ଜୟପୁର ୨୨/୦୩: ଶୁକ୍ରବାର ସନ୍ଧ୍ୟା ବନ୍ଧୁକ ମୁନରେ ବ୍ୟବସାୟୀଙ୍କୁ ଉଠାଇନେଇଥିଲେ ଅପହରଣକାରୀ। ଆଜି ସକାଳେ କୌଶଳ କ୍ରମେ କିଡ୍ନାପରଙ୍କ କବଳରୁ ବ୍ୟବସାୟୀ ଏ.ରାଜୁ ଖସି ଆସିଛନ୍ତି। ଶ୍ରୀ ରାଜୁଙ୍କୁ ଉଦ୍ଧାର ପରେ ବୋରିଗୁମ୍ମା ଥାନରେ ରଖାଯାଇଛି। ତେବେ କଣ ପାଇଁ ଅପହରଣ କରାଯାଇଥିଲା ତାହାକୁ ନେଇ ଛାନ୍ଭିନ୍ ଚଲାଇଛି ପୋଲିସ।
ମିଳିଥିବା ସୂଚନା ଅନୁଯାୟୀ, ବ୍ୟବସାୟୀଙ୍କର ଏକ ମିଲ୍ ସ୍ଥାନୀୟ ହାଟପଦାରେ ରହିଛି । ସେ ଲୋକଙ୍କୁ ଟଙ୍କା ଦେଇ ସୁଧ ଆଦାୟ କରନ୍ତି । ଶୁକ୍ରବାର ରାତିରେ କେତେକ ଦର୍ବୃତ୍ତ କାର୍ରେ ପହଞ୍ଚିଥିଲେ । ସହର ଉପକଣ୍ଠ ବାରିଣିପୁଟ ଅଞ୍ଚଳରେ ବ୍ୟବସାୟୀଙ୍କୁ ଧମକଚମକ ଦେଇ ବନ୍ଧୁକ ମୁନରେ ଉଠାଇ ନେଇଯାଇଥିଲେ । ଖବରପାଇ ଆଇଆଇସି ଶ୍ରୀ ପ୍ରଧାନ, ଟାଉନଥାନା ଆଇଆଇସି ଈଶ୍ୱର ତାଣ୍ଡି ପ୍ରମୁଖଙ୍କ ସହ ଉଭୟ ଥାନାର ଅଧିକାରୀ ଏବଂ ଫୋର୍ସ ଘଟଣାସ୍ଥଳରେ ପହଞ୍ଚିଥିଲେ । ପରେ ବ୍ୟବସାୟୀଙ୍କୁ ଉଦ୍ଧାର ଏକ ସ୍ବତନ୍ତ୍ର ଟିମ୍ ଗଠନ କରାଯାଇଥିଲା। ବିଭିନ୍ନ ଅଞ୍ଚଳରେ ମଧ୍ୟ ଚଢ଼ାଉ କରାଯାଇଥିଲା। ତେବେ ଆଜି ସକାଳେ ବ୍ୟବସାୟୀ ଏ.ରାଜୁ ଅପହରଣକାରୀଙ୍କ କବଳରୁ ଖସି ଆସିବାରେ ସଫଳ ହୋଇଛନ୍ତି। ତେବେ ପୋଲିସର ଏକ ଟିମ୍ ଅପହରଣ ସ୍ଥଳକୁ ଯାଇ ଯାଞ୍ଚ କରୁଥିବା ଜଣାପଡୁଛି।
