ମୁମ୍ବାଇ,୨୭/୦୯:  ଆଜି ରିଲିଜ ହୋଇଯାଇଛି ଜୁନିଅର ଏନଟିଆରଙ୍କ ବହୁ ପ୍ରତୀକ୍ଷିତ ଫିଲ୍ମ 'ଦେବରା: ପାର୍ଟ -୧'। ତେବେ ଚଳଚ୍ଚିତ୍ର ରିଲିଜକୁ ନେଇ ଫ୍ୟାନ୍ସ ବିଭିନ୍ନ ସ୍ଥାନରେ ଦମଦାର ସ୍ୱାଗତ କରିଛନ୍ତି । ଚଳଚ୍ଚିତ୍ର ରିଲିଜ ହେବା ପୂର୍ବରୁ ପ୍ରେକ୍ଷାଳୟ ବାହାରେ ବାଣ ଫୁଟାଇ ନାଚ ଗୀତରେ ସେଲିବ୍ରେସନ କରିଛନ୍ତି ଫ୍ୟାନ୍ସ । ଦେବରା ରିଲିଜ ସେଲିବ୍ରେସନର ଅନେକ ଭିଡିଓ Xରେ ସାମ୍ନାକୁ ଆସିଛି । ଏକ ଭିଡିଓରେ ଜୁନିଅର ଏନଟିଆରଙ୍କ ଜଣେ ବୃଦ୍ଧ ମହିଳା ଫ୍ୟାନ୍ ଅଭିନେତାଙ୍କ ପୋଷ୍ଟରରେ ତିଲକ ଲଗାଉଥିବା ନଜର ଆସିଛନ୍ତି । ଏଥିସହ ଜୁନିଅର ଏନଟିଆର ପୋଷ୍ଟର ସାମ୍ନାରେ ମିଠା ମଧ୍ୟ ପ୍ରଦାନ କରାଯାଉଥିବା ଦେଖିବାକୁ ମିଳିଛି । 

ସେହିପରି ଆନ୍ଧ୍ରପ୍ରଦେଶ ଏବଂ ତେଲେଙ୍ଗାନାରେ ମଧ୍ୟ ସେଲିବ୍ରେସନର ଦେଖିବାକୁ ମିଳିଛି । ସହରର କିଛି ଫଟୋ ସେୟାର କରି ଜଣେ ଫ୍ୟାନ୍ ଲେଖିଛନ୍ତି, ' ୨ବର୍ଷ ପରେ ବଡ ପରଦାରେ Jr. NTR ନଜର ଆସିଛନ୍ତି । 'ଦେବରା' ନିର୍ଦ୍ଦେଶକ କୋର୍ଟଲା ଶିବା ଏହି ଫିଲ୍ମର ନିର୍ଦ୍ଦେଶନା ଦେଇଛନ୍ତି । ଏହି ଚଳଚ୍ଚିତ୍ରଟି ଯୁବାସୁଧା କଳା ଏବଂ ଏନଟିଆର ଦ୍ୱାରା ପ୍ରସ୍ତୁତ କରାଯାଇଛି । ରିପୋର୍ଟ ଅନୁଯାୟୀ, ଫିଲ୍ମର ବଜେଟ୍ ୩୦୦ କୋଟି ଟଙ୍କା ବୋଲି କୁହାଯାଉଛି । ତେବେ ଏହି ଫିଲ୍ମରେ ଜୁନିଅର ଏନଟିଆରଙ୍କ ସହ ସୈଫ ଅଲି ଖାନ ଏବଂ ଜାହ୍ନବୀ କପୁରଙ୍କୁ ଦେଖିବାକୁ ମିଳିଛି । ତେବେ ଏହି ଫିଲ୍ମ ସହ ପ୍ରଥମ ଥର ପାଇଁ ଜୁନିଅର ଏନଟିଆରଙ୍କ ସହ ଜାହ୍ନବୀ ଓ ସୈଫ ନଜର ଆସିଥିବା ବେଳେ ଏହି ଫିଲ୍ମ ସହ ଉଭୟ ତେଲୁଗୁ ଇଣ୍ଡଷ୍ଟ୍ରିରେ ଡେବ୍ୟୁ କରିଛନ୍ତି ।