ନୂଆଦିଲ୍ଲୀ,୧୩/: ମାଲେସିଆର ଶାହ ଆଲମ ଠାରେ ସୋମବାରଠୁ ଆରମ୍ଭ ହେଉଛି ବ୍ୟାଡ଼ମିଣ୍ଟନ ଏସିଆ ଟିମ୍ (ପୁରୁଷ ଓ ମହିଳା) ଚାମ୍ପିଅନସିପ୍ । ପୁରୁଷ ବିଭାଗରେ ଭାରତ ଗ୍ରୁପ୍-ଏ’ରେ ଚୀନ, ହଂକଂ ସହ ସ୍ଥାନ ପାଇଥିବାବେଳେ ମହିଳା ଦଳ ଗ୍ରୁପ୍-ଡବ୍ଲ୍ୟୁ’ରେ ଚୀନ ସହ ସାମିଲ୍ ରହିଛି ।
ଆସନ୍ତା ୧୪ ତାରିଖରେ ପୁରୁଷ ଦଳ ହଂକଂ ବିପକ୍ଷରେ ଅଭିଯାନ ଆରମ୍ଭ କରିବ । ଦଳର ନକ୍ଆଉଟ୍ ରାଉଣ୍ଡ୍ ପଥ କଷ୍ଟକର ରହିଛି । ୧୫ ତାରିଖରେ ଦଳ ଶକ୍ତିଶାଳୀ ଚୀନକୁ ଭେଟିବ । ଏସ୍ଏସ୍ ପ୍ରଣୟ ଦଳର ନେତୃତ୍ୱ ନେବେ । ସେହିପରି ସାତ୍ତ୍ୱିକସାଇରାଜ ରଙ୍କିରେଡ୍ଡୀ-ଚିରାଗ ସେଟ୍ଟୀ ଡବଲ୍ସରେ ଆକ୍ସନକୁ ଓହ୍ଲାଇବାକୁ ଥିବାବେଳେ ଲକ୍ଷ୍ୟ ସେନ, କେ. ଶ୍ରୀକାନ୍ତ, ଚିରାଗ ସେନ୍, ଧ୍ରୁବ କପିଳା, ଏମ୍ଆର୍ ଅର୍ଜୁନ, ସୂରଜ ଗୋଆଲା, ପୃଥ୍ୱୀ ରୟ ସାମିଲ୍ ରହିଛନ୍ତି ।
ମହିଳା ଦଳର ନକ୍ ଆଉଟ୍ ରାଉଣ୍ଡ୍ ସ୍ଥାନ ପକ୍କା ହୋଇସାରିଛି । ଗ୍ରୁପ୍ ପର୍ଯ୍ୟାୟରେ ଦଳ କେବଳ ଚୀନକୁ ଭେଟିବ । ପ୍ରତ୍ୟାବର୍ତ୍ତନରେ ପିଭି ସିନ୍ଧୁ ଦଳର ମଙ୍ଗ ଧରିବେ । ଅନ୍ୟମାନଙ୍କ ମଧ୍ୟରେ ଅନମୋଲ, ତନ୍ଭୀ ଶର୍ମା, ଅସ୍ମିତା ଚଲିହା, ତ୍ରିଶା ଜୋଲି, ଗାୟତ୍ରୀ ଗୋପିଚାନ୍ଦ, ଅଶ୍ୱିନୀ ପୋନାପ୍ପା, ତନିଶା କ୍ରାଷ୍ଟୋ, ପ୍ରିୟା ଦେବୀ, ଶ୍ରୁତି ମିଶ୍ରା ସାମିଲ୍ ରହିଛନ୍ତି ।