ନୂଆଦିଲ୍ଲୀ: ଦିଲ୍ଲୀ ବିଧାନସଭାରେ ବିଜେପି ଉପରେ ଖୁବ୍ ବର୍ଷିଲେ ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ। ଏହି ସମୟରେ ସେ ଯାଞ୍ଚ ଏଜେନ୍ସି ଗୁଡ଼ିକର ଦୂରୁପଯୋଗ ପ୍ରସଙ୍ଗ ଉଠାଇଛନ୍ତି । କହିଛନ୍ତି ଯେ, ବିଜେପିକୁ ଲାଜ ଲାଗିବା କଥା । ଅଜିତ ପାୱାରଙ୍କୁ ନଜରରେ ରଖି ସେ କହିଛନ୍ତି କି, ପ୍ରଧାନମନ୍ତ୍ରୀ ଯେଉଁ ବ୍ୟକ୍ତି ଉପରେ ଦୁର୍ନୀତି ଅଭିଯୋଗ ଲଗାଇଥାନ୍ତି, ପରେ ତାଙ୍କୁ ରାଜ୍ୟର ଉପମୁଖ୍ୟମନ୍ତ୍ରୀ କରନ୍ତି ।
କେଜ୍ରିୱାଲ କହିଛନ୍ତି, "ମୁଁ ଚାରି-ପାଞ୍ଚ ଦିନ ପୂର୍ବରୁ ମୋହନ ଭଗବତଙ୍କୁ ଏକ ଚିଠି ଲେଖିଥିଲି । ସେହି ଚିଠିରେ ମୁଁ ତାଙ୍କ ସହ ପାଞ୍ଚଟି ପ୍ରସଙ୍ଗରେ କଥା ହୋଇଥିଲି । ଏଥି ମଧ୍ୟରୁ ଗୋଟିଏ ପ୍ରସଙ୍ଗ ହେଉଛି ଯେଉଁ ଭଳି ଭାବରେ ପ୍ରଧାନମନ୍ତ୍ରୀ ମୋଦୀ ଇଡି ଆଉ ସିବିଆଇକୁ ଲଗାଇ କିମ୍ବା ଟଙ୍କା ଲାଞ୍ଚ ଦେଇ ବିରୋଧୀ ନେତାଙ୍କୁ ବିଜେପିରେ ସାମିଲ କରିବାକୁ ଚେଷ୍ଟା କରନ୍ତି, ସେଥିରେ ଆପଣ ସହମତ କି ?
ସେ ଆହୁରି ମଧ୍ୟ କହିଛନ୍ତି ଯେ, ୨୭ ଜୁନ୍ ୨୦୨୩ରେ ପ୍ରଧାନମନ୍ତ୍ରୀ କହିଛନ୍ତି ଯେ, ଅଜିତ ପାୱାର ୭୦ ହଜାର କୋଟି ଟଙ୍କା ଠକେଇ ଅଭିଯୋଗରେ ଅଭିଯୁକ୍ତ । ଆମେ ତାଙ୍କୁ ଜେଲକୁ ପଠାଇବୁ । ହେଲେ ଏହାର ପାଞ୍ଚ ଦିନ ପରେ ଅର୍ଥାତ ଜୁଲାଇ ୨ ରେ ସେ ତାଙ୍କୁ ତାଙ୍କ ସରକାରରେ ସାମିଲ କରିଥିଲେ ଏବଂ ତାଙ୍କୁ ଉପମୁଖ୍ୟମନ୍ତ୍ରୀ କରାଇଦେଲେ। ମୁଁ ସେମାନଙ୍କୁ (ବିଜେପି) ପଚାରିବାକୁ ଚାହୁଁଛି କି ତୁମକୁ କିଛି ଲଜ୍ଜା ଅନୁଭବ ହେଉଛି କି ନାହିଁ ? ଯେତେବେଳେ ତୁମେ ତୁମ ରାସ୍ତାରେ କିମ୍ବା ତୁମ ଘରକୁ ଯାଅ ତୁମେ କେଉଁ ମୁହଁ ଦେଖାଉଛ ?
କେଜ୍ରିଓ୍ବାଲ ଆହୁରି ମଧ୍ୟ କହିଛନ୍ତି, "୨୨ ଜୁଲାଇ ୨୦୧୫ ରେ ବିଜେପି କହିଛି ଯେ ହିମନ୍ତ ବିଶ୍ୱ ସର୍ମା ବହୁତ ଦୁର୍ନୀତିଗ୍ରସ୍ତ । ଏକ ମାସ ପରେ ଅର୍ଥାତ ଅଗଷ୍ଟ ୨୩, ୨୦୧୫ ରେ ସେମାନେ ତାଙ୍କୁ ନିଜ ଦଳରେ ସାମିଲ କରିଥିଲେ ।
ଏହା ସହିତ କେଜ୍ରିୱାଲ କହିଛନ୍ତି, "ଏନସିପି ନେତା ପ୍ରଫୁଲ୍ଲ ପଟେଲଙ୍କ ବିରୋଧରେ ସିବିଆଇ ଏବଂ ଇଡି ମାମଲା ଥିଲା, ପ୍ରଧାନମନ୍ତ୍ରୀ ମୋଦି ସେମାନଙ୍କୁ ବନ୍ଦ କରିଦେଇଥିଲେ । ଏହିଭଳି ଆଉ କିଛି ନେତାଙ୍କ ନାମ ମଧ୍ୟ ନେଇ ବିଜେପିକୁ ଦୃଢ ସମାଲୋଚନା କରିଛନ୍ତି ସେ ।