ଭୁବନେଶ୍ୱର,୧୩/୦୩: ୨୦୩୬ ସୁଦ୍ଧା ରାଜ୍ୟକୁ ଆଇଟି ଏବଂ ଇଲେକ୍ଟ୍ରୋନିକ୍ସ କ୍ଷେତ୍ରରେ ଏକ ପାୱାର ହାଉସ ବନାଇବା ଲକ୍ଷ୍ୟ ରଖାଯାଇଛି । ରାଜ୍ୟ ଏ ନେଇ ନୂଆ ଆଇଟି ନୀତି ଲାଗୁ କରିବ । ଏହାର ଡ୍ରାଫ୍ଟ ଏବେ ଜାରି କରାଯାଇଛି । ଜନସାଧାରଣ ଏବଂ ଅଂଶୀଦାରମାନେ ଏହା ଉପରେ ନିଜର ମତ ରଖିବାକୁ ନିବେଦନ କରାଯାଇଛି । ବିଶ୍ୱସ୍ତରୀୟ ଭିତ୍ତିଭୂମି ଦ୍ୱାରା ରାଜ୍ୟକୁ ନୂଆ ନିବେଶ ଆକୃଷ୍ଟ କରିବା ଉପରେ ଏହି ନୀତିରେ ଫୋକସ କରାଯାଇଛି ।
ଡ୍ରାଫ୍ଟ ମୁତାବକ, ଆଇଟି କମ୍ପାନିଗୁଡ଼ିକ ସ୍ଥାନୀୟ ଯୁବବର୍ଗଙ୍କୁ ନିଯୁକ୍ତି ପ୍ରଦାନ କ୍ଷେତ୍ରରେ କର୍ମଚାରୀ ରାଜ୍ୟ ବୀମା (ଇଏସ୍ଆଇ) ଏବଂ କର୍ମଚାରୀ ଭବିଷ୍ୟନିଧି ପାଣ୍ଠି (ଇପିଏଫ୍) ଯୋଗଦାନ ପାଇଁ ୧୦୦% ଅର୍ଥ ପ୍ରଦାନ କରିବେ ରାଜ୍ୟ ସରକାର । ଯୋଗ୍ୟ ଆଇଟି କମ୍ପାନିଗୁଡ଼ିକ ଏହି ସୁବିଧା ୫ ବର୍ଷ ଲାଗି ଲାଭ କରିବେ । ଆଇଟି ପାର୍କ ସ୍ଥାପନା କ୍ଷେତ୍ରରେ ପ୍ରଥମ ଟ୍ରାଞ୍ଜାକସନ କ୍ଷେତ୍ରରେ ୧୦୦% ଷ୍ଟାମ୍ପ ଡ୍ୟୁଟି ଏବଂ ଦ୍ୱିତୀୟ ଟ୍ରାଞ୍ଜାକସନରେ ୫୦% ଷ୍ଟାମ୍ପ ଡ୍ୟୁଟି ଛାଡ଼ କରିବାକୁ ଏହି ଡ୍ରାଫ୍ଟ ନୀତିରେ ପ୍ରସ୍ତାବ ଦିଆଯାଇଛି । ସେହିଭଳି ବିଜୁଳି ବିଲ୍ କ୍ଷେତ୍ରରେ ଆଇଟି ୟୁନିଟ୍, ଟାୱାର ଏବଂ ପାର୍କଗୁଡ଼ିକ କାର୍ଯ୍ୟାରମ୍ଭ କରିବା ସମୟଠାରୁ ୫ ବର୍ଷ ଲାଗି ୧୦୦% ଛାଡ଼ ସୁବିଧା ମିଳିବ । ଶିଳ୍ପ ଲାଗି ଉପଲବ୍ଧ ଥିବା ଟାରିଫ ଏହି କମ୍ପାନିଗୁଡ଼ିକ ଲାଗି ଲାଗୁ ହେବ ।
ସେହିଭଳି ରାଜ୍ୟ ଜିଏସ୍ଟି କ୍ଷେତ୍ରରେ ନିର୍ଦ୍ଧିଷ୍ଟ ସମୟ ଲାଗି ଛାଡ଼ ସୁବିଧା ଦିଆଯିବ । ୧୦୦ କୋଟି ଯାଏ ନିବେଶ କ୍ଷେତ୍ରର ସ୍ଥାୟୀ ପୁଞ୍ଜିର ୩୦% ଫେରସ୍ତ ମିଳିବ । ୧୦୦ରୁ ୨୦୦ କୋଟି ଯାଏ ଏହା ୨୫% ଏବଂ ୨୫୦ କୋଟିରୁ ଉଦ୍ଧ୍ୱର୍ ନିବେଶରେ ୨୦% ଅର୍ଥ ଫେରସ୍ତ ମିଳିବ । ଆଇଟି ଟାୱାରର ୭୦% ଏରିଆରେ ଆଇଟି ଏବଂ ଆଇଟିଇଏସ୍ କମ୍ପାନିଙ୍କୁ ୟୁନିଟ ବସାଇବାକୁ ସୁଯୋଗ ମିଳିବ । ଅନ୍ୟ ୩୦% ଏରିଆରେ ସହାୟକ ଭିତ୍ତିଭୁମି ଏବଂ ୟୁଟିଲିଟି ସେବା ଲାଗି ବ୍ୟବହାର ହୋଇପାରିବ । କମ୍ପାନିଗୁଡ଼ିକୁ ଦୀର୍ଘମିଆଦୀ ଋଣ କ୍ଷେତ୍ରରେ ୫% ସୁଧ ସବସିଡି ପ୍ରଦାନ କରାଯିବ । ସେହିଭଳି ଏ କ୍ଷେତ୍ରରେ ଗବେଷଣା ଏବଂ ଉନ୍ନତିକରଣକୁ ପ୍ରୋତ୍ସାହିତ କରିବା ଲାଗି ନିବେଶ ଅର୍ଥର ୫୦% ଅର୍ଥ ସରକାର ଫେରାଇବେ ବୋଲି ଏହି ଡ୍ରାଫ୍ଟ ନୀତିରେ କୁହାଯାଇଛି ।
