ଚନ୍ଦାହାଣ୍ଡି,୨୦/୧୨ :  ନବରଙ୍ଗପୁର ଜିଲ୍ଲା ଚନ୍ଦାହାଣ୍ଡି ଥାନା ଅଧିନ ଧୂରୁଆପଡା ମେଡିକାଲ ସମ୍ମୁଖ ଏକ ବିଲରେ ଥିବା ପରିତକ୍ତ କୂଅରୁ ଜନୈକ ଯୁବକର ମୃତଦେହ ଉଦ୍ଧାର l ମୃତ ଯୁବକ ଜଣଙ୍କ ହେଉଛନ୍ତି ଧୂରୁଆପଡା ଗ୍ରାମର ରଘୁନାଥ ମାଝିଙ୍କ ପୁଅ ତିଳଚନ ମାଝି(୩୪) ବୋଲି ଚନ୍ଦାହାଣ୍ଡି ଥାନା ଅଧିକାରୀ ପ୍ରଶାନ୍ତ କୁମାର କୋଲର୍ସ ଗଣମାଧ୍ୟମକୁ ପ୍ରକାଶ କରିଛନ୍ତି l ଏ ନେଇ ଚନ୍ଦାହାଣ୍ଡି ଥାନା କେସ ନଂ ୧୦/୨୪ ଅନୁସାରେ ଏକ ଅପମୃତ୍ୟୁ ମାମଲା ରୁଜ୍ଜୁ କରିଛି l  ଏହାର ତଦନ୍ତ ଭାର ଏଏସଆଇ ଲାବଣ୍ୟ ବେମାଲଙ୍କୁ ହସ୍ତାନ୍ତର କରାଯାଇଥିବା ନେଇ ଆଇଆଇସି କୋଲର୍ସ ସୂଚନା ଦେଇଛନ୍ତି l 

ପୋଲିସ ସୂତ୍ର ଅନୁସାରେ ଧୂରୁଆପଡା ଗ୍ରାମର ତିଳକଚନ ମାଝି ଗତ ବୁଧବାର ପରିବାର ଲୋକଙ୍କ ସହ ରାତିରେ ଖାଇ ସାରି ହଠାତ ଘରୁ କୁଆଡ଼େ ଚାଲି ଯାଇଥିଲେ l ପରିବାର ଲୋକେ ବିଭିନ୍ନ ସ୍ଥାନରେ ଖୋଜାଖୋଜି କରି ନିରାଶ ହୋଇ ତିଳଚନର ନିଖୋଜ ରିପୋର୍ଟ ଆଜି ଚନ୍ଦାହାଣ୍ଡି ଥାନାରେ ଦେଇଥିଲେ l  ଧୂରୁଆପଡା ମେଡିକାଲ ସମ୍ମୁଖରେ ଏକ ବିଲର ପରିତ୍ୟକ୍ତ କୂଅରେ ତିଳଚନର ମୃତଦେହ ଭାସୁଥିବା ଦେଖି ଲୋକେ ପରିବାରକୁ ଖବରଦେବା ସହ ପୋଲିସକୁ ଜଣାଇଥିଲେ । ମୃତକର ସାନ ଭାଇ ଭଜନ ମାଝି ଥାନାରେ ଏତଲା ଦେବା ପରେ ଥାନା ଅଧିକାରୀଙ୍କ ନିର୍ଦେଶ କ୍ରମେ ଏଏସଆଇ ଲାବଣ୍ୟ ବେମାଲ ଘଟଣାସ୍ଥଳକୁ ଯାଇ ଦମକଳ ବାହିନୀ ସହାୟତାରେ କୂଅରୁ ମୃତଦେହ ଉଦ୍ଧାର କରି ଚନ୍ଦାହାଣ୍ଡି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ପଠାଇ ଦେଇଥିଲେ l 

ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିବା ସହ ଘଟଣାର ତଦନ୍ତ ଜାରି ରଖିଛନ୍ତି l ନିକଟସ୍ଥ ପୋଖରୀକୁ ଶୌଚ ହେବାକୁ ଆସିଥିବା ସମୟରେ ଅସାବଧାନତା ଯୋଗୁଁ କୂଅରେ ପଡିଯାଇଥିବା ପୋଲିସ ଅନୁମାନ କରୁଛି l