ନୂଆଦିଲ୍ଲୀ: ଉତ୍ତର କୋରିଆ ଆଜି (ଶୁକ୍ରବାର) ଏକ ନୂତନ ବିମାନଭେଦୀ କ୍ଷେପଣାସ୍ତ୍ରର ପରୀକ୍ଷଣ କରିଛି। ଏହାର ସେନା ଆମେରିକା ଏବଂ ଦକ୍ଷିଣ କୋରିଆର ମିଳିତ ସାମରିକ ଅଭ୍ୟାସକୁ ନେଇ ସେମାନଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ନେବାକୁ ଧମକ ଦେଇଛି । ଉତ୍ତର କୋରିଆ ଏହାର ପରୀକ୍ଷଣକୁ ଆକ୍ରମଣର ପୂର୍ବ ଅଭ୍ୟାସ ବୋଲି କହିଛି । ଏନେଇ ସରକାରୀ କୋରିଆନ୍ ସେଣ୍ଟ୍ରାଲ୍ ନ୍ୟୁଜ୍ ଏଜେନ୍ସି କହିଛି ଯେ, ଶୁକ୍ରବାର ଦିନ ସେମାନଙ୍କ ନେତା କିମ୍ ଜୋଙ୍ଗ ଉନ୍ ଏହି ପରୀକ୍ଷଣ କରିଥିଲେ। ଏହି ସମୟରେ ସେ କହିଛନ୍ତି ଯେ, କ୍ଷେପଣାସ୍ତ୍ର ଗୁଡ଼ିକ ଉତ୍ତର କୋରିଆ ପାଇଁ "ଆଉ ଏକ ପ୍ରମୁଖ ପ୍ରତିରକ୍ଷା ଅସ୍ତ୍ର ପ୍ରଣାଳୀ"।
ଏହି କ୍ଷେପଣାସ୍ତ୍ର ପରୀକ୍ଷଣ ହେଉଛି ଚଳିତ ବର୍ଷ ଉତ୍ତର କୋରିଆର ଷଷ୍ଠ ଅସ୍ତ୍ର ପରୀକ୍ଷଣ କାର୍ଯ୍ୟକଳାପ । ଆଉ ଏହାକୁ ସେହି ଦିନ ପରୀକ୍ଷା କରାଯାଇଛି, ଯେଉଁ ଦିନକି ଆମେରିକା ଏବଂ ଦକ୍ଷିଣ କୋରିଆର ସେନା ସେମାନଙ୍କର ବାର୍ଷିକ ଫ୍ରିଡମ୍ ସିଲ୍ଡ କମାଣ୍ଡ ପୋଷ୍ଟ ଅଭ୍ୟାସ ସମାପ୍ତ କରିଛନ୍ତି । ଜାନୁଆରୀରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଶପଥ ଗ୍ରହଣ ପରେ ଏହା ୧୧ ଦିନିଆ ତାଲିମ ମିତ୍ର ରାଷ୍ଟ୍ର ଗୁଡ଼ିକର ପ୍ରଥମ ପ୍ରମୁଖ ମିଳିତ ସାମରିକ ଅଭ୍ୟାସ ଥିଲା।
ଆମେରିକା ଏବଂ ଦକ୍ଷିଣ କୋରିଆର ଅଧିକାରୀ ମାନେ ସେମାନଙ୍କର ମିଳିତ ସାମରିକ ଅଭ୍ୟାସକୁ ପ୍ରତିରକ୍ଷା ପ୍ରକୃତିର ବୋଲି ବର୍ଣ୍ଣନା କରନ୍ତି, କିନ୍ତୁ ଉତ୍ତର କୋରିଆ ଏହାକୁ ଏକ ପ୍ରମୁଖ ସୁରକ୍ଷା ବିପଦ ଭାବରେ ଦେଖୁଛି । ଚଳିତ ବର୍ଷର ଫ୍ରିଡମ୍ ସିଲ୍ଡ ତାଲିମ ଆରମ୍ଭ ହେବାର କିଛି ଘଣ୍ଟା ପରେ, ମାର୍ଚ୍ଚ ୧୦ ତାରିଖରେ, ଉତ୍ତର କୋରିଆ ସମୁଦ୍ରରେ ଅନେକ ବାଲିଷ୍ଟିକ୍ କ୍ଷେପଣାସ୍ତ୍ର ନିକ୍ଷେପ କରିଥିଲା।
ଶୁକ୍ରବାର ଦିନ, ଉତ୍ତର କୋରିଆର ପ୍ରତିରକ୍ଷା ମନ୍ତ୍ରଣାଳୟ ଅଭିଯୋଗ କରିଛି ଯେ ସାମ୍ପ୍ରତିକ ଆମେରିକା-ଦକ୍ଷିଣ କୋରିଆ ଅଭ୍ୟାସ ଉତ୍ତର କୋରିଆର ପରମାଣୁ ଅସ୍ତ୍ରଶସ୍ତ୍ର ଅପସାରଣ କରିବା ପାଇଁ ଭୂତଳ ସୁଡ଼ଙ୍ଗଗୁଡ଼ିକୁ ନଷ୍ଟ କରିବାର ଏକ ପ୍ରୟାସ ଥିଲା। ଯଦି ଆମେରିକା ଏବଂ ଦକ୍ଷିଣ କୋରିଆ ପୁଣିଥରେ ସମାନ ଉତ୍ତେଜନାମୂଳକ କାର୍ଯ୍ୟ କରନ୍ତି ତେବେ ସେମାନଙ୍କୁ ପରିଣାମ ଭୋଗିବାକୁ ପଡିବ।
