ଖଲ୍ଲିକୋଟ,୧୪/୬ : ଖଲ୍ଲିକୋଟ ଥାନା ଅନ୍ତର୍ଗତ କେଶପୁର ନିକଟସ୍ଥ ପଣ୍ଡିତ ଗାଁ ଛକରେ ଗୁରୁବାର ରାତିରେ ସିରିଜ ଚୋରି ହୋଇଥିବା ଜଣାପଡ଼ିଛି । ୪ଟି ଦୋକାନର ତାଲା ଭାଙ୍ଗି ନଗଦ ୧୦ହଜାରରୁ ଊର୍ଦ୍ଧ୍ବ ଟଙ୍କା ସହ ଜିନିଷପତ୍ର ଲୁଟି ନେଇଛନ୍ତି ଦୁର୍ବୃତ୍ତ । ଦୋକାନୀମାନେ ରାତିରେ ଦୋକାନ ବନ୍ଦ କରି ଘରକୁ ଯାଇଥିବାବେଳେ ସକାଳୁ ଚୋରି କଥା ଜଣାପଡ଼ିଥିଲା । ପଣ୍ଡିତ ଗାଁ ଛକରେ ଥିବା ଏନ.ପ୍ରସନ୍ନ ଦୋରାଙ୍କ ଲକ୍ଷ୍ମୀ ନାରାୟଣ ଚୁଡ଼ି ମହଲ ଓ ଷ୍ଟେସନାରୀ ଦୋକାନର ତାଲା ଭାଙ୍ଗି ଭିତରେ ପଶିବା ସହ ଡ୍ର ଭାଙ୍ଗି ସେଥିରେ ଥିବା ପ୍ରାୟ ୩ହଜାର ଟଙ୍କା ନେଇ ଯାଇଛନ୍ତି । ଏଥିସହ ବଡି ସ୍ପ୍ରେ, ପାଉଡର ଏବଂ ଅନ୍ୟାନ୍ୟ ଜିନିଷପତ୍ର ମଧ୍ୟ ନେଇ ଯାଇଛନ୍ତି ।
ସିସିଟିଭି କ୍ୟାମେରା ଭାଙ୍ଗିବା ସହ ତାର ଛିଣ୍ଡାଇ ହାର୍ଡ ଡିସ୍କ ବାହାରେ ଫିଙ୍ଗି ଦେଇଛନ୍ତି । ଏହାସହ ଦରକାରୀ କାଗଜପତ୍ର ମଧ୍ୟ ଚିରି ଫୋପାଡ଼ି ଦେଇଥିବା ଥାନାରେ ଅଭିଯୋଗ ହୋଇଛି । ସେହିପରି ମା’ତାରିଣୀ ସେଲୁନର ତାଲା ଭାଙ୍ଗି ଡ୍ରରେ ଥିବା ପ୍ରାୟ ୩ହଜାର ଟଙ୍କା ନେଇ ଯାଇଥିବା ଅଭିଯୋଗ ହୋଇଛି। ଅନ୍ୟ ଏକ ସେଲୁନ ଓ ମା’ସନ୍ତୋଷୀ ଅଟୋ ଗ୍ୟାରେଜରୁ ମଧ୍ୟ ଲୁଟ ହୋଇଥିବା ଅଭିଯୋଗ ହୋଇଛି । ଜଣେ ବ୍ୟକ୍ତିଙ୍କ ଘର ବାରଣ୍ଡାରେ ରଖାଯାଇଥିବା ଗୋଟିଏ ନୂଆ ବାଇକକୁ ମଧ୍ୟ ଦୁର୍ବୃତ୍ତ ଚୋରି କରି ନେଇଥିବା ମଧ୍ୟ ଅଭିଯୋଗ ହୋଇଛି ।