଞ୍ଚରେ  ଦେଖିବାକୁ ମିଳିନଥିଲା । ଏମିତିକି  ନିକଟରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର  ପ୍ରଧାନଙ୍କ କାର୍ଯ୍ୟକ୍ରମରେ ମଧ୍ୟ ବ୍ରଜେନ୍ଦ୍ର  ରାଏଙ୍କୁ ଦେଖିବାକୁ ମିଳିନଥିଲା ।  ଯଦିଓ ସେ ମହାଳୟା ଶ୍ରାଦ୍ଧ ଅର୍ପଣ  କରିବାକୁ ପୁରୀ ଯାଇଥିବା ନେଇ  ଫେସ୍‌ବୁକ୍‌ରେ ପୋଷ୍ଟ କରିଥିଲେ ।  ପରେ ଏହାକୁ ନେଇ ଅନେକ ରାଜନୈତିକ ଆଲୋଚନା ଜାରି  ରହିଥିବା ବେଳେ  ଉଭୟ ବ୍ରଜେନ୍ଦ୍ର  ଓ ଅଭୟ ଗୋଟିଏ ମଞ୍ଚରେ ଏକାଠି  ହେବା ଆଠଗଡ଼ ବିଜେପି ଶିବିର  ସଂଗଠିତ ଥିବାର ସୂଚନା ଦେଉଛି ।  କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ  ନୂତନ ରାଉତ, ତପନ ଲେଙ୍କା,  ସରୋଜ ଦାସ, ନଚିକେତା ପରମାଣିକ  ପ୍ରମୁଖ ସହଯୋଗ କରିଥିଲେ ।

News7 Is Now On WhatsApp Join And Get Latest News Updates Delivered To You Via WhatsApp

Rath Yatra

Copyright © 2024 - Summa Real Media Private Limited. All Rights Reserved.