ଭୁବନେଶ୍ୱର,୧୫/୦୬: ଚନ୍ଦ୍ରମା ପ୍ରଧାନ । କନ୍ଧମାଳ ଜିଲ୍ଲା ବେରଡାକିଆ ଗାଁର ଜଣେ କନ୍ଧ ମହିଳା । ଦୁଇ ବର୍ଷ ତଳେ ଚନ୍ଦ୍ରମାଙ୍କୁ କେହି ଜାଣି ନଥିବା ବେଳେ ଆଜି କିନ୍ତୁ ଷ୍ଟ୍ରବେରୀ ଚାଷୀ ଭାବେ ଜିଲ୍ଲାରେ ତାଙ୍କର ସ୍ୱତନ୍ତ୍ର ପରିଚିତି ଅଛି । କେବଳ ସେତିକି ନୁହେଁ ପେଟ ପାଟଣା ପାଇଁ ସଂଘର୍ଷ କରୁଥିବା ଚନ୍ଦ୍ରମା ଓ ତାଙ୍କ ପରିବାର ଆଜି ତାଙ୍କ ଭଳି ୯ ଟି ମହିଳାଙ୍କ ପରିବାରକୁ ସ୍ୱରୋଜଗାରର ରାସ୍ତା ଦେଖାଇ ପାରିଛନ୍ତି । ଯେଉଁମାନେ କି ଆଜି ଚନ୍ଦ୍ରମାଙ୍କ ସହ ମିଶି ଭଳି ଏକର ପିଛା ଷ୍ଟ୍ରବେରୀ ଚାଷରୁ ୧୫ ଲକ୍ଷ ଟଙ୍କା ଆୟ କରି ପାରୁଛନ୍ତି ।
ଅନ୍ନପୂର୍ଣ୍ଣା ନାମକ ମହିଳା ସ୍ୱୟଂ ସହାୟକ ଗୋଷ୍ଠୀର ସଦସ୍ୟ ହେଲେ ଏହି ମହିଳାମାନେ । ଯେଉଁମାନେ କି ଜୈବିକ ଉପାୟରେ ଖତ ସାର ଦେଇ ଷ୍ଟ୍ରବେରୀ ଚାଷ କରୁଛନ୍ତି । କେବଳ ଅନ୍ନପୂର୍ଣ୍ଣ ମହିଳା ସ୍ୱୟଂ ସହାୟକ ସଂଘର ମା’ମାନେ ନୁହଁନ୍ତି³ ପାଖ ବାରେପଙ୍ଗା ଗାଁର ମହିଳା ସ୍ୱୟଂ ସହାୟକ ଗୋଷ୍ଠୀ ଆଶୀର୍ବାଦର ମା’ ମାନେ ମଧ୍ୟ ଗତ ଦୁଇ ବର୍ଷ ହେବ ଷ୍ଟ୍ରବେରୀ ଚାଷରୁ ଭଲ ଦୁଇ ପଇସା ଲାଭ କରି ପାରୁଛନ୍ତି ।
ଦୁଇ ବର୍ଷ ତଳେ କନ୍ଧମାଳ ଜିଲ୍ଲାର ଏହି ଦୁଇ ନିପଟ ମଫସଲ ଗାଁର ମା’ ମାନେ ଷ୍ଟ୍ରବେରୀ ଭଳି ଏକ ନୂଆ ଚାଷ ବିଷୟରେ ମିଶନ ଶକ୍ତି ଦ୍ୱାରା ଜାଣିବାକୁ ପାଇଥିଲେ । ଏଥିପାଇଁ ସମାନଙ୍କୁ ସରକାରୀ ଅଧିକାରୀଙ୍କ ଦ୍ୱାରା ଓ ଅଭିଜ୍ଞ ବିଶେଷଜ୍ଞଙ୍କ ସହାୟତାରେ ତାଲିମ ଦିଆଯାଇଥିଲା ବୋଲି କହନ୍ତି ଚନ୍ଦ୍ରମା ।
ମିଶନ ଶକ୍ତି ଦ୍ୱାରା ରାଜ୍ୟର ଏକ ଲକ୍ଷ ଆଦିବାସୀ ମହିଳାଚାଷୀଙ୍କ ଆୟ ଦୁଇ ଗୁଣ କରିବାକୁ ସରକାର ଯୋଜନା କରିଥିବା ବେଳେ କନ୍ଧମାଳ ଜିଲ୍ଲା ଏହା ଅଧୀନରେ ଆସୁଛି । ପୁଣି ଷ୍ଟ୍ରବେରୀ ଚାଷ ରାଜ୍ୟ ସରକାରଙ୍କ ଓର୍ମାସ୍, ଉଦ୍ୟାନ କୃଷି ବିଭାଗ ଓ ଓଏଲ୍ଏମ୍ର ମିଳିତ ତତ୍ତ୍ୱାବଧାନରେ କରାଯାଉଛି । ଯେହେତୁ କନ୍ଧମାଳ ଜିଲ୍ଲାରେ କରାଯାଉଥିବା ଷ୍ଟ୍ରବେରୀ ଚାଷ ଜୈବିକ କୃଷି ପଦ୍ଧତିରେ କରାଯାଉଛି ତେଣୁ ଏହାର ବ୍ୟବସାୟ ଓର୍ମାସ ସାହାଯ୍ୟରେ କରାଯାଉଛି ।
ଏ ବାବଦରେ କନ୍ଧମାଳ ଜିଲ୍ଲା ଦାୟୀତ୍ୱରେ ଥିବା ଓଏଲ୍ଏମ୍ର ପ୍ରକଳ୍ପ ମ୍ୟାନେଜର ସନ୍ତୋଷ କୁମାର ରଥ କହିଛନ୍ତି³ ଗତ ଶୀତମାସରେ ମହିଳା ସ୍ୱୟଂ ସହାୟକ ଗୋଷ୍ଠୀମାନଙ୍କୁ ଯେଉଁ ଷ୍ଟ୍ରବେରୀ ଚାରା ଦିଆଯାଇଥିଲା ତାହା ମହାରାଷ୍ଟ୍ରର ମହାବଳେଶ୍ୱରର ଏକ ନର୍ସରୀରୁ ଅଣାଯାଇଥିଲା । ଏଥିପାଇଁ ପାଖାପାଖି ୨୨୦୦୦ ଚାରା ଆମେ ଆଣଇଥିଲୁ । ପ୍ରତି ଚାରା ପିଛା ୧୩ ଟଙ୍କା ଖର୍ଚ୍ଚ କରାଯାଇଥିଲା । ଏସବୁ ଏକ ଏକର ଜାଗାରେ ଲାଗିଥିଲା । ସେଥିରୁ ପ୍ରାୟତଃ ୨୦% ଚାରା ମରି ଯାଇଥିବା ବେଳେ ଏକ ଏକର ଜାଗାରେ ୧୯ ହଜାର ଚାରା ବଞ୍ଚିଥିଲା ଓ ଗୋଟେ ଗଛ ପିଛା ଚାଷୀଙ୍କୁ ୩୦୦ରୁ ୪୦୦ ଗ୍ରାମର ଷ୍ଟ୍ରବେରୀ ଅମଳ ମିଳିଥିଲା ।
ପାଖ ଅଶୁଲୁମାହା ଗାଁର ଆଶାସର ମହିଳା ସ୍ୱୟଂ ସହାୟକ ଗୋଷ୍ଠୀର ପ୍ରିସକିଲା ପ୍ରଧାନ କହନ୍ତି³ ଆମେ ୨୦୦ ଗ୍ରାମର ପ୍ୟାକେଟ୍ ହିସାବରେ ବିକ୍ରି କରୁଥିବା ବେଳେ କିଲୋ ପ୍ରତି ୫୦୦ ଟଙ୍କାରେ ବିକ୍ରି କରୁଛୁ । ଓର୍ମାସ୍ କିନ୍ତୁ ଆମଠାରୁ ଅଧିକ ସାମଗ୍ରୀ କିଣୁଛୁ ବୋଲି ୩୫୦ ଟଙ୍କା କିଲୋ ପ୍ରତି କିଣୁଛି । ଯାହାକୁ କି ଓର୍ମାସ୍ ରିଲାଏନ୍ସକୁ ୧୦% ଲାଭ ରଖି ବିକ୍ରି କରୁଛି । ପ୍ରତି ସପ୍ତାହରେ ରିଲାଏନ୍ସ ୧୦୦୦ କିଲୋ ଅର୍ଥାତ ୧୦ କୁଇଣ୍ଟାଲ ଷ୍ଟ୍ରବେରୀ କିଣୁଛି ।
ଅପରପକ୍ଷେ ପ୍ରତି ଗଛରୁ ୩୦୦ରୁ ୪୦୦ ଗ୍ରାମ୍ର ଷ୍ଟ୍ରବେରୀ ବାହାରୁଥିବା ବେଳେ ଏକର ପିଛା ୧୯ ହଜାର ଚାରାରୁ ୫୭୦୦ କିଲୋ ଷ୍ଟ୍ରବେରୀ ଅମଳ ହେଉଛି । ଯଦି ବି ସବୁଠାରୁ କମ୍ ଦାମ୍ ୩୫୦ ଟଙ୍କା କିଲୋ ହିସାବରେ ଓର୍ମାସ ଚାଷୀଙ୍କଠାରୁ ଷ୍ଟ୍ରବେରୀ କିଣେ ତେବେବି ଏକ ଏକର ଜମିରୁ ଜଣେ ଚାଷୀକୁ ୨୦ ଲକ୍ଷ ଟଙ୍କା ମିଳିବ ।
ଏ ବାବଦରେ ଚାଷୀ କୁସୁମୀ ପ୍ରଧାନ କହନ୍ତି³ ଚାରା ସହ ଏକ ଏକର ଚାଷ କରିବା ପାଇଁ ୫ ଲକ୍ଷ ଟଙ୍କା ଖର୍ଚ୍ଚ ହୋଇଥାଏ । ଯେଉଁଥିରେ ପାଖାପାଖି ୨.୮୬ ଲକ୍ଷ ଚାରା ବାବଦକୁ ଓ ବଳକା ଅର୍ଥ ଜୈବିକ ଖତ ବାବଦକୁ ଖର୍ଚ୍ଚ ହୋଇଥାଏ । ହେଲେ ସବୁଠାରୁ କମ୍ ଦାମ୍ରେ ବିକ୍ରି ପରେ ବି ଜଣେ ଚାଷୀକୁ ଏକର ପିଛା ୧୫ ଲକ୍ଷ ଟଙ୍କା ଲାଭ ହେଉଛି ।
କନ୍ଧମାଳ ଦାୟିତ୍ୱରେ ଥିବା ଓର୍ମାସର ଡେପୁଟି ଚିଫ୍ ଏକ୍ଜିକ୍ୟୁଟିଭ୍ ଅଫିସର ଦୁର୍ଗା ପ୍ରସାଦ ଭୂୟାଁ କହନ୍ତି³ ପ୍ରତିବର୍ଷ ଷ୍ଟ୍ରବେରୀ ସିଜିନ୍ (ଅକ୍ଟୋବରରୁ ଫେବୃୟାରୀ ଭିତରେ) ଆମେ ସବୁ ସପ୍ତାହରେ ୨ ଟନ୍ ଷ୍ଟ୍ରବେରୀ ରିଲାଏନ୍ସ ଓ ଫୁଲବାଣୀ ସ୍ଥିତ ଆଉଟ୍ଲେଟ୍ରେ ବିକ୍ରି କରିଥାଉ । ଆସନ୍ତା ଦିନରେ ଆମେ ବିଗ୍ ବାସ୍କେଟ୍ ଓ ମଦର ଡାଏରୀ ସହ ଅନୁବନ୍ଧିତ ହୋଇ ଏହାକୁ ଅନ୍ଲାଇନ୍ରେ ବିକ୍ରି କରିବାକୁ ଲକ୍ଷ୍ୟ ରଖିଛୁ।