ନୀଳଗିରି, ୮/୯: ଗଣେଶ ମେଢ଼ ବିସର୍ଜନ ବେଳେ ଅଘଟଣ । ବାଲେଶ୍ୱର ଜିଲ୍ଲା ରେମୁଣା ବ୍ଲକ ଖନ୍ତାପଡ଼ା ଥାନା କୁଳିଗାଁରେ ଗଣେଶ ମେଢ଼ ଭସାଣି ବେଳେ ଏଭଳି ଅଘଟଣ ଦେଖିବାକୁ ମିଳିଛି । ଦୁର୍ଘଟଣାରେ ବଡ଼ ଭାଇର ମୃତ୍ୟୁ ହୋଇଥିବା ବେଳେ ସାନ ଭାଇ ଗୁରୁତର ଅବସ୍ଥାରେ ଜୀବନ ମରଣ ସହିତ ସଂଗ୍ରାମ କରୁଛି । ଶନିବାର ଗାଁରେ ବହୁ ଆଡମ୍ୱରରେ ଗଣେଶଙ୍କ ପୂଜାର୍ଚ୍ଚନା ଚାଲିଥିବା ବେଳେ ରବିବାର ଗାଁରେ ଗଣେଶଙ୍କୁ ବିସର୍ଜନ କରାଯାଇଥିଲା । ପିଲାମାନେ ଭସାଣି ପାଇଁ ଗଣେଶଙ୍କୁ ଗାଁ ପୋଖରୀକୁ ନେଇଥିଲେ । ଠାକୁରଙ୍କୁ ପାଣିରେ ବିସର୍ଜନ କରିବାକୁ ଯାଇଥିବା ବେଳେ ଦୁଇ ଭାଇ ପୋଖରୀରେ ବୁଡ଼ିଯାଇଥିଲେ । 

ସ୍ଥାନୀୟ ଲୋକେ ପୋଖରୀରୁ ଉଦ୍ଧାର କରି ଉଭୟଙ୍କୁ ଖନ୍ତାପଡ଼ା ମେଡିକାଲରେ ଭର୍ତ୍ତି କରିଥିଲେ । କିନ୍ତୁ ସେଠାରେ ଡାକ୍ତର ବଡ଼ ଭାଇକୁ ମୃତ ଘୋଷଣା କରିଥିଲେ । ତେବେ ମୃତକ ଜଣକ ହେଉଛନ୍ତି ଅରୁଣ ରାଉତଙ୍କ ବଡ଼ ପୁଅ ପ୍ରତ୍ୟୁଷ ରଞ୍ଜନ ରାଉତ l ପ୍ରତ୍ୟୁଷ ଷଷ୍ଠ ଶ୍ରେଣୀରେ ପାଠ ପଢ଼ୁଥିଲେ । ସାନ ଭାଇ ସତ୍ୟଜିତ ରାଉତ ଗୁରୁତର ଅବସ୍ଥାରେ ଥିବା ବେଳେ ତାଙ୍କୁ କଟକ ସ୍ଥାନାନ୍ତର କରାଯାଇଛି । ଏଭଳି ଅଘଟଣ ପରେ ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହୋଇଛି ।