ନୂଆଦିଲ୍ଲୀ: ଇସ୍ରାଏଲ୍ ସେନା ଲେବାନନର ରାଜଧାନୀ ବେରୁଟର ଦହୀହ ଅଞ୍ଚଳରେ ଏକାଧିକ ଏୟାର ଷ୍ଟ୍ରାଇକ କରିଛି । ଏହି ଆକ୍ରମଣରେ ଆତଙ୍କବାଦୀ ସଂଗଠନ ହିଜବୁଲ୍ଲାର ମିଲିଟାରି ମୁଖ୍ୟାଳୟ ଧ୍ବଂସ ହୋଇଛି । ଏୟାର ଷ୍ଟ୍ରାଇକ ସମୟରେ ମୁଖ୍ୟାଳୟରେ ହିଜବୁଲ୍ଲାର ମୁଖ୍ୟ ସାୟେଦ ହାସନ ନସରୁଲ୍ଲାହ ଥିଲା ବୋଲି ଇସ୍ରାଏଲ ସେନା ଦାବି କରିଛି । ତେବେ ଏନେଇ କିଛି ସ୍ପଷ୍ଟ ହୋଇ ନାହିଁ ।  

ଆଇଡିଏଫ୍ ମୁଖପାତ୍ର ରିୟର ଆଡମିରାଲ ଡାନିଏଲ ହଗାରୀ କହିଛନ୍ତି ଯେ, ଇସ୍ରାଏଲର ବାୟୁସେନା ଲେବାନନରେ ହିଜବୁଲ୍ଲାର ମୁଖ୍ୟାଳୟ ଉପରେ ଆକ୍ରମଣ କରିଛି । ଏହି ବିଲ୍ଡିଂ ଦହୀହ ଉପନଗରରେ ଆବାସିକ ବିଲ୍ଡିଂ ତଳେ ନିର୍ମାଣ କରାଯାଇଥିଲା । ଏହାକୁ ବେରୁଟରେ ହିଜବୁଲ୍ଲାର ମୁଖ୍ୟାଳୟ ବୋଲି କୁହାଯାଉଥିଲା । ତେବେ ଏହି ଆକ୍ରମଣରେ ହିଜବୁଲ୍ଲା ମୁଖ୍ୟ ହାସନ ନସରୁଲ୍ଲାହକୁ ଟାର୍ଗେଟ୍ କରାଯାଇଥିଲା ନାଁ ନାହିଁ ଏବଂ ସେ ଘଟଣାସ୍ଥଳରେ ଉପସ୍ଥିତ ଥିଲା କି ନାହିଁ ତାହା ସେ ସ୍ପଷ୍ଟ କରିନାହାନ୍ତି ।

ହିଜବୁଲ୍ଲାର ଅଲ-ମନାର ଟିଭି ରିପୋର୍ଟ ଅନୁସାରେ, ବିସ୍ଫୋରଣରେ ୪ଟି ବିଲ୍ଡିଂ ଧ୍ୱଂସ ହୋଇଛି । ବିସ୍ଫୋରଣ ଏତେ ଶକ୍ତିଶାଳୀ ଥିଲା ଯେ ବେରୁଟରୁ ପ୍ରାୟ ୩୦ କିଲୋମିଟର ଉତ୍ତରରେ ଘର ଥରି ଉଠିଥିଲା । ବିସ୍ଫୋରଣ ସ୍ଥଳ ଆଡ଼କୁ ଆମ୍ୱୁଲାନ୍ସ ପଠାଯାଇଛି ଏବଂ ବହୁ ସଂଖ୍ୟାରେ ଲୋକେ ଆହତ ହୋଇଥିବା କୁହାଯାଉଛି । ସବୁଠୁ ବଡ଼ କଥା ହେଉଛି, ଆଜି ଜାତିସଂଘକୁ ଇସ୍ରାଏଲର ପ୍ରଧାନମନ୍ତ୍ରୀ ବେଞ୍ଜାବିନ ନେତାନ୍ୟାହୁ ସମ୍ବୋଧନ କରିବା ପରେ ଦହୀହରେ ଏହି ଆକ୍ରମଣ କରିଛି ଇସ୍ରାଏଲ ସେନା । 

 ନେତାନ୍ୟାହୁ ନିଜ ଭାଷଣରେ କହିଥିଲେ ଯେ, ହିଜବୁଲ୍ଲା ବିରୋଧରେ ଇସ୍ରାଏଲର ଅଭିଯାନ ଜାରି ରହିବ । ସୂଚନା ଅନୁସାରେ, ବିସ୍ଫୋରଣ ହେବାର କିଛି ସମୟ ପୂର୍ବରୁ ସେଠାରେ ଏୟାର ଷ୍ଟ୍ରାଇକରେ ମୃତ ବରିଷ୍ଠ କମାଣ୍ଡର ସମେତ ତିନି ସଦସ୍ୟଙ୍କ ଅନ୍ତିମ ସଂସ୍କାର ପାଇଁ ଏକାଠି ହୋଇଥିଲେ ହିଜବୁଲ୍ଲାର ସଦସ୍ୟ ।