ନୂଆଦିଲ୍ଲୀ,୨୭/୦୯: ଭାରତରେ ଆରମ୍ଭ ହୋଇଗଲାଣି ପୂଜା ଋତୁ । ଲୋକେ ସପିଂରେ ବ୍ୟସ୍ତ । ଅନ୍ଲାଇନ୍ ଏବଂ ଅଫ୍ଲାଇନ୍ ସେଲ୍ ଆରମ୍ଭ ହୋଇଯାଇଛି । ପ୍ରତିବର୍ଷ ପାର୍ବଣ ସମୟରେ ଦେଶର ସହରାଞ୍ଚଳରେ ରହୁଥିବା ଲୋକମାନେ ଉପହାର, ଆପ୍ଲିଆନ୍ସ, ଇଲେକ୍ଟ୍ରୋନିକ୍ସ, ଫର୍ଣ୍ଣିଚର ଏବଂ ଅନ୍ୟାନ୍ୟ ସାମଗ୍ରୀରେ ପ୍ରଚୁର ମାତ୍ରାରେ ବ୍ୟୟ କରିଥାନ୍ତି । ପୂଜା ସେଲ୍ ଆରମ୍ଭ ହୋଇଯାଇଛି । ଏଭଳି କ୍ଷେତ୍ରରେ ଲୋକାଲ୍ ସର୍କଲ୍ସ ପକ୍ଷରୁ କରାଯାଇଥିବା ଏକ ସର୍ଭେ ଅନୁସାରେ, ୨୦୨୪ ପୂଜା ଋତୁରେ ସହରୀ ଲୋକମାନେ ୨୨୦୦ କୋଟି ଡଲାର ବା ୧.୮୫ ଲକ୍ଷ କୋଟି ଟଙ୍କା ଖର୍ଚ୍ଚ କରିବାକୁ ଯୋଜନା କରିଛନ୍ତି ।
ସର୍ଭେରେ ଅଂଶଗ୍ରହଣ କରିଥିବା ୧୨,୦୦୮ ଲୋକଙ୍କ ମଧ୍ୟରୁ ୪% କହିଛନ୍ତି ଯେ, ସେମାନେ ଲକ୍ଷେ କିମ୍ବା ଅଧିକ ଖର୍ଚ୍ଚ କରିବେ । ୧୮% ଲୋକଙ୍କ କହିବାନୁସାରେ, ସେମାନେ ୨୦,୦୦୦ରୁ ୫୦,୦୦୦ ଟଙ୍କା ମଧ୍ୟରେ ଖର୍ଚ୍ଚ କରିବେ । ସେହିଭଳି ୨୬% ଲୋକଙ୍କ ଅନୁସାରେ, ସେମାନେ ୧୦,୦୦୦ରୁ ୨୦,୦୦୦ ଟଙ୍କା ବ୍ୟୟ କରିବେ । ମୋଟାମୋଟି ଭାବେ ପ୍ରତି ୨ରେ ଜଣେ ସହରୀ କହିଛନ୍ତି ଯେ, ସେ ପୂଜାରେ ୧୦,୦୦୦ ଟଙ୍କାରୁ ଅଧିକ ଖର୍ଚ୍ଚ କରିବେ ।
ଚଳିତ ପୂଜା ଋତୁରେ ସପିଂ ବା ଖର୍ଚ୍ଚ କରିବାବେଳେ କାହା ଉପରେ ଅଧିକ ଧ୍ୟାନ ଦେବେ ବୋଲି ପ୍ରଶ୍ନରେ ୪୬% ଅଂଶଗ୍ରହଣକାରୀ କହିଛନ୍ତି ଯେ, ଭ୍ୟାଲ୍ୟୁ ଫର୍ ମନି ଉପରେ ସେମାନେ ଗୁରୁତ୍ୱ ଦେବେ । ୪୩% ଅଂଶଗ୍ରହଣକାରୀଙ୍କ ଅନୁସାରେ, ସେମାନେ ଉତ୍ପାଦର ମାନ ଉପରେ ଅଗ୍ରାଧିକାର ଦେବେ । ସେହିଭଳି ୮% କହିଛନ୍ତି ଯେ, ସିଲେକ୍ସନ ଏବଂ ରେଞ୍ଜ୍ ଉପରେ ଗୁରୁତ୍ୱ ଦେବେ । ୩% ନିଜ ସୁବିଧା ଅନୁସାରେ ସପିଂ କରିବେ ବୋଲି କହିଛନ୍ତି ।
ତେବେ ସପିଂ ପାଇଁ କେଉଁଠିକୁ ଯିବେ ବୋଲି ପ୍ରଶ୍ନରେ ୧୧,୭୧୦ ଅଂଶଗ୍ରହଣକାରୀଙ୍କ ମଧ୍ୟରୁ ୭୦% କହିଛନ୍ତି ଯେ, ସେମାନେ ମଲ୍, ରିଟେଲ ଷ୍ଟୋର, ସ୍ଥାନୀୟ ବଜାରକୁ ଯିବେ । ୧୩% କହିଛନ୍ତି ଯେ, ସେମାନେ ଇ-କମର୍ସ ଏବଂ ଅନ୍ଲାଇନ୍ ସାଇଟ୍ ବା ଆପ୍ରେ ସପିଂ କରିବେ । ସର୍ଭେରେ ଅଂଶଗ୍ରହଣ କରିଥିବା ସହରୀ ଭାରତୀୟମାନଙ୍କୁ ପ୍ରଶ୍ନ କରାଇଥିଲା ଯେ, ସେମାନେ କେଉଁ କେଉଁ ବର୍ଗରେ ସପିଂ କରିବେ । ୧୨,୯୭୦ ଅଂଶଗ୍ରହଣକାରୀଙ୍କ ମଧ୍ୟରୁ ୭୦% କହିଲେ ଯେ, ସେମାନେ ପୂଜା ଦୀପ, ଲ୍ୟାମ୍ପ, ମହମବତି, ଲାଇଟିଂ ଆଦି କିଣିବେ । ୬୪% ଗିଫ୍ଟ ପ୍ୟାକ୍, ଖାଦ୍ୟ, ଡ୍ରାଏ ଫ୍ରୁଟ୍, ଫଳ, ଚକୋଲେଟ୍, ପାରମ୍ପରିକ ମିଠା କିଣିବେ । ୪୦% ଅଂଶଗ୍ରହଣକାରୀ ହୋମ୍ ଡେକର କିଣିବାକୁ ଯୋଜନା କରିଥିବା ସର୍ଭେରୁ ଜଣାପଡ଼ିଛି । ବିଉଟି ଏବଂ ଫ୍ୟାଶନରେ ଖର୍ଚ୍ଚ କରିବା ପାଇଁ ୩୮% ଅଂଶଗ୍ରହଣକାରୀ ଇଚ୍ଛା ପ୍ରକାଶ କରିଛନ୍ତି । ୨୨% ସ୍ମାର୍ଟଫୋନ୍ ଏବଂ ଇଲେକ୍ଟ୍ରୋନିକ୍ସରେ ଖର୍ଚ୍ଚ କରିବେ । ୧୮% ହ୍ୱାଇଟ୍ ଗୁଡ୍ସ, ୪% ଅଟୋମୋବାଇଲରେ ସପିଂ କରିବାକୁ ଇଚ୍ଛା ପ୍ରକାଶ କରିଛନ୍ତି । ସେହିଭଳି ୪% ଗହଣା କିଣିବେ ବୋଲି ପ୍ରକାଶ କରିଛନ୍ତି ।