ପୁରୀ,୧୮/୦୬: ମଙ୍ଗଳବାର ରୁକ୍ମିଣୀ ହରଣ ଏକାଦଶୀ । ରୁକ୍ମିଣୀଙ୍କୁ ବିବାହ କରିବେ ଶ୍ରୀକୃଷ୍ଣ । ମା'ଲକ୍ଷ୍ମୀ ଠାକୁରାଣୀ ସାଜିବେ ଦେବୀ ରୁକ୍ମିଣୀ । ଶ୍ରୀମଦନମୋହନ ସାଜିବେ ଶ୍ରୀକୃଷ୍ଣ । ଶ୍ରୀମନ୍ଦିରରେ ବଡ଼ ଆନନ୍ଦଉଲ୍ଲାସରେ ଦେବଦେବୀଙ୍କ ବିବାହ ଅନୁଷ୍ଠିତ ହେବ । ତେବେ ଏହି ନୀତି ପାଇଁ ଦିନରେ ପ୍ରାୟ ୩ ଘଣ୍ଟା ମହାପ୍ରଭୁଙ୍କ ଦର୍ଶନ କଟକଣା ରହିବ ବୋଲି ସୂଚନା ରହିଛି ।
ଶିଶୁପାଳ ରୁକ୍ମିଣୀଙ୍କୁ ବିବାହ କରିବାକୁ ଚାହୁଁଥିବା ଜାଣି ବାଟରୁ ହରଣ କରିନେବାକୁ ଦେବୀ ଡ଼ଗର ହାତରେ ଶ୍ରୀକୃଷ୍ଣଙ୍କୁ ଚିଠି ଲେଖିଥିବେ । ପୂର୍ବ ଯୋଜନା ଅନୁଯାୟୀ ମା’ବିମଳାଙ୍କ ମନ୍ଦିରରେ ପୂଜା ସାରି ଫେରିବା ବାଟରେ ରୁକ୍ମିଣୀରୂପୀ ମା’ ଲକ୍ଷ୍ମୀ ଠାକୁରାଣୀଙ୍କୁ ଶ୍ରୀକୃଷ୍ଣରୂପୀ ଶ୍ରୀମଦନମୋହନ ହରଣ କରିବେ । ବାଟରେ ଶିଶୁପାଳ ପ୍ରତିରୋଧ କରି ଶ୍ରୀକୃଷ୍ଣଙ୍କ ଦ୍ୱାରା ପରାସ୍ତ ହୋଇ ବନ୍ଦୀ ହେବେ । ସେବକମାନେ ଦେବତାଙ୍କ ପକ୍ଷରୁ ଏହି ନୀତି ସମ୍ପାଦନ କରିବେ । ରାତିରେ ମହାପ୍ରଭୁଙ୍କ ସହିତ ରୁକ୍ମିଣୀଙ୍କ ବିବାହ ଉତ୍ସବ ସଂପନ୍ନ ହେବ । ଉତ୍ସବ ମୁଖର ହେବ ଶ୍ରୀମନ୍ଦିର । ସେବାୟତ ତଥା ବହୁ ବଦାନ୍ୟ ବ୍ୟକ୍ତିଙ୍କ ପକ୍ଷରୁ ଶ୍ରୀମନ୍ଦିରରେ ଭକ୍ତଙ୍କୁ ମହାପ୍ରସାଦ ଦିଆଯିବ । ଶ୍ରୀମନ୍ଦିରର ମହାପ୍ରସାଦ ବାହକ(ବୋଝିଆ)ମାନେ ଭକ୍ତମାନଙ୍କୁ ମହାପ୍ରସାଦ ପରଷି ଦେବେ ।