ଦେବଗଡ଼, ୧୮/୦୬ : ଦେବଗଡ଼ ଜିଲ୍ଲା ରିଆମାଳ ଥାନା ଗୋହିରା ଡ୍ୟାମ୍ରୁ ଜଣେ ଯୁବକଙ୍କ ମୃତଦେହ ଉଦ୍ଧାର ହୋଇଛି। ଘଟଣାସ୍ଥଳରୁ ପୋଲିସ ମୃତଦେହ ଜବତ କରି ତଦନ୍ତ ପାଇଁ ପଠାଇଛି। ଡ୍ୟାମ୍ ଉପରୁ ମୃତ ଯୁବକଙ୍କ ବାଇକ୍ ଜବତ ହୋଇଛି। ଯୁବକ ଜଣଙ୍କ ହେଉଛନ୍ତି ଦୁଧିଆନାଳୀ ପଞ୍ଚାୟତ ବାଙ୍ଗଦର୍ହ ଗ୍ରାମର ବିଦ୍ୟାଧର ପ୍ରଧାନଙ୍କ ପୁଅ ବୁଦ୍ଧଦେବ ପ୍ରଧାନ (୨୬ ବର୍ଷ)।
ସୂଚନା ଅନୁସାରେ, ସୋମବାର ସନ୍ଧ୍ୟା ସମୟରେ ବୁଧଦେବ ନିଜ ହୋଣ୍ଡା ବାଇକ୍ ଯୋଗେ ଘରୁ ବାହାରି ଆସି ଆଉ ଫେରି ନଥିଲେ। ପରିବାର ଲୋକେ ଖୋଜାଖୋଜି କରି ପାଇ ନଥିଲେ। ଆଜି ସକାଳୁ ରିଆମାଳ ଥାନା କଂସର ଫାଣ୍ଡି ଗୋହିରା ଡ୍ୟାମ ନିକଟରେ ତାଙ୍କର ମୃତଦେହ ପଡିଥିବା ଜାଣି ପରିବାର ପହଞ୍ଚିଥିଲେ। ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇଛି। ଡ୍ୟାମ୍ ଉପରୁ ଯୁବକଙ୍କ ବାଇକ୍ ଜବତ ହୋଇଛି। ନିକଟରେ ସିଗାରେଟ୍, ଦିଆସିଲି, ପାଣି ବୋତଲ ଓ ମିକ୍ସଚର ପଡ଼ିଥିବା ଦେଖିବାକୁ ମିଳିଛି। ତେବେ ବୁଧଦେବ ୪ ମାସ ତଳେ ବିବାହ କରିଥିଲେ। କେଉଁ କାରଣ ପାଇଁ ତାଙ୍କର ମୃତ୍ୟୁ ହୋଇଛି ତାହା ଜଣାପଡ଼ି ନାହିଁ। ତଦନ୍ତ ପରେ ସ୍ପଷ୍ଟ ହେବ ବୋଲି ପୋଲିସ କହିଛି।