ବ୍ରହ୍ମପୁର, ୨୦/୧୨ :  ଜବରଦଖଲ ଉଚ୍ଛେଦକୁ ନେଇ କମିଶନର - ବହୁ କର୍ପୋରେଟର ମୁହାଁମୁହିଁ ହୋଇଥିବା ଦେଖିବାକୁ ମିଳିଥିଲା । କମିଶନର ଗୋ-ବ୍ୟାକ ନାରାରେ କମ୍ପି ଉଠିଥିଲା ପଞ୍ଚାନନ ନଗର ବସ୍ତି । ୧୭ନଂ ୱାର୍ଡ ଅନ୍ତର୍ଗତ ଗେଟ ବଜାରସ୍ଥିତ ପଞ୍ଚାନନ ନଗର ବସ୍ତିରେ ଆଜି ବ୍ରହ୍ମପୁର ମହାନଗର ନିଗମ ପକ୍ଷରୁ ଜବରଦଖଲ ଉଚ୍ଛେଦ କରିବା ପୂର୍ବରୁ ଉତ୍ତେଜନା ଦେଖିବାକୁ ମିଳିଥିଲା । ଗୃହ ନିର୍ମାଣ କରିଥିବା ଟିକି ପାତ୍ର ନାମକ ଜଣେ ମହିଳାଙ୍କୁ ଦୁଇ ଦିନ ପୂର୍ବେ ନିଗମ ପକ୍ଷରୁ ନୋଟିସ ହୋଇଥିଲା । ଆଜି ସକାଳୁ ଏଯାବତ ଝିପି ଝିପି ବର୍ଷା ସତ୍ୱେ ବିଇଏମସିର ଏକ ଟିମ୍ ଉଚ୍ଛେଦ କରିବାକୁ ଆସିଥିଲେ ।

ଦୀର୍ଘ ସମୟ ଧରି ସ୍ଥାନୀୟ ଲୋକେ, ସ୍ଥାନୀୟ କର୍ପୋରଟେର ଦୁର୍ଗା କୁମାର ଲାୟକଙ୍କ ସମେତ ୧୨ରୁ ଅଧିକ କର୍ପୋରେଟର ଘଟଣାସ୍ଥଳରେ ପହଞ୍ଚି ଜବରଦଖଲ ଉଚ୍ଛେଦକୁ ପ୍ରତିବାଦ କରିଥିଲେ । ଏପରି କି କମିଶନର ଓ କିଛି କର୍ପୋରେଟର ମୁହାଁମୁହିଁ ମଧ୍ୟ ହୋଇଥିଲେ । ତା’ପରେ କମିଶନର ଗୋ-ବ୍ୟାକ (Go-back )ନାରାରେ ଉକ୍ତ ବସ୍ତି ସମେତ ସ୍ଥାନୀୟ ଅଞ୍ଚଳ କମ୍ପି ଉଠିଥିଲା । ଉତ୍ତେଜନାକୁ ଦୃଷ୍ଚିରେ ରଖି ବ୍ୟାପକ ପୁଲିସ ଫୋର୍ସ ମଧ୍ୟ ମୁତ୍ତୟନ କରାଯାଇଥିଲା  । ଉତ୍ତେଜନା ପରିସ୍ଥିତି ନିୟନ୍ତ୍ରଣ ବାହାରକୁ ଯିବା ପୂର୍ବରୁ ଜବରଦଖଲ ଉଚ୍ଛେଦ ପ୍ରକ୍ରିୟାରୁ ବିଇଏମସି ଓହରିଥିଲା । ବର୍ଷା ଯୋଗୁଁ ଉଛେଦ ପ୍ରକ୍ରିୟା ବନ୍ଦ କରାଯାଇଥିବା ମହାନଗର ନିଗମ ପକ୍ଷରୁ କୁହାଯାଇଛି ।