ଟୋକିଓ, ୨୮/୦୯: ଶିଗେରୁ ଇଶିବା ଜାପାନର  ପରବର୍ତ୍ତୀ ପ୍ରଧାନମନ୍ତ୍ରୀ ହେବେ । ଶୁକ୍ରବାର ଅନୁଷ୍ଠିତ  ଲିବେରାଲ ଡେମୋକ୍ରାଟିକ୍‌ ପାର୍ଟି (ଏଲ୍‌ଡିପି) ନିର୍ବାଚନରେ  ସେ ବିଜୟୀ ହୋଇଛନ୍ତି । ତାଙ୍କ ପ୍ରତିଦ୍ୱନ୍ଦ୍ୱୀ ସନାଏ  ଟକାଇଚି ପାର୍ଟି ସଦସ୍ୟଙ୍କ ୧୯୪ ଭୋଟ ପାଇଥିବାବେଳେ  ଶିଗେରୁଙ୍କୁ ୨୧୫ ଭୋଟ ମିଳିଛି । ଅକ୍ଟୋବର ୧ରେ ସଂସଦ ଅଧିବେଶନ ଆରମ୍ଭରେ ଶିଗେରୁ ପ୍ରଧାନମନ୍ତ୍ରୀ  ପଦ ସମ୍ଭାଳିବେ । 

ଜାପାନରେ ଶାସକ ଦଳ ପାର୍ଟି ଅଧ୍ୟକ୍ଷ  ପ୍ରଧାନମନ୍ତ୍ରୀ ହୋଇଥାନ୍ତି । ଏଲ୍‌ଡିପି ନିକଟରେ ସଂସଦର  ଉଭୟ ଗୃହରେ ବହୁମତ ରହିଛି । ତେଣୁ ଏବେ ଦଳର  ଅଧ୍ୟକ୍ଷ ନିର୍ବାଚିତ ହୋଇଥିବା ଶିଗେରୁ ୨୦୨୫ ପର୍ଯ୍ୟନ୍ତ  ପ୍ରଧାନମନ୍ତ୍ରୀ ପଦରେ ରହିବେ । ଏହା ପରେ ଦେଶରେ  ସାଧାରଣ ନିର୍ବାଚନ ହେବ । ୬୭ ବର୍ଷୀୟ ଶିଗେରୁ  ଏହା ପୂର୍ବରୁ ୪ ଥର ପାର୍ଟି ଲିଡରଶିପ୍‌ ପାଇଁ ନିର୍ବାଚନ  ଲଢ଼ିଥିଲେ । ୨୦୧୨ରେ ଶିଞ୍ଜୋ ଆବେଙ୍କ ବିରୋଧରେ ସେ  ଛିଡ଼ା ହୋଇଥିଲେ ହେଁ ପରାଜିତ ହୋଇଥିଲେ । 

ନିର୍ବାଚନ  ଜିତିବା ପରେ ଶିଗେରୁ କହିଛନ୍ତି, ଏବେ ସେ ଦଳକୁ  ନୂଆ ଭାବେ ଛିଡ଼ା କରି ଲୋକଙ୍କ ଭରସା ଜିତିବେ । ନିଜ  କାର୍ଯ୍ୟକାଳରେ ଜନତା ଓ ଦେଶ ସହ ସଚ୍ଚୋଟ ରହିବା  ସହ ଦେଶର ସୁରକ୍ଷା ଏବଂ ବିକାଶ ଦିଗରେ କାର୍ଯ୍ୟ  କରିବେ । 

ଶିଗେରୁ ଜାପାନର ପ୍ରତିରକ୍ଷା ଏବଂ କୃଷି ମନ୍ତ୍ରୀ  ରହିଥିଲେ । ସେ ୧୯୮୬ରେ ୨୯ ବର୍ଷ ବୟସରେ ପ୍ରଥମ  ନିର୍ବାଚନ ଜିତିଥିଲେ । ସେତେବେଳେ ସେ ସଂସଦର  ସର୍ବକନିଷ୍ଠ ସଦସ୍ୟ ହୋଇଥିଲେ । ଏଥର ପ୍ରଚାରରେ  ଶିଗେରୁ ଦେଶରେ ନ୍ୟୁକ୍ଲିୟର ପାୱାର ପ୍ଲାଣ୍ଟକୁ ଧୀରେ  ଧୀରେ ବନ୍ଦ କରିବା ଲାଗି ପ୍ରତିଶ୍ରୁତି ଦେଇଥିଲେ ।