ନୂଆଦିଲ୍ଲୀ: ହରିୟାଣାରେ ବିଧାନସଭା ନିର୍ବାଚନ ପୂର୍ବରୁ କଂଗ୍ରେସକୁ ଏକ ବଡ଼ ଝଟକା ଲାଗିଛି । ତୋସାମ ବିଧାୟିକା କିରଣ ଚୌଧୁରୀ ଏବଂ ତାଙ୍କ ଝିଅ ଶ୍ରୁତି ଚୌଧୁରୀ କଂଗ୍ରେସରୁ ଇସ୍ତଫା ଦେଇଛନ୍ତି । ଝିଅ ଶ୍ରୁତି ହରିୟାଣା କଂଗ୍ରେସ କାର୍ଯ୍ୟକାରୀ କମିଟିର ୪ ଜଣିଆ ସଦସ୍ୟ ଭିତରେ ରହିଛନ୍ତି । ସେ ତାଙ୍କର ଇସ୍ତଫା ପତ୍ର କଂଗ୍ରେସ ସଭାପତି ମଲ୍ଲିକାର୍ଜୁନ ଖଡଗେଙ୍କ ନିକଟକୁ ପଠାଇଛନ୍ତି । ଉଭୟ ଇ-ମେଲ ମାଧ୍ୟମରେ ଇସ୍ତଫା ପତ୍ର ଦାଖଲ କରିଛନ୍ତି । ବୁଧବାର (ଜୁନ୍ ୧୯) ରେ ସେ ବିଜେପିରେ ଯୋଗଦେବେ ବୋଲି ଏକ ନ୍ୟୁଜ୍ ଏଜେନ୍ସିକୁ ନିଶ୍ଚିତ କରିଛନ୍ତି ।
କୁହାଯାଉଛି ଯେ, ଝିଅ ଶ୍ରୁତି ଚୌଧୁରୀଙ୍କୁ ଲୋକସଭା ଟିକେଟ୍ ନମିଳିବାରୁ କିରଣ ଚୌଧୁରୀ କଂଗ୍ରେସ ଉପରେ ଅସନ୍ତୁଷ୍ଟ ଅଛନ୍ତି । ଏପରିକି ଲୋକସଭା ନିର୍ବାଚନ ସମୟରେ କିରଣ ଚୌଧୁରୀ ବିଜେପିରେ ଯୋଗ ଦେଇପାରନ୍ତି ବୋଲି କଳ୍ପନାଜଳ୍ପନା କରାଯାଇଥିଲା । ତେବେ ସେ ସେତେବେଳେ ଏହି କଳ୍ପନାଜଳ୍ପନାକୁ ପ୍ରତ୍ୟାଖ୍ୟାନ କରିଥିଲେ।
କିରନ ଚୌଧୁରୀ ତାଙ୍କ ଇସ୍ତଫା ପତ୍ରରେ ଲେଖିଛନ୍ତି ଯେ, "ହରିୟାଣାରେ କଂଗ୍ରେସ ଦଳ ଦୁର୍ଭାଗ୍ୟବଶତ ଏକ ବ୍ୟକ୍ତି କୈନ୍ଦ୍ରିକ ପାଲଟିଛି, ଯିଏକି ନିଜର ସ୍ୱାର୍ଥ ପାଇଁ ଦଳର ସ୍ୱାର୍ଥକୁ ବଳି ପକାଉଛନ୍ତି । ତେଣୁ ବର୍ତ୍ତମାନ ମୋର ଆଗକୁ ବଢିବାର ସମୟ ଆସିଛି । ମୁଁ ମୋର ଲୋକମାନଙ୍କର ସେବା କରିପାରିବି । ନ୍ୟୁଜ୍ ଏଜେନ୍ସି ଅନୁଯାୟୀ କିରଣ ଚୌଧୁରୀ ଭୁପେନ୍ଦ୍ର ସିଂ ହୁଡାଙ୍କୁ ଟାର୍ଗେଟ କରି କହିଛନ୍ତି ଯେ, ଅପମାନ ପାଇଁ ସହନଶୀଳତାର ଏକ ସୀମା ଥାଏ ।
