ଭୁବନେଶ୍ୱର, ୨୧/୧୨: ସୁଭଦ୍ରାକୁ ନେଇ ଆସିଲା ବଡ଼ ଅପ୍ଡେଟ୍ । ଆସନ୍ତା ଜାନୁଆରୀରେ ୨୦ ଲକ୍ଷରୁ ଅଧିକ ହିତାଧିକାରୀଙ୍କ ଆକାଉଣ୍ଟକୁ ଯିବ ଟଙ୍କା । ପ୍ରଥମ ପର୍ଯ୍ୟାୟର ଚତୁର୍ଥ କିସ୍ତି ଟଙ୍କା ପାଇବେ ବଣ୍ଡା ହିତାଧିକାରୀ । ଏନେଇ ଘୋଷଣା କଲେ ଉପମୁଖ୍ୟମନ୍ତ୍ରୀ ପ୍ରଭାତି ପରିଡ଼ା । ତେବେ ବର୍ତ୍ତମାନ ପର୍ଯ୍ୟନ୍ତ ପ୍ରଥମ ପର୍ଯ୍ୟାୟର ତିନୋଟି କିସ୍ତିରେ ୮୦ ଲକ୍ଷ ମହିଳା ସୁଭଦ୍ରା ଯୋଜନାରେ ଉପକୃତ ହୋଇଛନ୍ତି । ଆଗକୁ ଚତୁର୍ଥ ପର୍ଯ୍ୟାୟରେ ମୋଟ ୨୦ ଲକ୍ଷ ଆବେଦନକାରୀଙ୍କ ଆକାଉଣ୍ଟକୁ ଟଙ୍କା ପଠାଯିବାକୁ ଲକ୍ଷ ରଖାଯାଇଛି । ଏଥି ପାଇଁ ସମସ୍ତ ପ୍ରସ୍ତୁତି ଚାଲିଛି । ଜମିକୁ ନେଇ କାଗଜପତ୍ର ଯାଞ୍ଚ ପରେ ସମସ୍ତ ଯୋଗ୍ୟ ହିତାଧିକାରୀ ଏହି ଯୋଜନାର ଲାଭ ଉଠାଇ ପାରିବେ ।
ବଣ୍ଡାଘାଟିର ସମସ୍ତ ହିତାଧିକାରୀଙ୍କୁ ମିଳିବ ସୁଭଦ୍ରା ସହାୟତା । କେହି ଜଣେ ହେଲେ ମହିଳା ଏଥିରୁ ବଞ୍ଚିତ ହେବେ ନାହିଁ । ବଣ୍ଡା ଘାଟିରେ ୧୨ ହଜାରରୁ ଉର୍ଦ୍ଧ୍ୱ ମହିଳା ସୁଭଦ୍ରା ଯୋଜନା ପାଇଁ ଆବେଦନ କରିଥିବା ବେଳେ ଏପର୍ଯ୍ୟନ୍ତ ୯୦୦୦ ମହିଳା ଟଙ୍କା ପାଇଛନ୍ତି । ବଳକା ୩୦୦୦ ମହିଳା ଏପର୍ଯ୍ୟନ୍ତ ଟଙ୍କା ପାଇ ନାହାନ୍ତି । ସେମାନଙ୍କର ସମସ୍ତ କାଗଜପତ୍ର ଯାଞ୍ଚ କରାଯିବା ପରେ ଟଙ୍କା ଆକାଉଣ୍ଟକୁ ପଠାଯିବ । ପ୍ରଧାନମନ୍ତ୍ରୀ ଆବାସ ଯୋଜନାରେ ବଣ୍ଡା ଜନଜାତିଙ୍କୁ ଅଧିକ ୫୦ ହଜାର ଟଙ୍କା ଦିଆଯିବ । ଏଥିସହ ଆମାକୁଣ୍ଡ ଏବଂ ସୀତାକୁଣ୍ଡର ସାମଗ୍ରିକ ବିକାଶ କରାଯିବ । ଶୁକ୍ରବାର ଖଇରପୁଟ ବ୍ଲକର ମୁଦୁଲିପଡ଼ା ବଣ୍ଡାଘାଟି ଗସ୍ତ ଅବସରରେ ଏହି ଘୋଷଣା କରିଛନ୍ତି ଉପମୁଖ୍ୟମନ୍ତ୍ରୀ ପ୍ରଭାତୀ ପରିଡ଼ା ।
କୋହଲା ପାଗ ଏବଂ ବର୍ଷା ଯୋଗୁଁ ହେଲିକପ୍ଟର ଆସିପାରି ନଥିଲା । ଶେଷରେ ଜୟପୁରରୁ ବଣ୍ଡାଘାଟିକୁ କାର୍ରେ ଯାଇଥିଲେ ଉପମୁଖ୍ୟମନ୍ତ୍ରୀ । ସେଠାରେ ସୀତାକୁଣ୍ଡ, ବିଭିନ୍ନ ପର୍ଯ୍ୟଟନସ୍ଥଳୀ, ସ୍କୁଲ, ବଣ୍ଡାଗାଁ ପରିଦର୍ଶନ ସହ ମହିଳାମାନଙ୍କୁ ସମସ୍ୟା ପଚାରି ବୁଝିଥିଲେ । ଘାଟିର ବିକାଶ ସହ ବଣ୍ଡା ଜନଜାତିଙ୍କ ଉନ୍ନତି ଦିଗରେ ଅଧିକ ଗୁରୁତ୍ୱ ଦେବାକୁ ପ୍ରତିଶ୍ରୁତି ଦେଇଥିଲେ । ଏହି ଅବସରରେ ବଣ୍ଡା ମହିଳାମାନେ ତାଙ୍କୁ ପାରମ୍ପରିକ ବେଶଭୂଷାରେ ସଜ୍ଜିତ ହୋଇ ନୃତ୍ୟଗୀତର ତାଳେ ତାଳେ ସୀତାକୁଣ୍ଡ ନିକଟକୁ ପାଛୋଟି ନେଇଥିଲେ । ଶ୍ରୀମତୀ ପରିଡ଼ା କହିଥିଲେ, ସୁଭଦ୍ରା ଯୋଜନାରେ ୩ଟି ପର୍ଯ୍ୟାୟରେ ଟଙ୍କା ଛଡ଼ା ଯାଇଥିଲେ ବି ଏଥିରୁ ବଞ୍ଚିତ ବଣ୍ଡା ମହିଳାଙ୍କୁ ଚତୁର୍ଥ ପର୍ଯ୍ୟାୟରେ ନିଶ୍ଚୟ ମିଳିବ । ଏହି ଅବସରରେ ସେ ବଣ୍ଡା ଜନଜାତିଙ୍କୁ ବ୍ୟକ୍ତିଗତ ଏବଂ ଗୋଷ୍ଠୀଗତ ଜଙ୍ଗଲ ଜମି ପଟ୍ଟା ବଣ୍ଟନ କରିଥିଲେ । ଘାଟି ସମସ୍ୟା ବିଷୟରେ ପଚାରି ବୁଝିଥିଲେ । ପାନୀୟଜଳ, ରାସ୍ତାଘାଟ ଅବ୍ୟବସ୍ଥା ନେଇ ଉଦ୍ବେଗ ପ୍ରକାଶ କରିଥିଲେ । ପରେ ଘାଟି ନିକଟ ପ୍ରସିଦ୍ଧ ସୀତାକୁଣ୍ଡ ପରିଦର୍ଶନ ସହ ସେଠାରେ ଥିବା ରାମମନ୍ଦିରରେ ପୂଜାର୍ଚ୍ଚନା କରିଥିଲେ । ଆମାକୁଣ୍ଡ ସହ ସୀତାକୁଣ୍ଡର ସାମଗ୍ରୀକ ବିକାଶର ବୋଲି ପ୍ରତିଶ୍ରୁତି ଦେଇଥିଲେ ।
