ନ୍ୟୁୟର୍କ: ଟି-୨୦ ବିଶ୍ବକପ୍ରେ ଭାରତ ଏବଂ ଆମେରିକା ମ୍ୟାଚ୍କୁ ନେଇ ଖେଳପ୍ରେମୀଙ୍କ ଗହଣରେ ଉତ୍ସାହ । ପ୍ରଥମ ଥର ଏହି ଦୁଇ ଟିମ୍ ମୁହାଁମୁହିଁ ହୋଇଛନ୍ତି । ନାସାଉ କାଉଣ୍ଟି ଅନ୍ତର୍ଜାତୀୟ ଷ୍ଟାଡିୟମରେ ହେଉଥିବା ଏହି ହାଇଭୋଲଟେଜ୍ ମ୍ୟାଚରେ ଆୟୋଜକ ଦଳ ୧୧୦ ରନ୍ ସଂଗ୍ରହ କରିଛି । ଏହା ସହ ଭ୍ରମଣକାରୀ ଭାରତୀୟ ଦଳକୁ ୧୧୧ ରନ୍ର ଟାର୍ଗେଟ ଦେଇଛି ଆମେରିକା । ଆମେରିକା ନିଜର ପୂର୍ବ ମ୍ୟାଚ୍କୁ ପାକିସ୍ତାନ ଭଳି ଅନୁଭବୀ ଟିମକୁ ପରାସ୍ତ କରିଥିଲା । ସେହିଭଳି ଆଜି ଭାରତକୁ ମାତ ଦେବାକୁ ଚେଷ୍ଟା ଜାରି ରଖିଛି ଆମେରିକା ।
ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଆମେରିକା ଟିମ୍ ନିର୍ଦ୍ଧାରିତ ଓଭରରେ ୮ ଓ୍ବିକେଟ ହରାଇ ୧୧୦ ରନ୍ କରିଛି । ଭାରତୀୟ ବୋଲରଙ୍କ ସାମ୍ନାରେ ଆମେରିକୀୟ ପ୍ଲେୟାର ଭଲ ପ୍ରଦର୍ଶନ କରିପାରି ନାହାନ୍ତି । ନୀତିଶ କୁମାର ସର୍ବାଧିକ ୨୭ ରନ୍ କରିଥିବା ବେଳେ ଷ୍ଟିଭେନ ଟେଲର ୨୪ ରନ୍ କରିଛନ୍ତି । ଏହା ବ୍ୟତୀତ ଆଣ୍ଡ୍ରିସ୍ ଗୋସ(୨), ଆରୋନ ଜୋନସ(୧୧), କୋରି ଆଣ୍ଡରସନ୍ (୧୪), ହରମିତ ସିଂହ (୧୦), ସାଡଲେ ଭାନ (୧୧*) ଏବଂ ଯଶଦୀପ ସିଂହ (୨)ଙ୍କ ବଳରେ ୨୦ ଓଭରରେ ୧୦୦ ରନ୍ ଅତିକ୍ରମ କରିପାରିଛି ଆମେରିକା ।
ସେପଟେ ଭାରତୀୟ ଟିମର ଅର୍ଶଦୀପ ସିଂହ ବିଶ୍ବ ରେକର୍ଡ କରିବା ସହ ସର୍ବାଧିକ ୪ ଓ୍ବିକେଟ ନେଇଛନ୍ତି । ହାର୍ଦ୍ଦିକ ପାଣ୍ଡ୍ୟା ୨ଟି ଓ୍ବିକେଟ ନେଇଥିବା ବେଳେ ଅକ୍ଷର ପଟେଲ ଗୋଟିଏ ଓ୍ବିକେଟ ଅକ୍ତିଆର କରଛନ୍ତି । ତେବେ ଆଜିର ମ୍ୟାଚ୍ ଜିତିଲେ ଭାରତ ସୁପର ୮ରେ ପ୍ରବେଶ କରିବ ।