ଭୁବନେଶ୍ୱର, ୨୮/୦୯: ସଦସ୍ୟତା ଅଭିଯାନ ଆଳରେ ବିଜେପି ରାଜ୍ୟର ବିଭିନ୍ନ ସ୍ଥାନରେ ବୈଠକ ପରେ ବୈଠକ କରୁଛି । ବିଭିନ୍ନ ସଭାକୁ ନିଜେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ସମେତ ଅନ୍ୟ ମନ୍ତ୍ରୀ ଯାଇ ଉଦ୍ବୋଧନ ଦେଉଛନ୍ତି । ବିଜେପି ସଭାପତି ମନମୋହନ ସାମଲଙ୍କ ସହିତ ଦଳର ଅନ୍ୟ ପଦାଧିକାରୀ ଯାଇ ବୈଠକ କରୁଛନ୍ତି । ବିଜେଡି ମଧ୍ୟ ଆସନ୍ତା ଅକ୍ଟୋବର ୨ରୁ ସଦସ୍ୟତା ଅଭିଯାନ ଆରମ୍ଭ କରିବ । ରାଜ୍ୟବ୍ୟାପୀ କାର୍ଯ୍ୟକ୍ରମ ପରେ କାର୍ଯ୍ୟକ୍ରମ କରିବ । ହେଲେ ମନ୍ଥର ଗତିରେ ଚାଲିଛି ରାଜ୍ୟ କଂଗ୍ରେସ । ୬୭ ଦିନ ହେବ ପିସିସି କମିଟି ଭଙ୍ଗ ହେବା ପରଠୁ କାଁ ଭାଁ କିଛି କାର୍ଯ୍ୟକ୍ରମ ହେଉଛି । ନଚେତ କେବଳ ସାମ୍ବାଦିକ ସମ୍ମିଳନୀରେ ସୀମିତ ରହିଯାଇଛି ଦଳ।
ରାଜ୍ୟର ବିଭିନ୍ନ ବଡ଼ ପ୍ରସଙ୍ଗରେ କଂଗ୍ରେସ ଯେମିତି ଆଗଭର ହେବା କଥା, ତାହା ଦେଖିବାକୁ ମିଳୁନି ବୋଲି ବହୁ କଂଗ୍ରେସ ନେତା କ୍ଷୋଭ ପ୍ରକାଶ କରି କହିଛନ୍ତି । ଏପରିକି ଏ ପ୍ରସଙ୍ଗରେ ଏଆଇସିସି ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେଙ୍କୁ ଚିଠି ଲେଖିଛନ୍ତି ପୂର୍ବତନ ମନ୍ତ୍ରୀ ତଥା ବରିଷ୍ଠ କଂଗ୍ରେସ ନେତା ଜଗନ୍ନାଥ ପଟ୍ଟନାୟକ । ଶ୍ରୀ ପଟ୍ଟନାୟକ ଉଲ୍ଲେଖ କରିଛନ୍ତି, ଓଡ଼ିଶାରେ ସୁଯୋଗ ଥାଇ କଂଗ୍ରେସ ଲାଭ ନେଇପାରିଲାନି । ଏହାର ତର୍ଜମା ହେଉ । ଫ୍ୟାକ୍ଟ ଫାଇଣ୍ଡିଂ କମିଟି ଗଠନ ହେଉ ବୋଲି ସେ ପରାମର୍ଶ ଦେଇଛନ୍ତି ।
ଶ୍ରୀ ପଟ୍ଟନାୟକ କହିଛନ୍ତି, ଦେଶରେ ମୋଦି ସରକାରଙ୍କ ବିରୋଧରେ ଜନଅସନ୍ତୋଷ ବଢ଼ିବା ସହ ରାହୁଲ ଗାନ୍ଧିଙ୍କ ଲୋକପ୍ରିୟତା ବଢ଼ୁଛି । ଓଡ଼ିଶାରେ ମଧ୍ୟ ଅନୁରୁପ ସ୍ଥିତି ରହିଥିଲା । ନବଗଠିତ ବିଜେପି ସରକାରଙ୍କ ନିକଟରେ ରାଜ୍ୟ ଚଳାଇବା ବାବଦରେ ସ୍ପଷ୍ଟ ଯୋଜନା କିମ୍ବା ନୀତି ନାହିଁ । ଯାହା ପ୍ରତିଶ୍ରୁତି ଦେଇଥିଲେ ତାହା ଜୁମ୍ଲାରେ ପରିଣତ ହେବାକୁଯାଉଛି । ବିଜେଡି ମଧ୍ୟ ଲୋକଙ୍କ ଆସ୍ଥା ହରାଇବାରେ ଲାଗିଛି । ଏଭଳି ସ୍ଥିତିରେ ଲୋକମାନେ ଓଡ଼ିଶାରେ କଂଗ୍ରେସକୁ ବିକଳ୍ପ ଭାବେ ବିଚାର କରୁଛନ୍ତି । ଗତ ନିର୍ବାଚନରେ ଏହାର ଫଳ ମିଳିବା କଥା । ମାତ୍ର କଂଗ୍ରେସର ସ୍ଥିତି ଶୋଚନୀୟ ହେଲା । ଭୋଟ୍ ପ୍ରତିଶତ ମଧ୍ୟ କମିଲା । ଯାହାର ସମୀକ୍ଷା ହେବା ଜରୁରୀ । ଏ ନେଇ ଏକ ଫ୍ୟାକ୍ଟ ଫାଇଣ୍ଡିଂ କମିଟି ଗଠନ ହେଉ । ଯେତେ ଶୀଘ୍ର ସମ୍ଭବ ପିସିସି କମିଟି ଗଠନ ହେଉ ବୋଲି ଶ୍ରୀ ପଟ୍ଟନାୟକ ଏଆଇସିସି ଅଧ୍ୟକ୍ଷ ଶ୍ରୀ ଖଡ଼ଗେଙ୍କୁ ଅନୁରୋଧ କରିଛନ୍ତି।
