ମୁମ୍ବାଇ, ୨୨/୩ : ଭୋଜପୁରୀ ଏବଂ ହିନ୍ଦୀ ଫିଲ୍ମର ଜଣାଶୁଣା ଅଭିନେତା ରାକେଶ ପାଣ୍ଡେଙ୍କ ମୁମ୍ବାଇର ଜୁହୁ ସ୍ଥିତ ଆରୋଗ୍ୟ ନିଧି ହସ୍ପିଟାଲରେ ନିଧନ । ଆଇସିୟୁରେ ଭର୍ତ୍ତି ହୋଇଥିବା ୭୭ବର୍ଷୀୟ ରାକେଶ ପାଣ୍ଡେଙ୍କ ପରଲୋକ ହୋଇଛି । ହୃଦଘାତ ଯୋଗୁଁ ତାଙ୍କର ଦେହାନ୍ତ ହୋଇଥିବା ଜଣାପଡ଼ିଛି । ରାକେଶ ପାଣ୍ଡେଙ୍କ ଝିଅ ଜସମିତ ପାଣ୍ଡେ ଏହି ସୂଚନା ଦେଇଛନ୍ତି ।
ସେ କହିଛନ୍ତି କି, ଶୁକ୍ରବାର ରାତି ୩ଟା ସମୟରେ ତାଙ୍କ ବାପାଙ୍କ ମୁଣ୍ଡ ବିନ୍ଧିଥିଲା ଏବଂ ନିଜକୁ ଅସୁସ୍ଥ ମନେ କରୁଥିଲେ । ପରେ ପରିବାର ଲୋକେ ତାଙ୍କୁ ସଙ୍ଗେ ସଙ୍ଗେ ଆରୋଗ୍ୟ ନିଧି ହସ୍ପିଟାଲରେ ଭର୍ତ୍ତି କରିଥିଲେ । କିନ୍ତୁ ସକାଳେ ତାଙ୍କ ଦେହର ଅବସ୍ଥାରେ ସୁଧାର ଆସିନଥିଲା ଏବଂ ଶୁକ୍ରବାର ସକାଳ ୮ଟା୫୧ ମିନିଟରେ ସେ ନିଦ୍ରା ଅବସ୍ଥାରେ ଥିବା ସମୟରେ ତାଙ୍କର ଦେହାନ୍ତ ହୋଇଛି ।
ରାକେଶ ପାଣ୍ଡେ ହିନ୍ଦୀ ଏବଂ ଭୋଜପୁରୀ ଉଭୟ ଫିଲ୍ମରେ କାମ କରିଛନ୍ତି । ମାତ୍ର ତାଙ୍କୁ ହିନ୍ଦୀ ଫିଲ୍ମରୁ ଅଧିକ ସଫଳତା ଭୋଜପୁରୀ ଫିଲ୍ମରେ କାମ କରିବା ଲାଗି ମିଳିଛି । ରାକେଶ ପାଣ୍ଡେ ‘ସାରା ଆକାଶ’ ନାମକ ବଲିଉଡ଼ ଫିଲ୍ମରେ ନିଜର ଡେବ୍ୟୁ କରିଥିଲେ ଯାହା ପରେ ସେ କେତେକ ହିନ୍ଦୀ ଏବଂ ଭୋଜପୁରୀ ଫିଲ୍ମରେ କାମ କରି ନିଜର ଏକ ଭିନ୍ନ ପରିଚୟ ସୃଷ୍ଟି କରିପାରିଥିଲେ ।
