ଜୟପୁର: ରାଜସ୍ଥାନ ମୁଖ୍ୟମନ୍ତ୍ରୀ ଭଜନଲାଲ ଶର୍ମାଙ୍କୁ ଶୁକ୍ରବାର ପୁଣି ଥରେ ହତ୍ୟା ଧମକ ମିଳିଛି । ଏହି ଧମକ ବିକାନେର କେନ୍ଦ୍ରୀୟ କାରାଗାରରେ ବନ୍ଦୀ ଆଦିଲ ନାମକ ଜଣେ କଏଦୀ ଦେଇଛି । ପୋଲିସ ଅଭିଯୁକ୍ତକୁ ହେପାଜତକୁ ନେଇଛି । ମୁଖ୍ୟମନ୍ତ୍ରୀଙ୍କୁ ଚତୁର୍ଥ ଥର ପାଇଁ ହତ୍ୟା ଧମକ ଦିଆଯାଇଛି ।
ଏସପି କବିନ୍ଦର ସିଂହ ସାଗର କହିଛନ୍ତି ଯେ, ଅଭିଯୁକ୍ତ ଜଣକ ବିକାନେର କେନ୍ଦ୍ରୀୟ କାରାଗାରରୁ ଫୋନ୍ କରି ମୁଖ୍ୟମନ୍ତ୍ରୀଙ୍କୁ ହତ୍ୟା ଧମକ ଦେବ ବୋଲି ଦାବି କରିଥିଲା। ଏହା ପରେ, ପୋଲିସ ତୁରନ୍ତ ବିକାନେର କେନ୍ଦ୍ରୀୟ କାରାଗାରରେ ପହଞ୍ଚି ଆଦିଲକୁ ହେପାଜତକୁ ନେଇଥିଲା।
ଆଦିଲର ଉଦ୍ଦେଶ୍ୟ ଏବଂ ସେ କିପରି ଫୋନ୍ ପାଇଲା ତାହା ତଦନ୍ତ କରାଯାଉଛି ବୋଲି ଏସପି କହିଛନ୍ତି। ସେ କହିଛନ୍ତି ଯେ, ଆଦିଲ ଜଣେ ନିଶାଡ଼ି ଏବଂ ତାର ମାନସିକ ସ୍ୱାସ୍ଥ୍ୟ ସମସ୍ୟା ରହିଛି । ସେ ପୂର୍ବରୁ ମଧ୍ୟ ନିଜ ହାତ କାଟି ସାରିଛି । ତା ନିକଟରୁ ଏକ ମୋବାଇଲ୍ ଫୋନ୍ ଉଦ୍ଧାର କରାଯାଇଛି। ବୁଧବାର ଦିନ, ଉପମୁଖ୍ୟମନ୍ତ୍ରୀ ପ୍ରେମ ଚାନ୍ଦ ବୈରୱାଙ୍କୁ ମଧ୍ୟ ଜୟପୁର କେନ୍ଦ୍ରୀୟ କାରାଗାରର ଜଣେ କଏଦୀ ହତ୍ୟା ଧମକ ଦେଇଥିଲା । ପରଦିନ ପୋଲିସ ତିନିଜଣଙ୍କୁ ଅଟକ ରଖିଥିଲା।
ମୁଖ୍ୟମନ୍ତ୍ରୀ ଭଜନଲାଲ ଶର୍ମା ପୂର୍ବରୁ ଦୌସା କେନ୍ଦ୍ରୀୟ କାରାଗାରରୁ ଦୁଇଥର ଧମକ ପାଇସାରିଛନ୍ତି। ଭିଭିଆଇପିମାନଙ୍କୁ ବାରମ୍ବାର ଧମକ ମିଳୁଥିବାରୁ ପୋଲିସ ବିଭାଗ ଚିନ୍ତାରେ ପଡ଼ିଯାଇଛି । ଉପମୁଖ୍ୟମନ୍ତ୍ରୀଙ୍କୁ ଧମକ ଦେବାର ଗୋଟିଏ ଦିନ ପୂର୍ବରୁ, ଡିଜିପି ନିଜେ ସ୍ୱୀକାର କରିଥିଲେ ଯେ, ବ୍ୟବସ୍ଥାରେ ତ୍ରୁଟି ଅଛି।
ଜେଲ୍ ଅଧୀକ୍ଷକ ସୁମନ ମାଲିୱାଲ କହିଛନ୍ତି ଯେ, କିଛି ଦିନ ପୂର୍ବରୁ ଆଦିଲକୁ ପାଲିରୁ ବିକାନେର କେନ୍ଦ୍ରୀୟ ଜେଲକୁ ସ୍ଥାନାନ୍ତର କରାଯାଇଥିଲା। ତାର ମାନସିକ ଅବସ୍ଥା ଭଲ ନାହିଁ। ସେ ପୂର୍ବରୁ ଜେଲରେ ନିଜର ହାତ କାଟିବାକୁ ମଧ୍ୟ ଚେଷ୍ଟା କରିଥିଲା । ପୋଲିସ ଅଭିଯୁକ୍ତକୁ ପଚରାଉଚରା କରୁଛି ।
