ସେଣ୍ଟ୍ ଭିନସେଣ୍ଟ୍,୧୩/୦୬: ଗୁରୁବାର ରାତି ମ୍ୟାଚ୍ (ଗ୍ରୁପ୍-ଡି’)ରେ ବାଂଲାଦେଶ ଓ ନେଦରଲାଣ୍ଡ୍ସ ସାମ୍ନାସାମ୍ନି ହେବେ । ନେଦରଲାଣ୍ଡ୍ସ ଦିନିକିଆ ବିଶ୍ୱକପ୍ ଭଳି ଏଥର ମଧ୍ୟ ବାଂଲାଦେଶକୁ ପୁଣିଥରେ ଧୂଳି ଚଟାଇବାକୁ ପ୍ରସ୍ତୁତ । ୨୦୨୩ ବିଶ୍ୱକପ୍ରେ ଦଳ ୮୭ରନ୍ରେ ବାଂଲାଦେଶକୁ ହରାଇ ବଡ଼ ବିପର୍ଯ୍ୟୟ ଘଟାଇଥିଲା । ଅନ୍ୟ ପଟରେ ବାଂଲାଦେଶ ଗୁରୁବାର ମ୍ୟାଚ୍ ଜରିଆରେ ନେଦରଲାଣ୍ଡ୍ସଠୁ ପୂର୍ବ ପରାଜୟର ପ୍ରତିଶୋଧ ନେବାକୁ ଲକ୍ଷ୍ୟ ରଖିଛି । ଆର୍ନୋସ ଭାଲେ ଗ୍ରାଉଣ୍ଡ୍ରେ ଚଳିତ ବିଶ୍ୱକପ୍ର ପ୍ରଥମ ମ୍ୟାଚ୍ ଖେଳାଯିବ । ଦୀର୍ଘ ୧୦ ବର୍ଷ ପରେ ଏହି ଗ୍ରାଉଣ୍ଡ୍କୁ ଅନ୍ତର୍ଜାତୀୟ ମ୍ୟାଚ୍ ଫେରୁଥିବାରୁ ପୂର୍ବାନୁମାନ କରିବା କଷ୍ଟକର ।
ଉଭୟ ଦଳ ୨ଟି ଲେଖାଏଁ ମ୍ୟାଚ୍ ଖେଳି ଗୋଟିଏରେ ବିଜୟ ହାସଲ କରିଛନ୍ତି ଏବଂ ଦକ୍ଷିଣ ଆଫ୍ରିକା ବିପକ୍ଷରେ ପରାଜିତ ହୋଇଛନ୍ତି । ଗତ ୧୦ ତାରିଖରେ ବାଂଲାଦେଶ ୪ରନ୍ରେ ଦକ୍ଷିଣ ଆଫ୍ରିକା ନିକଟରୁ ପରାଜିତ ହୋଇଥିଲା । ପୂର୍ବ ମ୍ୟାଚ୍ ଫଳାଫଳକୁ ଭୁଲି ଦଳ ବିଜୟକୁ ଫେରିବା ପାଇଁ ବ୍ୟାକୁଳ । ପ୍ରଥମ ୨ଟି ମ୍ୟାଚ୍ରେ ଲିଟନ ଦାସଙ୍କ ଛାଡ଼ି ଅନ୍ୟ ସମସ୍ତ ବ୍ୟାଟର ନିରାଶ କରିଥିଲେ । ମାତ୍ର ବୋଲରମାନେ ଶୃଙ୍ଖଳିତ ପ୍ରଦର୍ଶନ କରିଥିଲେ ।
ନେଦରଲାଣ୍ଡ୍ସକୁ ହରାଇବାକୁ ହେଲେ ବ୍ୟାଟରଙ୍କୁ ଦାୟିତ୍ୱ ମୁଣ୍ଡାଇବାକୁ ପଡ଼ିବ । ଗୁରୁବାର ନେଦରଲାଣ୍ଡ୍ସ ବ୍ୟାଟରଙ୍କ ପାଇଁ ବାଂଲାଦେଶ ବୋଲରଙ୍କୁ ସାମ୍ନା କରିବା ଆହ୍ୱାନପୂର୍ଣ୍ଣ ହେବ । ନେଦରଲାଣ୍ଡ୍ସ ପ୍ରଥମ ମ୍ୟାଚ୍ରେ ନେପାଳକୁ ହରାଇଥିଲା । ଦକ୍ଷିଣ ଆଫ୍ରିକା ବିପକ୍ଷରେ ଦଳ ଭଲ ପ୍ରଦର୍ଶନ କରିଥିଲେ ହେଁ ଅଭିଜ୍ଞତା ଅଭାବରୁ ପରାଜିତ ହୋଇଥିଲା । ଲୋଗାନ ଭାନ୍ ବିକ୍, ବାସ ଡି ଲିଡ୍, ଟିମ୍ ପ୍ରିଙ୍ଗଲ ପ୍ରଭାବୀ ବୋଲିଂ ପ୍ରଦର୍ଶନ କରିଥିଲେ । ବ୍ୟାଟରମାନେ ନିଜ ଦକ୍ଷତା ମୁତାବକ ପ୍ରଦର୍ଶନ ଦେଲେ ଦଳ ବଡ଼ ସ୍କୋର କରିପାରିବ ।
ସମ୍ଭାବ୍ୟ ଏକାଦଶ
ବାଂଲାଦେଶ: ତଞ୍ଜିଦ ହାସନ, ନଜମୁଲ ହୋସେନ ଶାନ୍ତୋ (ଅଧିନାୟକ), ଲିଟନ ଦାସ, ସାକିବ ଅଲ୍ ହାସନ, ତୌହିଦ ହୃଦୟ, ମହମୁଦୁଲ୍ଲା, ଜାକର ଅଲି, ରିଷଦ ହୋସେନ, ତଞ୍ଜିମ ହାସନ, ଟସ୍କିନ ଅହମ୍ମଦ, ମୁସ୍ତାଫିଜୁର ରେହମାନ ।
ନେଦରଲାଣ୍ଡ୍ସ: ମାଇକେଲ ଲେଭିଟ୍, ମ୍ୟାକ୍ସ ଓ ଦାଉଦ, ବିକ୍ରମଜିତ ସିଂହ, ସାଇବ୍ରାଣ୍ଡ୍ ଏଙ୍ଗେଲବ୍ରେଚ୍, ବାସ୍ ଡି’ ଲିଡ୍, ସ୍କଟ୍ ଏଡୱାର୍ଡ୍ସ, ତେଜା ନିଦାମାନୁରୁ, ଲୋଗାନ ଭାନ୍ ବିକ, ଟିମ୍ ପ୍ରିଙ୍ଗଲ, ପଲ୍ ଭାନ ମିକେରନ, ଭିଭିଆନ୍ କିଙ୍ଗ୍ମା ।
