ନୂଆଦିଲ୍ଲୀ: ଗୁରୁବାର ଇସ୍ରାଏଲ ସେନା ଗାଜା ଷ୍ଟ୍ରିପ ଉପରେ ପୁଣି ଥରେ ଆକ୍ରମଣ କରିଛି। ଏହି ଆକ୍ରମଣରେ ୮୫ ଜଣ ଲୋକଙ୍କର ମୃତ୍ୟୁ ଘଟିଛି। ମନ୍ତ୍ରଣାଳୟର ରେକର୍ଡ ମୁଖ୍ୟ ଜାହେର ଅଲ-ୱାହେଦି କହିଛନ୍ତି ଯେ ଅସ୍ତ୍ରବିରତି ଭଙ୍ଗ ହେବା ପରଠୁ ଗତ ମଙ୍ଗଳବାରଠୁ ଏଯାଏ ଇସ୍ରାଏଲ ସେନାର ଅକ୍ରମଣରେ ମୃତ୍ୟୁ ସଂଖ୍ୟା ୫୯୨ ରେ ପହଞ୍ଚିଛି।
ତେବେ ଏହି ନୂଆ ଆକ୍ରମଣ ବିଷୟରେ ଇସ୍ରାଏଲୀ ସେନା ପକ୍ଷରୁ କୌଣସି ବିବୃତି ଜାରି କରାଯାଇ ନାହିଁ। ଖବର ସରବରାହ ସଂସ୍ଥା ଆସୋସିଏଟେଡ୍ ପ୍ରେସ୍ ପ୍ରକାଶ କରିଥିବା ରିପୋର୍ଟ ଅନୁଯାୟୀ ହମାସ ମଧ୍ୟ ଏ ଆକ୍ରମଣର ପ୍ରତି ଆକ୍ରମଣରେ ଇସ୍ରାଏଲ ଉପରେ ତିନୋଟି ରକେଟ ମାଡ଼ କରିଛି। ଖବର ମୁତାବକ, ଗତ ମଙ୍ଗଳବାର ଦିନ ଗାଜାରେ ଇସ୍ରାଏଲ ଅତର୍କିତ ଭାବେ ଏୟାର ଷ୍ଟ୍ରାଇକ କରିଥିଲା। ଏହି ଅତର୍କିତ ଆକ୍ରମଣରେ ମୋଟ୍ ୪୦୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିବା ନେଇ ପାଲେଷ୍ଟାଇନର ସ୍ୱାସ୍ଥ୍ୟ ବିଭାଗ ଘୋଷଣା କରିଥିଲା।
ସୂଚନା ଅନୁଯାୟି, ବର୍ତ୍ତମାନ ଦକ୍ଷିଣ ଗାଜାରେ ଇସ୍ରାଏଲି ସେନା ବ୍ଲକେଜ ଆରମ୍ଭ କରିଦେଇଥିବା ଜଣାପଡିଛି। ଯାହାଫଳରେ ଗାଜାର ପ୍ରମୁଖ ସହର ଗୁଡିକୁ ଯାତାୟତ କରିବାରେ ବହୁ ଅସୁବିଧାର ସମ୍ମୁଖିନ ହେବାକୁ ପଡୁଛି। ଲୋକମାନଙ୍କୁ ମୁଖ୍ୟ ରାଜପଥ ଛାଡି ଅନ୍ୟପଥରେ ଯାତାୟତ କରିବାକୁ ବାଧ୍ୟ କରାଯାଉଛି। ତେବେ କେବଳ ସମୁଦ୍ର ଉପକୂଳବର୍ତ୍ତୀ ଅଞ୍ଚଳ ଦେଇ ଯାତାୟତ କରିବାକୁ ଅନୁମତି ରହିଥିବା ନେଇ ଜଣାପଡିଛି। ଏହାସହ ଇସ୍ରାଏଲୀ ସେନା ମଧ୍ୟ ଉତ୍ତର ଗାଜାରେ ପୂର୍ବରୁ ଧ୍ୱଂସପ୍ରାପ୍ତ ବେଇଟ୍ ଲାହିଆ ସହର ନିକଟରେ ଏକ ଅତିରିକ୍ତ ସ୍ଥଳ ଅଭିଯାନ ଘୋଷଣା କରିଛି। ଯେଉଁଠାରେ ଗତ ୨୪ ଘଣ୍ଟା ମଧ୍ୟରେ ଆକ୍ରମଣରେ ଡଜନେ ଲୋକ ପ୍ରାଣ ହରାଇଛନ୍ତି।
ଜାନୁଆରୀ ମାସରେ ଉଭୟ ଦେଶ ମଧ୍ୟରେ ଯୁଦ୍ଧବିରତି ଘୋଷଣା ହେବା ପରେ ଲକ୍ଷ ଲକ୍ଷ ପାଲେଷ୍ଟାଇନୀ ରହିବା ପାଇଁ ଉତ୍ତର ଗାଜାକୁ ଫେରି ଆସିଥିଲେ। ତେବେ ଯୁଦ୍ଧ ବିରତିରେ ହୋଇଥିବା ଚୁକ୍ତି ମୁତାବକ ହମାସ ନିଜ ପାଖରେ ଥିବା ବନ୍ଧକମାନଙ୍କୁ ମୁକ୍ତ କରିବା ପାଇଁ ରାଜି ହୋଇନାହିଁ। ଏହାର ଜବାବରେ ମଙ୍ଗଳବାରଠୁ ଇସ୍ରାଏଲ ଗାଜାରେ ବ୍ୟାପକ ବିମାନ ଆକ୍ରମଣ ଆରମ୍ଭ କରିଦେଇଛି।
ଆପଣଙ୍କୁ ଜଣାଇରଖୁ ଯେ, ପ୍ରଥମେ ପାଲେଷ୍ଟାଇନୀ ଆତଙ୍କବାଦୀ ଗୋଷ୍ଠୀ ହମାସ ଦକ୍ଷିଣ ଇସ୍ରାଏଲ ଉପରେ ଆକ୍ରମଣ କରି ପ୍ରାୟ ୨୫୦ରୁ ଅଧିକ ଲୋକଙ୍କୁ ବନ୍ଧକ ରଖିଥିଲା। ଏହି କାରଣରୁ ଉଭୟ ଦେଶ ୨୦୨୩ ମସିହା ଅକ୍ଟୋବର ୭ ତାରିଖରୁ ପରସ୍ପର ସହ ଯୁଦ୍ଧ କରିଆସୁଛନ୍ତି। ଯାହାର ପରିଣାମସ୍ୱରୂପ ପ୍ରାୟ ଏହି ଯୁଦ୍ଧରେ ପ୍ରାୟ ୧୨୦୦ ଜଣରୁ ଅଧିକ ଲୋକଙ୍କ ମୃତ୍ୟୁ ଘଟିସାରିଲାଣି। ତେବେ ଆମେରିକା ସହାୟତାରେ ଉଭୟ ଦେଶ ଯୁଦ୍ଧବିରତି ଘୋଷଣା କରିଥିଲେ। କିନ୍ତୁ ବର୍ତ୍ତମାନ ହମାସର ମନୋମୁଖି କାର୍ଯ୍ୟକଳାପ ଦୁଇଦେଶକୁ ଫୁଣି ଆଉ ଏକ ଯୁଦ୍ଧ ଆଡକୁ ଟାଣି ନେଉଛି।
