ନୂଆଦିଲ୍ଲୀ,୧୮/୦୬: କେତେକ ବର୍ଗରେ ହ୍ରାସ ହୋଇପାରେ ବ୍ୟକ୍ତିଗତ ଆୟକର । ଏହା ଦ୍ୱାରା ଏସିଆର ତୃତୀୟ ବୃହତ୍ତ ଅର୍ଥନୀତିରେ ଚାହିଦା ବୃଦ୍ଧି କରିବା କରିବାରେ ସହାୟକ ହେବ । ସରକାରଙ୍କ ୨ ବରିଷ୍ଠ ଅଧିକାରୀ ଏ ସମ୍ପର୍କରେ ସୂଚନା ଦେଇଛନ୍ତି । ତେବେ ଜୁଲାଇରେ ଘୋଷଣା ହୋଇପାରେ ନୂଆ ଯୋଜନା । ଏନ୍ଡିଏ ସରକାରଙ୍କ ତୃତୀୟ ପାଳିରେ ପ୍ରଥମ ବଜେଟ ଜୁଲାଇ ମଧ୍ୟ ଭାଗରେ ଆସିବାରେ ସମ୍ଭାବନା ରହିଛି ।
ଚଳିତ ଥର ବିଜେପିକୁ ସ୍ପଷ୍ଟ ବହୁମତ ମିଳିନି । ନିର୍ବାଚନ ଫଳାଫଳ ଆସିବା ପରେ ହୋଇଥିବା ସର୍ଭେ ମୁତାବକ, ଲୋକମାନେ ଦରଦାମ ବୃଦ୍ଧି, ବେକାରୀ ଏବଂ ଆୟରେ ହ୍ରାସକୁ ନେଇ ଚିନ୍ତିତ ଅଛନ୍ତି । ଆର୍ଥିକ ବର୍ଷ ୨୦୨୩-୨୪ ଅବଧିରେ ଦେଶର ଅର୍ଥନୀତି ୮.୨% ହାରରେ ବଢ଼ିଛି । ତେବେ ଚାହିଦା ଅଭିବୃଦ୍ଧି ହାର ଏହାର ଅଧା ରହିଛି । ମେଣ୍ଟ ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଥିଲେ ଯେ, ତାଙ୍କ ସରକାର ମଧ୍ୟବିତ୍ତଙ୍କ ସଞ୍ଚୟ ଏବଂ ଲୋକଙ୍କ ଜୀବନ ଧାରଣ ମାନରେ ଉନ୍ନତି ଆଣିବା ଦିଗରେ ଯଥାସାଧ୍ୟ ଉଦ୍ୟମ କରିବ ।
ବ୍ୟକ୍ତିଗତ ଆୟକର ହ୍ରାସ ହେଲେ ଏହା ଦ୍ୱାରା ଅର୍ଥନୀତିରେ ଚାହିଦା ବୃଦ୍ଧି ହେବ । ଯାହା ଦେଶ ପାଇଁ ଶୁଭଙ୍କର ହେବ । ମଧ୍ୟବିତ୍ତ ମଧ୍ୟ ସଞ୍ଚୟ କରିବାକୁ ସକ୍ଷମ ହେବେ ବୋଲି ଅଧିକାରୀ ଜଣକ କହିଛନ୍ତି । ଏହି ପ୍ରସଙ୍ଗରେ ଇମେଲ ଯୋଗେ ଅର୍ଥ ମନ୍ତ୍ରଣାଳୟର ମତାମତ ଲୋଡା ଯାଇଥିଲେ ମଧ୍ୟ ଏହା ମିଳିପାରିନାହିଁ । ଅଧିକାରୀ ଜଣକ କହିଛନ୍ତି, ୧.୫ ନିୟୁତରୁ ଅଧିକ ଆୟ କରୁଥିବା ବ୍ୟକ୍ତି ବିଶେଷଙ୍କ କ୍ଷେତ୍ରରେ ଆୟକର ରିହାତି ମିଳିପାରେ ।
ତେବେ ନିର୍ଦ୍ଧିଷ୍ଟ ଭାବେ କେତେ ରିହାତି ମିଳିବ ସେ ସମ୍ପର୍କରେ କିଛି ଚୂଡାନ୍ତ ହୋଇନାହିଁ । ସେହିଭଳି ୨୦୨୦ରେ ଆସିଥିବା ଟିକସ ଯୋଜନାରେ କିଛିଟା ପରିବର୍ତ୍ତନ ହୋଇପାରେ । ୧.୫ ନିୟୁତ ବା ୧୫ ଲକ୍ଷ ଟଙ୍କା ଯାଏ ଆୟ ଉପରେ ୫ରୁ ୨୦% ଟିକସ ଲାଗୁ ହେଉଛି । ୧୫ ଲକ୍ଷ ଟଙ୍କାରୁ ଉଦ୍ଧ୍ୱର୍ ଆୟ କ୍ଷେତ୍ରରେ ଟିକସ ୩୦% ରହିଛି ।
ବ୍ୟକ୍ତିଙ୍କ ଆୟ ୩ ଲକ୍ଷରୁ ୧୫ ଲକ୍ଷକୁ ବୃଦ୍ଧି ହେଲେ ଟିକସ ହାର ୬ ଗୁଣ ବୃଦ୍ଧି ହେଉଛି । ସେହିଭଳି ବାର୍ଷିକ ୧୦ ଲକ୍ଷରୁ କମ୍ ଆୟକାରୀ ବ୍ୟକ୍ତି ବିଶେଷଙ୍କ ବ୍ୟକ୍ତିଗତ ଆୟକର ମଧ୍ୟ କମ୍ ହୋଇପାରେ । ପୁରୁଣା ଟିକସ ଢ଼ାଞ୍ଚାରେ ସର୍ବୋଚ୍ଚ ଟିକସ ହାର ୩୦% ରହିଛି । ଯଦି ବିଭିନ୍ନ ଟିକସ ସୀମା କ୍ଷେତ୍ରରେ ପରିବର୍ତ୍ତନ ହୁଏ ତାହା କେତେ ସ୍ତରରେ ରହିବ ସେ ନେଇ ଏବେ ବିଚାର କରୁଛନ୍ତି ସରକାର ।
ଅନ୍ୟ ଜଣେ ଅଧିକାରୀ କହିଛନ୍ତି, ବ୍ୟକ୍ତିଗତ ଆୟକ୍ଷେତ୍ରରେ ଯଦି କିଛିଟା ଟିକସ କମେ ତେବେ ଏହି ବର୍ଗଙ୍କ ଖର୍ଚ୍ଚ ଯୋଗୁ ଅନ୍ୟ ବାଟେ ସରକାର ଟିକସ ପାଇବେ । ଚଳିତ ଆର୍ôଥକ ବର୍ଷରେ ଦେଶର ବିତ୍ତୀୟ ନିଅଣ୍ଟକୁ ଜିଡିପିର ୫.୧% ସ୍ତରରେ ରଖିବାକୁ ସରକାର ଲକ୍ଷ୍ୟ ରଖିଛନ୍ତି । ଟିକସ ସଂଗ୍ରହ ଦୃଢ଼ ଥିବା ବେଳେ ଏହା ଅର୍ଥନୀତି ପାଇଁ ସହାୟକ ହେବ । ସେହିଭଳି କେନ୍ଦ୍ରୀୟ ବ୍ୟାଙ୍କ ରିଜର୍ଭ ବ୍ୟାଙ୍କ ପ୍ରଦାନ କରିଥିବା ୨ ଲକ୍ଷ କୋଟି ଟଙ୍କାର ଲାଭାଂଶ ସରକାରଙ୍କୁ ବଜେଟରେ ଖର୍ଚ୍ଚ କରିବାକୁ ସୁଯୋଗ ଦେବ ।
କେବଳ ଟିକସ ହ୍ରାସ ନୁହେଁ ଚଳିତ ଥର ସରକାର ଲୋକାଭୀମୁଖୀ ଯୋଜନା ଉପରେ ମଧ୍ୟ ଫୋକସ କରିପାରନ୍ତି ବୋଲି ବିଶେଷଜ୍ଞ କହିଛନ୍ତି । କାରଣ ନିର୍ବାଚନ ପରେ ଲୋକଙ୍କୁ ଖୁସ କରିବା ପାଇଁ ସରକାର ଉଦ୍ୟମ କରିବେ । ପୂର୍ବରୁ ସରକାର ପୁଞ୍ଜି ଖର୍ଚ୍ଚ ସହ ଅଭିବୃଦ୍ଧିକୁ ତ୍ୱରାନ୍ୱିତ କରିବା ଭଳି ଦିଗ ଗୁଡିକ ଉପରେ ଧ୍ୟାନ ଦେଇଛନ୍ତି । ଏଥର ମଧ୍ୟ ଏହି ଧାରା ଉପରେ ମଧ୍ୟ କାମ କରିପାରନ୍ତି ସରକାର ।
କେନ୍ଦ୍ର ସରକାରଙ୍କ ବଜେଟ ପ୍ରସ୍ତୁତି ନେଇ ପୂର୍ବର ପ୍ରକ୍ରିୟାଗୁଡିକ ଏବେ କାମ ହେଉଛି । ଏ ନେଇ ବିଭିନ୍ନ କ୍ଷେତ୍ରର ଅଂଶୀଦାରଙ୍କ ସହ ବିଚାର ବିମର୍ଷ କରିବେ । ତା ପରେ କେଉଁ ଦିଗରେ କଣ କାର୍ଯ୍ୟପନ୍ଥା ଗ୍ରହଣ କରାଯିବ ସେ ନେଇ ନିଷ୍ପତ୍ତି ହେବ । ଚଳିତ ବର୍ଷ ଜୁଲାଇ ମଧ୍ୟ ଭାଗ ବେଳକୁ ବଜେଟ ଆସିବାର ସମ୍ଭାବନା ରହିଛି ।