ନୂଆପଡ଼ା, ୨୧/୧୨: ଖାକିରେ କଳଙ୍କ । ଜଣେ ନର୍ସଙ୍କୁ ବିବାହ ପ୍ରତିଶ୍ରୁତି ଦେଇ ଶାରୀରିକ ସମ୍ପର୍କ ସ୍ଥାପନ ପରେ ପ୍ରତାରଣା କରିଥିବା ଅଭିଯୋଗରେ ନୂଆପଡ଼ା ପୁଲିସ୍ ଶୁକ୍ରବାର ଜଣେ କନଷ୍ଟେବଲ୍ଙ୍କୁ ଗିରଫ କରିଛି । ଗିରଫ ଅଭିଯୁକ୍ତ ହେଲେ ଜୋଙ୍କ ଥାନାରେ କାର୍ଯ୍ୟରତ କନଷ୍ଟେବଲ୍ ଧନଞ୍ଜୟ ସୁନା ।
ଅଭିଯୋଗ ଅନୁଯାୟୀ, ଦୁଇବର୍ଷ ତଳେ ଧନଞ୍ଜୟଙ୍କ ସହ ନୂଆପଡ଼ା ଅଞ୍ଚଳର ଏକ ଘରୋଇ ନର୍ସିଂହୋମ୍ରେ କାର୍ଯ୍ୟରତ ଜଣେ ଯୁବତୀ (ନର୍ସିଂ କର୍ମଚାରୀ)ଙ୍କ ସହ ପ୍ରେମ ସମ୍ପର୍କ ଗଢ଼ି ଉଠିଥିଲା । ବିବାହ ପ୍ରତିଶ୍ରୁତି ଦେଇ ସେ ଶାରୀରିକ ସମ୍ପର୍କ ସ୍ଥାପନ କରିଥିଲେ । ତେବେ ଧନଞ୍ଜୟଙ୍କ ବିବାହ ଅନ୍ୟତ୍ର ସ୍ଥିର ହୋଇଥିବା ଜାଣିବା ପରେ ପୀଡ଼ିତା ଯୁବତୀ ନୂଆପଡ଼ା ଥାନାର ଦ୍ୱାରସ୍ଥ ହୋଇ ବଳାତ୍କାର ଅଭିଯୋଗ ଆଣିଥିଲେ । ପୁଲିସ୍ ତଦନ୍ତ କରି ଧନଞ୍ଜୟଙ୍କୁ ଗିରଫ କରି କୋର୍ଟଚାଲାଣ କରିଥିଲା । ଜାମିନ ନାମଞ୍ଜୁର ହେବାରୁ ତାଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଥିବା ଥାନାଧିକାରୀ ଗଙ୍ଗାଧର ମେହେର ସୂଚନା ଦେଇଛନ୍ତି।
