ନୂଆଦିଲ୍ଲୀ,୧୬/୦୬: ସ୍ୱାଭାବିକ ମୌସୁମୀ ଏବଂ ଆମଦାନି ବୃଦ୍ଧି  ସମ୍ଭାବନା ମଧ୍ୟରେ ଆସନ୍ତା ମାସ ହରଡ଼, ଚଣା ଏବଂ ବିରି ଡାଲି ଦର ଖସିପାରେ । କେନ୍ଦ୍ର ଉପଭୋକ୍ତା ବ୍ୟାପାର ସଚିବ ନିଧି ଖରେ ଏହା ପ୍ରକାଶ  କରିଛନ୍ତି । 

ସେ କହିଛନ୍ତି ଯେ, ଡାଲି ଦରକୁ ନେଇ ବ୍ୟସ୍ତ ହେବାର ନାହିଁ ।  ଆଗାମୀ ମାସରେ ଏହି ୩ଟି ଡାଲିର ଆମଦାନି ବଢ଼ିବ, ଯାହାଫଳରେ ଘରୋଇ  ବଜାରରେ ଉପଲବ୍ଧତା ବୃଦ୍ଧି ପାଇବ । ଫଳରେ ଦରରେ ହ୍ରାସ ଦେଖିବାକୁ  ମିଳିବ । 

ଖରେ କହିଛନ୍ତି ଯେ, ଗତ  ୬ ମାସରେ ହରଡ଼, ଚଣା ଏବଂ  ବିରି ଡାଲି ଦର ସ୍ଥିର ରହିଛି କିନ୍ତୁ  ଉଚ୍ଚ ସ୍ତରରେ ବଳବତ୍ତର ଅଛି ।  ମୁଗ ଏବଂ ମସୁର ଡାଲି ସ୍ଥିତି  ସନ୍ତୋଷଜନକ ରହିଛି । ଜୁନ୍‌  ୧୩ରେ କିଲୋ ପିଛା ଚଣା ଡାଲିର ହାରାହାରି ଖୁଚୁରା ମୂଲ୍ୟ ୮୭.୭୪ ଟଙ୍କା,  ହରଡ଼ ଡାଲି ଦର ୧୬୦.୭୫ ଟଙ୍କା, ବିରି ଡାଲି ଦର ୧୨୬.୬୭ ଟଙ୍କା, ମୁଗ  ଡାଲି ଦର ୧୧୮.୯ ଟଙ୍କା ଏବଂ ମସୁର ଡାଲି ଦର ୯୪.୩୪ ଟଙ୍କା ରହିଛି ।