ନିଳଗିରି,୩/୧୦(ଆ.ପ୍ର): ନୀଳଗିରି ଗୋପିନାଥପୁର ଷ୍ଟେସନରୁ ବାଲେଶ୍ଵର ଯାଉଥିବା ଯାତ୍ରୀବାହୀ ମେମୁ ଟ୍ରେନ ଦୁର୍ଘଟଣାରେ ଜଣେ ଯୁବକଙ୍କ ଗୁରୁତର ହୋଇଥିଲେ। ଏହି ସମୟରେ ପାଇଲଟ ନିଜର ମାନବିକତା ଦେଖାଇ ଟ୍ରେନକୁ ଛିଡା କରାଇ ଗୁରୁତର ଯୁବକଙ୍କୁ ଉକ୍ତ ଟ୍ରେନରେ ନେଇ ବାଲେଶ୍ଵର ହସ୍ପିଟାଲ ଆମ୍ବୁଲାନ୍ସ ଯୋଗେ ମେଡିକାଲ ନେଇଥିଲେ। ସେତେବେଳକୁ ଯୁବକ ଜଣକର ପ୍ରାଣବାୟୁ ଉଡିଯାଇଥିଲା। ଯୁବକ ଜଣକ ହେଲେ ଷ୍ଟେସନ୍ ସାହିର ବାପିଲି ସିଂ।
ସୂଚନାଯୋଗ୍ୟ ଗୁରୁବାର ମଧ୍ୟାହ୍ନ ପ୍ରାୟ ୧ଟା୧୫ମିନିଟ୍ ସମୟରେ ନିଳଗିରି ଗୋପିନାଥପୁର ଷ୍ଟେସନ୍ରୁ ଯାତ୍ରୀବାହୀ ଟ୍ରେନଟି ବାଲେଶ୍ଵର ଅଭିମୁଖେ ଛାଡିଥିଲା। ରାଇ ଗାଁ ବାଙ୍କ ନିକଟରେ ନିଳଗିରି ଏନଏ ସି ୧୧ନମ୍ବର ୱାର୍ଡର ଷ୍ଟେସନ୍ ସାହି (ପଣ୍ଡା ଅଫିସ) ଗ୍ରାମର ବାଙ୍ଗୁରୁ ସିଂ ର ପୁଅ ବାପିଲି ସିଂ ରେଳ ଲାଇନରେ ଛିଡା ହୋଇଥିଲେ। ଡ୍ରାଇଭର ଦେଖି ଟ୍ରେନକୁ ଅଟକାଇବାକୁ ଚେଷ୍ଟା କରିଥିଲେ।ଶେଷ ମୁହୂର୍ତ୍ତରେ ଯୁବକଙ୍କ ସହିତ ଟ୍ରେନ ଧକ୍କା ହୋଇଥିଲା।ମୁଣ୍ଡରେ ଗଭୀର କ୍ଷତ ଲାଗିଥିବା ବେଳେ ତାଙ୍କୁ ସ୍ଥାନୀୟ କିଛି ଲୋକଙ୍କ ସହାୟତାରେ ପାଇଲଟ ଉକ୍ତ ଟ୍ରେନରେ ନେଇଯାଇଥିଲେ। ପୂର୍ବରୁ ବିଭାଗ ତରଫରୁ ସୁତେଇ ବଡ଼ଗାଁ ନିକଟରେ ଆମ୍ବୁଲାନ୍ସ ଯୋଗାଡ଼ କରିଥିବା ବେଳେ ତାଙ୍କୁ ସେଥିରେ ବାଲେଶ୍ଵର ମେଡ଼ିକାଲକୁ ନିଆଯାଇଥିଲା। ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏଭଳି ଦୁଃଖଦ ଘଟଣା ଅଞ୍ଚଳରେ ଶୋକର ଛାୟା ଖେଳିଯାଇଛି।
