ନୂଆଦିଲ୍ଲୀ ୨୮/୦୯: ସୁପ୍ରିମ୍କୋର୍ଟରେ ବିଧୁ ବିନୋଦ ଚୋପ୍ରାଙ୍କ ଫିଲ୍ମ ‘ଟ୍ୱେଲ୍ଥ ଫେଲ୍’ର ସ୍ପେଶାଲ ସ୍କ୍ରିନିଂ । ଗତ ବୁଧବାର ପ୍ରଧାନ ବିଚାରପତି ଡିୱାଇ ଚନ୍ଦ୍ରଚୂଡ଼ ଓ ଅନ୍ୟ ବିଚାରପତିଙ୍କ ପାଇଁ ଫିଲ୍ମ ସ୍କ୍ରିନିଂ ହୋଇଥିଲା । ପ୍ରଧାନ ବିଚାରପତି, ଅନ୍ୟ ବିଚାରପତିଙ୍କ ସମେତ ୬୦୦ ଅଧିକାରୀ ଓ ସେମାନଙ୍କ ପରିବାର ସ୍କ୍ରିନିଂରେ ଯୋଗ ଦେଇ ଫିଲ୍ମ ଦେଖିଥିଲେ । ଏହା ପରେ ପ୍ରଧାନ ବିଚାରପତି ଜଷ୍ଟିସ୍ ଚନ୍ଦ୍ରଚୂଡ଼ ବିଧୁ ବିନୋଦ ଏବଂ ଫିଲ୍ମର ମୁଖ୍ୟ କଳାକାର ବିକ୍ରାନ୍ତ ମେସି ଓ ମେଧା ଶଙ୍କରଙ୍କ ମଧ୍ୟରେ ବାର୍ତ୍ତାଳାପ ହୋଇଥିଲା । ଫିଲ୍ମ ଟିମ୍ଙ୍କ ସହିତ ଆଇପିଏସ୍ ଅଫିସର ମନୋଜ କୁମାର ଶର୍ମା ମଧ୍ୟ ସେଠାରେ ଉପସ୍ଥିତ ଥିଲେ ।
ସୂଚନାଯୋଗ୍ୟ, ମନୋଜଙ୍କ ଜୀବନ ଉପରେ ‘ଟ୍ୱେଲ୍ଥ ଫେଲ୍’ ପର୍ଯ୍ୟବସିତ । ବାର୍ତ୍ତାଳାପରେ ଚନ୍ଦ୍ରଚୂଡ଼ କହିଥିଲେ ‘ମୋର ବିଶ୍ୱାସ ଯେ ଆମ କର୍ମଚାରୀ ପରିବାରଙ୍କର ପ୍ରତ୍ୟେକ ସଦସ୍ୟ ଫିଲ୍ମରୁ ପ୍ରେରିତ ହୋଇ ଦେଶକୁ ଏକ ନୂଆ ଉଚ୍ଚତାକୁ ନେବାରେ ସେମାନଙ୍କ ପୁଅ, ଝିଅ, ବନ୍ଧୁଙ୍କୁ ଉତ୍ସାହିତ କରିବେ । ଏଭଳି ଫିଲ୍ମ ଆମ ଚତୁଃପାଶ୍ୱର୍ର ଲୋକଙ୍କ ପାଇଁ ଜୀବନରେ ପ୍ରତିଦିନ କିଛି ଭଲ କରିବା ପାଇଁ ଆମକୁ ସକ୍ଷମ ଓ ପ୍ରେରିତ କରେ ।
୨୦୨୩, ଅକ୍ଟୋବରରେ ‘ଟ୍ୱେଲ୍ଥ ଫେଲ୍’ ଥିଏଟରକୁ ଆସିଥିଲା । କାହାଣୀ ଓ କଳାକାରଙ୍କ ପ୍ରଦର୍ଶନ ପାଇଁ ଏହା ଖୁବ୍ ପ୍ରଶଂସିତ ହୋଇଥିଲା । ଅନୁରାଗ ପାଠକଙ୍କ ‘ଟ୍ୱେଲ୍ଥ ଫେଲ୍’ ଶୀର୍ଷକ ବେଷ୍ଟ୍ସେଲିଂ ଉପନ୍ୟାସର ଏହା ନାଟ୍ୟ ରୂପାନ୍ତର । ବାସ୍ତବ ଜୀବନର କାହାଣୀକୁ ନିଖୁଣ ଭାବେ ପରଦାରେ ଉତାରିବା ପାଇଁ ବିଧୁ ବିନୋଦଙ୍କୁ ପ୍ରଧାନ ବିଚାରପତି ପ୍ରଶଂସା କରିଥିଲେ । ବିକ୍ରାନ୍ତ ଓ ମେଧାଙ୍କ ପ୍ରଦର୍ଶନକୁ ମଧ୍ୟ ଖୁବ୍ ପ୍ରଶଂସା କରିଥିଲେ । ସୁପ୍ରିମ୍କୋର୍ଟରେ ଫିଲ୍ମଟି ପ୍ରଦର୍ଶିତ ହୋଇଥିବାରୁ ବିଧୁ ବିନୋଦଙ୍କ ସମେତ ପୂରା ଫିଲ୍ମ ଟିମ୍ କୃତଜ୍ଞତା ଜଣାଇଛନ୍ତି ।
