ନୂଆଦିଲ୍ଲୀ, ୧୩/୦୬: ସମ୍ପ୍ରତି ପୁଞ୍ଜି ବଜାରରେ ରହିଛି ଉତ୍ସାହ । ଦିନକୁ ଦିନ ନୂଆ ରେକର୍ଡ କରୁଛି ବଜାର । ନିବେଶକ ଚଳଚଞ୍ଚଳ । ବଜାର ମାର୍କେଟ୍ କ୍ୟାପ୍ ବଢ଼ିଚାଲିଛି । ଆସେଟ୍ ଦର ବଡ଼ ଆକାରରେ ବୃଦ୍ଧି ପାଉଛି । ତେବେ ଷ୍ଟକ୍ ବଜାରରେ ତିଆରି ହେଉଥିବା ଏହି ବବଲ୍ କେତେବେଳେ ଯେ ଫାଟିବ ତାହା କହିହେବ ନାହିଁ । ଜଣେ ଆମେରିକୀୟ ଅର୍ଥନୀତିଜ୍ଞଙ୍କ ସତର୍କବାଣୀ ଏବେ ସମଗ୍ର ବିଶ୍ୱ ପାଇଁ ଚିନ୍ତା ଆଣିଛି ।
ଆମେରିକୀୟ ଅର୍ଥନୀତିଜ୍ଞ ତଥା ବେଷ୍ଟ୍ ସେଲିଂ ଅଥର୍ ହ୍ୟାରି ଡେଣ୍ଟ ଚେତାବନି ଦେଇଛନ୍ତି ଯେ, ୨୦୨୫ରେ ଆମେରିକୀୟ ସେୟାର ବଜାର ଭୁଶୁଡ଼ିବ । ଏହାର ପ୍ରକୋପ ୨୦୦୮ର ଆର୍ଥିକ ମାନ୍ଦାବସ୍ଥାଠାରୁ ବି ବିଶାଳ ହେବ । ଅର୍ଥାତ୍ ୨୦୦୮ ତୁଳନାରେ ବଜାରରେ ବିରାଟ ହ୍ରାସ ଘଟିବ । ଫକ୍ସ ନ୍ୟୁଜ୍ର ଏକ ରିପୋର୍ଟରେ ଉପରୋକ୍ତ ସୂଚନା ଦିଆଯାଇଛି । ସାଧାରଣତଃ ସେୟାର ବଜାରରେ ଜଡ଼ିତ ଲୋକମାନେ ଅନ୍ତରାଷ୍ଟ୍ରୀୟ ଘଟଣାକ୍ରମ ଉପରେ ନଜର ରଖିଥାନ୍ତି । କଥାରେ ଅଛି, ଯଦି ଆମେରିକାକୁ ଛିଙ୍କ ଆସେ, ତେବେ ସମଗ୍ର ବିଶ୍ୱକୁ ଥଣ୍ଡା ହୋଇଯାଏ । ସେହିଭଳି ଭାବେ ଯଦି ଆଗକୁ ଆମେରିକାରେ ବଡ଼ ଧରଣର ଆର୍ଥିକ ସଂକଟ ଦେଖାଦିଏ, ତେବେ ଏହା ପ୍ରଭାବରେ ସମଗ୍ର ବିଶ୍ୱ ବଜାରରେ ଭୁସ୍ଫଳନ ଦେଖିବାକୁ ମିଳିବ ।
ହ୍ୟାରି ଡେଣ୍ଟ ସମଗ୍ର ବିଶ୍ୱର ଅର୍ଥନୀତିଗୁଡ଼ିକୁ ସର୍ଭେ କରି ସ୍ୱତନ୍ତ୍ର ମେଥଡ୍ ବାହାର କରିଥାନ୍ତି । ଭବିଷ୍ୟତରେ ବିତ୍ତୀୟ ବ୍ୟବସ୍ଥାରେ କ’ଣ ହେବ, ଉକ୍ତ ଅନୁମାନ ଲଗାଇବା ପାଇଁ ସେ ନିଜ ବିଶ୍ଳେଷଣକୁ ବ୍ୟବହାର କରିଥାନ୍ତି । ଫକ୍ସ ନ୍ୟୁଜ୍କୁ ଦେଇଥିବା ସାକ୍ଷାତ୍କାରରେ ଡେଣ୍ଟ୍ କହିଛନ୍ତି ଯେ, ବର୍ତ୍ତମାନ ବଜାରରେ ଦେଖାଦେଇଥିବା ବବଲ୍ ସମ୍ପୂର୍ଣ୍ଣ ରୂପେ କାଳ୍ପନିକ । ସେୟାର ବଜାରରେ ଏହି ବବଲ୍ ୧୪ ବର୍ଷ ହେବ ତିଆରି ହେଉଛି । ବିଶ୍ୱବ୍ୟାପୀ ସରକାର ନିଜ ନିଜ ଅର୍ଥବ୍ୟବସ୍ଥାକୁ ଚଳାଇବା ପାଇଁ ସହାୟତା ପ୍ୟାକେଜ୍ ଜାରି କରୁଛନ୍ତି, ଯେଉଁ କାରଣରୁ ସେୟାର ବଜାରରେ ବବଲ୍ ତିଆରି ହେଉଛି । ଏହା ଆଗକୁ ଫାଟିବାକୁ ଯାଉଥିବା ସେ କହିଛନ୍ତି ।
ଆମେରିକୀୟ ଅର୍ଥନୀତିଜ୍ଞ କହିଛନ୍ତି ଯେ, ସେୟାର ବଜାରର କୌଣସି ବବଲ୍ ୫ରୁ ୬ ବର୍ଷ ପର୍ଯ୍ୟନ୍ତ ଚିହ୍ନଟ ହୋଇ ନ ଥାଏ । ଥରେ ସବୁ କିଛି ଭୁଷୁଡ଼ିବା ଆରମ୍ଭ କଲା ପରେ ହିଁ ଏହାର ଅନୁମାନ ଲଗାଯାଇପାରେ । ହ୍ୟାରି ଡେଣ୍ଟ କହିଛନ୍ତି ଯେ, ଏଥର ଏହି ବବଲ ଅଧିକ ଲମ୍ବା ହେଲାଣି। ତେଣୁ ଅନୁମାନ କରାଯାଇପାରୁଛି ଯେ, ଏଥର ସେୟାର ବଜାରରେ ହ୍ରାସ ୨୦୦୮-୦୯ ତୁଳନାରେ ବିଶାଳ ହେବ ।
ଅର୍ଥନୀତିଜ୍ଞଙ୍କ ଅନୁସାରେ, ମୁଦ୍ରାନୀତିକୁ କୋହଳ କରିବା ପାଇଁ ତଥା ଦୁର୍ବଳ ଅର୍ଥବ୍ୟବସ୍ଥାକୁ ବଳ ଦେବା ପାଇଁ ବିଶ୍ୱ ବ୍ୟାପୀ ସରକାରମାନେ ଅର୍ଥନୀତିରେ ବଡ଼ ଆକାରରେ ପୁଞ୍ଜି ବ୍ୟୟ କରୁଛନ୍ତି । ୨୦୦୮ରେ ଯେଉଁ ଆର୍ଥିକ ମାନ୍ଦାବସ୍ଥା ହୋଇଥିଲା,ତାହାରକାରଣ ଥିଲା ସମ୍ପତ୍ତି ଦର ବୃଦ୍ଧି । କିନ୍ତୁ ଏଥର କାରଣ ହେବ ‘ବବଲ୍ ଅଫ୍ ଅଲ୍ ବବଲ୍ସ’। କରୋନା ସଂକଟ ଯୋଗୁ ବିଶ୍ୱବ୍ୟାପୀ ଅର୍ଥବ୍ୟବସ୍ଥାଗୁଡ଼ିକରେ ପତନ ଘଟିଥିଲା ଏବଂ ଆମେରିକା ସମେତ ବିଶ୍ୱବ୍ୟାପୀ ସରକାର ବଡ଼ ବଡ଼ ଆର୍ଥିକ ପ୍ୟାକେଜ୍ ଘୋଷଣା କରିଥିଲେ । ବିଶ୍ୱର ଅନେକ ଦେଶର ଅର୍ଥବ୍ୟବସ୍ଥାରେ ସୁଧ ହାର ସର୍ବକାଳୀନ ନିମ୍ନ ସ୍ତରରେ ରଖାଯାଇଥିଲା । ଫଳରେ ଏ ସଂକଟ ଅଧିକ ବଢ଼ିଯାଇଛି ।
ଆମେରିକାର ପ୍ରସିଦ୍ଧ ଅର୍ଥନୀତିଜ୍ଞ କହିଛନ୍ତି ଯେ, ଏସ୍ ଆଣ୍ଡ୍ ପି ପୁଣି ୮୦% ପର୍ଯ୍ୟନ୍ତ କ୍ରାଶ୍ ହୋଇପାରେ । ସେହିଭଳି ନାସ୍ଡାକ୍ ୯୦%ରୁ ଅଧିକ ଖସିପାରେ । ବର୍ଷ ୨୦୨୫ରେ ସେୟାର ବଜାର ଭୁସୁଡ଼ିବ ।