ନୂଆଦିଲ୍ଲୀ: ଇଣ୍ଡୋନେସିଆର ସୁମାତ୍ରା ଦ୍ୱୀପରେ ଏକ ଭୟଙ୍କର ଦୁର୍ଘଟଣା ଘଟିଛି । ଏକ ବେଆଇନ ସୁନା ଖଣିରେ ଏହି ଦୁର୍ଘଟଣା ଘଟିଛି। ଲୋକମାନେ ବେଆଇନ ଭାବେ ସୁନା ଖନନ କରୁଥିବା ସମୟରେ ଭୂସ୍ଖଳନ ଘଟିଛି। ଭୂସ୍ଖଳନ ଯୋଗୁଁ ଅତିକମରେ ୧୫ ଜଣଙ୍କର ମୃତ୍ୟୁ ହୋଇଛି । ଏଥି ସହ ଦୁର୍ଘଟଣାରେ ୧୨ରୁ ଅଧିକ ଲୋକ ନିଖୋଜ ଥିବା ଜଣାପଡିଛି । ଅଧିକାରୀ ମାନେ ଶୁକ୍ରବାର ଏହି ଦୁର୍ଘଟଣା ସମ୍ପର୍କରେ ସୂଚନା ଦେଇଛନ୍ତି । ବର୍ତ୍ତମାନ ପ୍ରଶାସନ ଦ୍ୱାରା ସମସ୍ତ ସମ୍ଭାବ୍ୟ ସହାୟତା ଯୋଗାଇ ଦିଆଯାଉଛି । ଉଦ୍ଧାରକାରୀ ଦଳ ଆବର୍ଜନାରେ ଫସି ରହିଥିବା ଲୋକଙ୍କୁ ଉଦ୍ଧାର କରୁଛନ୍ତି । 

ସ୍ଥାନୀୟ ବିପର୍ଯ୍ୟୟ ଏଜେନ୍ସି କାର୍ଯ୍ୟାଳୟର ମୁଖ୍ୟ ଏରୱାନ ଏଫେଣ୍ଡୋଇ ଏହି ଦୁର୍ଘଟଣା ସମ୍ପର୍କରେ ସୂଚନା ଦେଇଛନ୍ତି ।ଏରଓ୍ବାନ କହିଛନ୍ତି ଯେ, ପଶ୍ଚିମ ସୁମାତ୍ରା ପ୍ରଦେଶର ସୁଦୂର ସୋଲୋକ ଜିଲ୍ଲାରେ ସୁନା ଖୋଜିବା ପାଇଁ ଖନନ କରୁଥିବା ଲୋକମାନେ ଭୂସ୍ଖଳନରେ ପୋତି ହୋଇଯାଇଛନ୍ତି । ସେ କହିଛନ୍ତି ଯେ ଅତିକମରେ ୧୫ ଜଣ ଲୋକ ଏବେବି ମାଟି ତଳେ ପୋତି ହୋଇ ରହିଛନ୍ତି । ଉଦ୍ଧାରକାରୀ ମାନେ ତିନି ଜଣଙ୍କୁ ଜୀବନ୍ତ ଅବସ୍ଥାରେ ବାହାରକୁ ଟାଣି ଆଣିଛନ୍ତି । ଏଠାରେ ଦିନ, ରାତି ଉଦ୍ଧାର କାର୍ଯ୍ୟ ଚାଲିଛି।

ଇଣ୍ଡୋନେସିଆରେ ଏଭଳି ଦୁର୍ଘଟଣା ପ୍ରଥମ ଘଟଣା ନୁହେଁ । ଏହା ପୂର୍ବରୁ ଚଳିତ ବର୍ଷ ଜୁଲାଇ ମାସରେ ମଧ୍ୟ ଏକ ହୃଦୟ ବିଦାରକ ଦୁର୍ଘଟଣା ଘଟିଥିଲା । ଜୁଲାଇରେ ବର୍ଷା ହେତୁ ସୁଲାୱେସି ଦ୍ୱୀପରେ ଥିବା ଏକ ବେଆଇନ ସୁନା ଖଣି ଭୁଶୁଡି ପଡିଥିଲା ।ଏହି ଦୁର୍ଘଟଣାରେ ୧୨ ରୁ ଅଧିକ ଲୋକଙ୍କର ମୃତ୍ୟୁ ହୋଇଥିଲା । ଏହି ସମୟରେ ୧୦୦ ରୁ ଅଧିକ ଲୋକ ସୁନା ଖଣିରେ ଥିଲେ ।