ନୂଆଦିଲ୍ଲୀ: ପଶ୍ଚିମବଙ୍ଗ ସରକାରଙ୍କ ଏକ ନୂଆ ନିଷ୍ପତ୍ତି ଅନୁଯାୟୀ ମହିଳାମାନଙ୍କୁ ବାର ଓ ଅନ୍ ଲିକର ସପ୍ରେ କାମ କରିବାକୁ ଅନୁମତି ଦିଆଯାଇଛି। ଏହି ନିଷ୍ପତ୍ତିକୁ ବିରୋଧ କରି ଭାରତୀୟ ଜନତା ପାର୍ଟି (ବିଜେପି) ଶନିବାର ଦିନ ରାଜ୍ୟରେ ବିକ୍ଷୋଭ ପ୍ରଦର୍ଶନ ଆରମ୍ଭ କରିଛି। ବିଜେପିର ରାଜ୍ୟ ସଭାପତି ସୁକାନ୍ତ ମଜୁମଦାର ଏବଂ ମହିଳା ମୋର୍ଚ୍ଚା ନେତୃତ୍ୱରେ ଏହି ପ୍ରଦର୍ଶନ ଚାଲୁ ରହିଛି। ପ୍ରଦର୍ଶନକାରୀମାନେ କୋଲକାତାରେ ଥିବା ରାଜ୍ୟ ଅବକାରୀ ବିଭାଗର କାର୍ଯ୍ୟାଳୟକୁ ଘେରାଉ କରିଥିବା ସୂଚନା ମିଳିଛି।
ଏହି ନିଷ୍ପତ୍ତି ପଶ୍ଚିମବଙ୍ଗ ବିଧାନସଭାରେ ୨୦୨୫ ଅର୍ଥ ବିଲର ଏକ ସଂଶୋଧନ ଭାବେ ପାରିତ ହୋଇଛି। ଯାହା ବଙ୍ଗ ଅବକାରୀ ଆଇନକୁ ପରିବର୍ତ୍ତନ କରି ମହିଳାମାନଙ୍କୁ ‘ଅନ୍’ ଲିକର ସପ୍ରେ (ଯେଉଁଠାରେ ମଦ ସେବନ କରାଯାଇପାରେ, ଯଥା ବାର ଓ ରେଷ୍ଟୁରାଣ୍ଟ) କାମ କରିବାର ଅଧିକାର ଦେଇଛି। ଏହା ପୂର୍ବରୁ ‘ଅଫ୍’ ସପ୍ (ଯେଉଁଠାରୁ ମଦ କିଣି ନିଆଯାଇପାରେ) ସହ ସୀମିତ ଥିଲା।
ବିଜେପି ନେତା ଅଗ୍ନିମିତ୍ରା ପଲ୍ ଏହି ନିଷ୍ପତ୍ତିକୁ କଡ଼ା ସମାଲୋଚନା କରି କହିଛନ୍ତି ଯେ, ତୃଣମୂଳ କଂଗ୍ରେସ (ଟିଏମ୍ସି) ସରକାର ମହିଳା ସଶକ୍ତିକରଣର ନାଁରେ ମହିଳାମାନଙ୍କୁ ଅବମାନନା କରୁଛନ୍ତି। ସେ ଅଭିଯୋଗ କରିଛନ୍ତି ଯେ, “ଏହା ମହିଳାମାନଙ୍କୁ ମଦ ସଂସ୍ଥାନରେ କାମ କରିବାକୁ ଉତ୍ସାହିତ କରି ସେମାନଙ୍କ ସୁରକ୍ଷା ଓ ସମ୍ମାନକୁ ବିପଦରେ ପକାଉଛି।” ବିଜେପି ଏହାକୁ ଏକ ତୁଷ୍ଟିକରଣ ରାଜନୀତିର ଏକ ଅଂଶ ବୋଲି ଦାବି କରିଛି।
ପ୍ରଦର୍ଶନ ସମୟରେ ବିଜେପି କାର୍ଯ୍ୟକର୍ତ୍ତା ଓ ପୋଲିସ ମଧ୍ୟରେ କିଛି ସମୟ ପାଇଁ ଉତ୍ତେଜନା ପ୍ରକାଶ ପାଇଥିଲା। ବିଜେପି ମହିଳା ମୋର୍ଚ୍ଚାର ସଦସ୍ୟମାନେ କୋଲକାତାର କଲେଜ ଷ୍ଟ୍ରିଟ୍ରୁ ବିବି ବଜାର ପର୍ଯ୍ୟନ୍ତ ଏକ ରାଲିର ଆୟୋଜନ କରିଥିଲେ। ଏହି ଆନ୍ଦୋଳନ ରାଜ୍ୟରେ ରାଜନୈତିକ ବିବାଦକୁ ଆହୁରି ତୀବ୍ର କରିଛି। ଅନେୟପଟେ ଟିଏମ୍ସି ଏହାକୁ ମହିଳାମାନଙ୍କ ପାଇଁ ନୂଆ ରୋଜଗାର ସୁଯୋଗ ସୃଷ୍ଟି କରିବ ବୋଲି ପ୍ରଚାର କରୁଛି।
ଏହି ଘଟଣା ଆଗାମୀ ନିର୍ବାଚନ ପୂର୍ବରୁ ରାଜ୍ୟରେ ଟିଏମ୍ସି ଓ ବିଜେପି ମଧ୍ୟରେ ରାଜନୈତିକ ସଂଘର୍ଷକୁ ଆହୁରି ଜୋରଦାର କରିଛି। ଏହି ନିଷ୍ପତ୍ତି ବିରୁଦ୍ଧରେ ବିଜେପି ଆଗାମୀ ଦିନରେ ଆହୁରି ଅଧିକ ଆନ୍ଦୋଳନ କରିବାକୁ ଚେତାବନି ଦେଇଛି।
