ନୂଆଦିଲ୍ଲୀ: ଉତ୍ତର ପ୍ରଦେଶର ସମ୍ଭଲ ଜିଲ୍ଲାରୁ ଏକ ବଡ଼ ଖବର ଏବେ ସାମ୍ନାକୁ ଆସିଛି। ସମ୍ଭଲର ଗନୌର ଅଞ୍ଚଳର ଜଣେ ପ୍ରମୁଖ ବିଜେପି ନେତା ଗୁଲଫାମ ସିଂହ ଯାଦବଙ୍କର ସନ୍ଦେହଜନକ ପରିସ୍ଥିତିରେ ମୃତ୍ୟୁ ଘଟିଛି। ତାଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଛି। ତାଙ୍କୁ ବିଷାକ୍ତ ଇଞ୍ଜେକ୍ସନ ଦେଇ ହତ୍ୟା କରାଯାଇଥିବା କୁହାଯାଇଛି। ରିପୋର୍ଟ ଅନୁସାରେ, ସୋମବାର ଦିନ ପ୍ରାୟ ୧ଟା ସମୟରେ ଜୁନାୱାରୀ ବ୍ଲକ ଅଞ୍ଚଳର ଦଫ୍ତାରା ହିମାଚଳ ଗାଁରେ ତାଙ୍କ ଘରେ ଖଟିଆରେ ବସିଥିବା ସମୟରେ କିଛି ଯୁବକ ବାଇକ୍ ରେ ଆସି ତାଙ୍କୁ ବିଷ ଇଞ୍ଜେକ୍ସନ ଦେଇଥିଲେ। ଯୁବକ ମାନେ ତାଙ୍କୁ ବିଷ ଇଞ୍ଜେକ୍ସନ ଦେଇ ଫେରାର୍ ହୋଇଯାଇଛନ୍ତି।
ସୂଚନା ଅନୁଯାୟୀ, ଯେତେବେଳେ ଗୁଲଫାମ ସିଂହ ଯାଦବ ତାଙ୍କ ଘରେ ଏକ ଖଟିଆରେ ବସିଥିଲେ, ଦୁଇଜଣ ଯୁବକ ଏକ ବାଇକ୍ ଚଢ଼ି ତାଙ୍କ ଘର ପାଖରେ ପହଞ୍ଚିଥିଲେ, ସେମାନଙ୍କ ମଧ୍ୟରୁ ଜଣଙ୍କ ହାତରେ ଏକ ଇଞ୍ଜେକ୍ସନ ଥିଲା, ସେ ହଠାତ୍ ବିଜେପି ନେତାଙ୍କ ପେଟରେ ଇଞ୍ଜେକ୍ସନଟି ଲଗାଇ ଦେଇଥିଲେ ଏବଂ କିଛି ସମୟ ପାଇଁ ସେଠାରେ ଠିଆ ହୋଇଥିଲେ। ଏହା ପରେ, ଘରର ଲୋକମାନେ ଦେଖିବା କିମ୍ବା ବୁଝିବା ପୂର୍ବରୁ, ବାଇକ୍ ଆରୋହୀ ଯୁବକ ଦୁହେଁ ପଳାଇ ଯାଇଥିଲେ। ପରିବାର ଲୋକ ଶୀଘ୍ର ତାଙ୍କୁ ପ୍ରଥମେ ଜୁନାୱାରିର ସରକାରୀ ଡାକ୍ତରଖାନାକୁ ନେଇଗଲେ । ତେବେ ସେଠାରେ ଡାକ୍ତରମାନେ ତାଙ୍କୁ ଆଲିଗଡ଼କୁ ରେଫର କଲେ ଏବଂ ଆଲିଗଡ଼କୁ ନେବା ସମୟରେ ରାସ୍ତାରେ ତାଙ୍କର ମୃତ୍ୟୁ ହୋଇଗଲା।
ବିଜେପି ନେତା ଗୁଲଫାମ ସିଂହଙ୍କ ବୟସ ୬୫ବର୍ଷ ବୋଲି କୁହାଯାଏ ଏବଂ ସେ ପ୍ରାୟ ତିନି ଦଶନ୍ଧି ଧରି ରାଜନୀତିରେ ସକ୍ରିୟ ଥିଲେ। ୨୦୦୪ ମସିହାରେ ଗୁନ୍ନୌର ବିଧାନସଭା ପାଇଁ ହୋଇଥିବା ଉପନିର୍ବାଚନରେ ସେ ସ୍ୱର୍ଗତ ଏସପି ନେତା ଏବଂ ରାଜ୍ୟ ମୁଖ୍ୟମନ୍ତ୍ରୀ ମୁଲାୟମ ସିଂହ ଯାଦବଙ୍କ ବିରୋଧରେ ବିଜେପି ଟିକେଟରେ ପ୍ରତିଦ୍ୱନ୍ଦ୍ୱିତା କରିଥିଲେ ଏବଂ ସେ ପଛୁଆ ବର୍ଗ କମିଶନର ସଦସ୍ୟ ମଧ୍ୟ ଥିଲେ। ଏହା ସହିତ, ଗୁଲଫାମ ଯାଦବ ବିଜେପି ରାଜ୍ୟ କାର୍ଯ୍ୟକାରିଣୀ ସଦସ୍ୟ, ପଶ୍ଚିମ ଉତ୍ତର ପ୍ରଦେଶର ଆଞ୍ଚଳିକ ଉପାଧ୍ୟକ୍ଷ ଥିଲେ।
