ନୂଆଦିଲ୍ଲୀ ୦୫.୦୭: 'ବିଶାଲ ମେଗା ମାର୍ଟରେ ଭୟଙ୍କର ଅଗ୍ନିକାଣ୍ଡ। ନିଆଁ ଲାଗି ଜଳିଗଲା ସବୁ ସାମଗ୍ରୀ। ଜଣେ ବ୍ୟକ୍ତିଙ୍କର ମୃତ୍ୟୁ ସୂଚନା। ଲିଫ୍ଟରୁ ମୃତ ଦେହ ଉଦ୍ଧାର କଲେ ଅଗ୍ନିଶମ ବାହିନୀ।
ସୂଚନା ଅନୁଯାୟୀ, ଜୁଲାଇ ୪ ଶୁକ୍ରବାର ସନ୍ଧ୍ୟାରେ ଦିଲ୍ଲୀର କରୋଲବାଗର ଅଜମଲ ଖାନ ରୋଡରେ ଥିବା 'ବିଶାଲ ମେଗା ମାର୍ଟ'ରେ ହଠାତ୍ ନିଆଁ ଲାଗିଯାଇଥିଲା। ଏହି ନିଆଁ ପ୍ରଥମ ମହଲାରୁ ଆରମ୍ଭ ହୋଇ ଉପର ମହଲାକୁ ବ୍ୟାପି ଯାଇଥିଲା। ନିଆଁକୁ ଆୟତ୍ତ କରିବା ପାଇଁ ୧୩ଟି ଦମକଳ ଗାଡ଼ି ଘଟଣାସ୍ଥଳରେ ପହଞ୍ଚିଥିଲା।
ଅଗ୍ନିଶମ ବିଭାଗ ଅଧିକାରୀଙ୍କ ଅନୁଯାୟୀ, ସନ୍ଧ୍ୟା ୬.୪୪ ରେ ଅଗ୍ନିକାଣ୍ଡ ଘଟିଥିବା ସୂଚନା ମିଳିଥିଲା, ତା’ପରେ ତୁରନ୍ତ ସେମାନେ ଘଟଣା ସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ପ୍ରାରମ୍ଭରେ, କୌଣସି ଆହତ କିମ୍ବା ମୃତାହତଙ୍କ ଖବର ନଥିଲା। କିନ୍ତୁ ପରେ ସନ୍ଧାନ ସମୟରେ, ଲିଫ୍ଟ ଭିତରେ ଜଣେ ବ୍ୟକ୍ତିଙ୍କ ମୃତଦେହ ମିଳିଥିଲା। ଦିଲ୍ଲୀ ଅଗ୍ନିଶମ ସେବା ଏହାକୁ ନିଶ୍ଚିତ କରି କହିଛି ଯେ ଧୂଆଁ ଯୋଗୁଁ ଶ୍ୱାସରୁଦ୍ଧ ହୋଇ କିମ୍ବା ଲିଫ୍ଟରେ ଫସି ରହିବା ଯୋଗୁଁ ବ୍ୟକ୍ତି ଜଣଙ୍କର ମୃତ୍ୟୁ ହୋଇଥାଇପାରେ। ତେବେ ପୋଲିସ ପକ୍ଷରୁ ଜାରି ଏକ ବିବୃତ୍ତିରେ କୁହାଯାଇଛି ଯେ ଅଗ୍ନିକାଣ୍ଡର ସଠିକ୍ କାରଣ ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ, କିନ୍ତୁ ପ୍ରାରମ୍ଭିକ ତଦନ୍ତରେ ସର୍ଟ ସର୍କିଟ୍ ସନ୍ଦେହ କରାଯାଉଛି।
