ଭୁବନେଶ୍ୱର,୨୬/୦୩ : ଆନ୍ଧ୍ରପ୍ରଦେଶ ପୁଅକୁ ଓଡ଼ିଶା ଝିଅ ଠକିବା ଘଟଣାରେ ନୂଆ ମୋଡ଼। ଝିଅ ଘର ଲୋକ ଆଣିଲେ ସାଙ୍ଘାତିକ ଅଭିଯୋଗ। ସେମାନେ କହିଛନ୍ତି ଯେ, ଝିଅକୁ ଯାହା ଟଙ୍କା ଓ ସୁନା ଅଳଙ୍କାର ଦିଆଯାଇଥିଲା, ସେସବୁ ଫେରାଇ ଦେଇଛୁ । କିନ୍ତୁ ପୁଅ ଘର ଲୋକ ଆମ ଝିଅକୁ ଜବରଦସ୍ତି ଅପରହଣ କରି ନେବାକୁ ଉଦ୍ୟମ କରିଛନ୍ତି । ନୂଆପଲ୍ଲୀ ଥାନା ପୁଲିସ ଉଭୟ ପକ୍ଷ ଅଭିଯୋଗକ୍ରମେ ତଦନ୍ତ ଚଳାଇଛି ।
ଝିଅର ମାଆ ଅଭିଯୋଗ ଆଣିଛନ୍ତି ଯେ, ଏମ୍. ବି. ଶଙ୍କର (୩୭ ବର୍ଷ)ର ପ୍ରସ୍ତାବ ଆସିଥିଲା ସତ । କିନ୍ତୁ ସେ ଏକ ବଡ଼ ସଂସ୍ଥାରେ ଉଚ୍ଚପଦସ୍ଥ ଅଧିକାରୀ ଅଛି ବୋଲି ଆମକୁ କହିଥିଲା । ଏମିତିକି ଆନ୍ଧ୍ରପ୍ରଦେଶ ଇଚ୍ଛାପୁରରେ ବହୁମାତ୍ରାରେ ସମ୍ପତ୍ତି ଥିବା ଦର୍ଶାଇଥିଲା । ଯାହାକି ପୁରା ମିଛ ବୋଲି ଆମେ ଜାଣିବାକୁ ପାଇଲୁ । ପୁଅ ଘର ପକ୍ଷରୁ ଯାହା ସବୁ ସୁନା ଅଳଙ୍କାର, ପିତଳ ବାସନ ଦେଇଥିଲେ, ସେସବୁକୁ ଫେରାଇ ଦେଇଛୁ । କିନ୍ତୁ ସେମାନେ ରେଣ୍ଟାଲ କଲୋନିସ୍ଥିତ ଘରେ ଗତ ରବିବାର ମୋ ଝିଅକୁ ଟଣାଓଟରା କରି କାରରେ ଅପହରଣ କରି ନେବାକୁ ଉଦ୍ୟମ କରୁଥିଲେ । ସ୍ଥାନୀୟ ଲୋକଙ୍କ ହସ୍ତକ୍ଷେପ ପରେ ତାକୁ ଉଦ୍ଧାର କରାଯାଇଛି ।
ଅନ୍ୟପଟେ ଶଙ୍କର ଅଭିଯୋଗକ୍ରମେ ପୁଲିସ୍ ଏକ ମାମଲା ରୁଜୁ କରିଛି । ସମ୍ପୃକ୍ତ ଝିଅର ପରିବାର ଲୋକଙ୍କୁ ଡାକି ଥାନାରେ ପଚରାଉଚରା ଚଳାଇଛି । ସମ୍ପୃକ୍ତ ଝିଅ ପୂର୍ବରୁ ବିବାହ କରିଥିବା ନେଇ ପୁଲିସ ତଦନ୍ତରୁ ଜାଣିବାକୁ ପାଇଛି । ତଥାପି ତାଙ୍କ ପରିବାର ଲୋକ ତରବରିଆ ଭାବେ ଝିଅର ଦ୍ୱିତୀୟ ବିବାହ କରିବା ପାଇଁ ଚେଷ୍ଟା ଚଳାଇଥିଲେ । ଏନେଇ ଆଗକୁ କାର୍ଯ୍ୟାନୁଷ୍ଠାନ ନିଆଯିବ ବୋଲି ପୁଲିସ କହିଛି ।
ଏହି ଖବରଟିକୁ ପଢନ୍ତୁ-ବିବାହ ପ୍ରଲୋଭନ ଦେଖାଇ ଆନ୍ଧ୍ର ପୁଅକୁ ଓଡ଼ିଶା ଡାକିଲେ, ଲକ୍ଷାଧିକ ଟଙ୍କା ଓ ସୁନା ନେଇ ଶିଶୁପାଳ କରି ଛାଡ଼ିଲେ
