ନୂଆଦିଲ୍ଲୀ: କ୍ବାଣ୍ଟ ମ୍ୟୁଚୁଆଲ୍ ଫଣ୍ଡ (Quant Mutual Fund) ଦେଶର ବଡ଼ ମ୍ୟୁଚୁଆଲ ଫଣ୍ଡ ହାଉସ୍ ମଧ୍ୟରୁ ଅନ୍ୟତମ । ବର୍ତ୍ତମାନ ସମୟରେ ମିଳିଥିବା ଖବର ଅନୁସାରେ, ସେବାରେ ଅନିୟମିତତା ଅଭିଯୋଗରେ କ୍ବାଣ୍ଟ ମ୍ୟୁଚୁଆଲ୍ ଫଣ୍ଡ ବିରୋଧରେ ଯାଞ୍ଚ ଆରମ୍ଭ କରିଛି ସେବି (SEBI) । ସେବି ଟିମ୍ ହାଇଦ୍ରାବାଦ ଏବଂ ମୁମ୍ବାଇର କ୍ବାଣ୍ଟର କାର୍ଯ୍ୟାଳୟରେ ଚଢ଼ାଉ କରିଛି । କ୍ବାଣ୍ଟ ମ୍ୟୁଚୁଆଲ୍ ଫଣ୍ଡ ପକ୍ଷରୁ କୁହାଯାଇଛି ଯେ, ସେବି ପକ୍ଷରୁ କାର୍ଯ୍ୟାଳୟରେ ଯାଞ୍ଚ କରାଯାଉଛି ଏବଂ ଆମେ ପୂର୍ଣ୍ଣ ସହଯୋଗ କରୁଛୁ । ଫ୍ରଣ୍ଟ-ରନିଂ ଗତିବିଧିକୁ ନେଇ ସେବି କ୍ବାଣ୍ଟ ମ୍ୟୁଚୁଆଲ୍ ଫଣ୍ଡ କାର୍ଯ୍ୟାଳୟରେ ଚଢ଼ାଉ କରିଛି ବୋଲି ଖବର ଆସିବା ପରେ ସଂସ୍ଥା ପକ୍ଷରୁ ସ୍ପଷ୍ଟୀକରଣ ଦିଆଯାଇଛି ।
ଫ୍ରଣ୍ଟ ରନିଂ ଶେୟାର ବଜାର ସହ ଜଡ଼ିତ ଏକ ପ୍ରକାର ହେରଫେର । ଏଥିରେ କମ୍ପାନି ନିଜର ଗ୍ରାହକଙ୍କୁ ସୂଚନା ନଦେଇ ବ୍ରୋକର କିମ୍ବା ବିଶ୍ଲେଷକଙ୍କ ପାଖରୁ ମିଳିଥିବା ସୂଚନା ଆଧାରରେ କାରବାର କରିଥାଏ । ଫ୍ରଣ୍ଟ ରନିଂ ଟ୍ରେଡିଂର ପ୍ରଭାବ ନିବେଶକଙ୍କ ଉପରେ ମଧ୍ୟ ପଡ଼ିଥାଏ । କ୍ବାଣ୍ଟ ମ୍ୟୁଚୁଆଲ୍ ଫଣ୍ଡ ବେଆଇନ୍ ଭାବରେ ଟ୍ରେଡିଂ କରୁଥିବା ନେଇ ସେବିକୁ ସୂଚନା ମିଳିଥିଲା । ସେବି ତଦନ୍ତ ଆରମ୍ଭ କରିଥିବାରୁ ନିବେଶକଙ୍କ ମହଲରେ ଆଶଙ୍କା ବୃଦ୍ଧି ପାଇଛି ।
ନିବେଶକଙ୍କୁ କ୍ବାଣ୍ଟ ମ୍ୟୁଚୁଆଲ୍ ଫଣ୍ଡ ପକ୍ଷରୁ ଆଶ୍ବସନା ଦିଆଯାଇଛି । ସେବିକୁ ଆମେ ପୂର୍ଣ୍ଣ ସହାୟତା କରୁଛୁ । ତେଣୁ ଭୟ କରିବାର କିଛି କାରଣ ନାହିଁ ବୋଲି କମ୍ପାନି କହିଛି । ତେବେ କ୍ବାଣ୍ଟ ମ୍ୟୁଚୁଆଲ୍ ଫଣ୍ଡରେ ପ୍ରାୟ ୯୩ ହଜାର କୋଟି ଟଙ୍କା ଲଗାଇଛନ୍ତି ନିବେଶକ । ଭାରତରେ କ୍ବାଣ୍ଟ ମ୍ୟୁଚୁଆଲ ଫଣ୍ଡର ଲୋକପ୍ରିୟତା ଦ୍ରୁତ ହାରରେ ବୃଦ୍ଧି ପାଇଛି । ୨୦୨୦ରେ କମ୍ପାନିର ଆସେଟ୍ ଅଣ୍ଡର ମ୍ୟାନେଜମେଣ୍ଟ (ଏୟୁଏମ) ୨୫୮ କୋଟି ଟଙ୍କା ଥିଲା । ହେଲେ ୨୦୨୪ରେ କମ୍ପାନିର ଏୟୁଏମ ୯୩ ହଜାର କୋଟି ହୋଇଛି । ସେହିଭଳି କମ୍ପାନି ପାଖରେ ୮୦ ଲକ୍ଷ ନିବେଶକ ରହିଛନ୍ତି ।
