ନୂଆଦିଲ୍ଲୀ,୧୭/୦୬: ଖୁବଶୀଘ୍ର ଆସୁଛି ବନ୍ଦେ ଭାରତ ସ୍ଲିପର ଟ୍ରେନ୍ । ଦୁଇ ମାସ ଭିତରେ ଟ୍ରାକରେ ଦୌଡ଼ିବ ଦେଶର ଏହି ବହୁ ପ୍ରତୀକ୍ଷିତ ପ୍ରଥମ ବନ୍ଦେ ଭାରତ ସ୍ଲିପର ଟ୍ରେନ୍ । ଏନେଇ ସୂଚନା ଦେଇଛନ୍ତି କେନ୍ଦ୍ର ରେଳମନ୍ତ୍ରୀ ଅଶ୍ୱିନୀ ବୈଷ୍ଣବ । ଏବେ ଏହାର ନିର୍ମାଣ କାମ ଜାରସୋରରେ ଆଗେଇ ଚାଲିଛି । ଶେଷ ପର୍ଯ୍ୟାୟରେ ପହଞ୍ଚିଛି ସମସ୍ତ ବୈଷୟିକ କାମ । ବାଙ୍ଗାଲାରରେ ଥିବା ବିଇଏମ୍ଏଲ୍ ଲିମିଟେଡର ରେଳ ୟୁନିଟରେ ଏହାର ନିର୍ମାଣ ଚାଲିଛି । ଏହି ଟ୍ରେନରେ ଯାତ୍ରୀ ଆରାମଦାୟକ ଯାତ୍ରା ସହ ପାଇବେ ବିଶ୍ୱସ୍ତରୀୟ ସୁବିଧା । ଏଥରେ ରହିବ ମୋଟ ୧୬ଟି କୋଚ୍ ।
ସେହିଭଳି ୪ଟି ବଗିର ଗୋଟିଏ ୟୁନିଟ୍ ରହିବ । ଏହି ଟ୍ରେନରେ ଅତ୍ୟାଧୁନିକ ନିୟନ୍ତ୍ରଣ ସହିତ ସେନ୍ସର ଭିତ୍ତିକ ଲାଇଟିଂ, କ୍ୟାମେରା, ବାୟୋ ଭ୍ୟାକ୍ୟୁମ୍ ଟଏଲେଟ୍ ଓ ଅନ୍ୟାନ୍ୟ ଅତ୍ୟାଧୁନିକ ସୁବିଧା ରହିବ । ଏହାର ବଡି ଷ୍ଟ୍ରକ୍ଚର୍ ହାଇଗ୍ରେଡ୍ ଅଷ୍ଟେନିଟିକ୍ ଷ୍ଟେନଲେସ୍ ଷ୍ଟିଲରେ ନିର୍ମିତ ହୋଇଛି । ଯେଉଁଥିରେ ରହିଛି କ୍ରାସ୍ ବଫର୍ ଉପାଦାନ । ଏବେ ଦେଶରେ ବନ୍ଦେ ଭାରତର ଚେୟାର କାର୍ ଟ୍ରେନ୍ ଚଳାଚଳା କରୁଛି । ଟ୍ରେନଟି ଘଣ୍ଟା ପ୍ରତି ୧୩୦ କିମି ବେଗରେ ଗଡିବ।
ବନ୍ଦେ ଭାରତ କନସେପ୍ଟରେ ମେଟ୍ରୋ ଟ୍ରେନ୍
ସେହିଭଳି ଆଗକୁ ବନ୍ଦେ ଭାରତ ମେଟ୍ରୋ ଟ୍ରେନ ଆସୁଛି । ଏହା ଦ୍ୱାରା ବର୍ତ୍ତମାନ ପରିଚାଳିତ ଇଏମ୍ୟୁ ଟ୍ରେନ ଗୁଡିକୁ ବାଦ ଦିଆଯିବା ଯୋଜନା ରଖାଯାଇଛି । ଏହା ଦ୍ୱାରା ଯାତ୍ରୀ ଶୀଘ୍ର ଏବଂ ଆରାମ ଦାୟକ ଯାତ୍ରା କରିପାରିବେ । ଏହି ଟ୍ରେନଗୁଡିକ ଘଣ୍ଟା ପ୍ରତି ୧୩୦ କିମି ବେଗରେ ଗଡି ପାରିବ । ପ୍ରତି କୋଚ୍ ପିଛା ୧୦୦ ଯାତ୍ରୀ ଏଥିରେ ଯାତ୍ରା କରିପାରିବେ ।
