ନୂଆଦିଲ୍ଲୀ,୨୪/୦୬: ନରେନ୍ଦ୍ର ମୋଦିଙ୍କ ନେତୃତ୍ୱାଧୀନ ଏନଡିଏ ସରକାରଙ୍କ ତୃତୀୟ ପାଳିର ପ୍ରଥମ ସଂସଦ ଅଧିବେଶନ ସୋମବାର ଠାରୁ ଆରମ୍ଭ ହେଉଛି । ସୋମବାର ଠାରୁ ଅଷ୍ଟାଦଶ ଲୋକସଭାର ପ୍ରଥମ ଅଧିବେଶନ ବସୁଥିବା ବେଳେ ଗୁରୁବାର ଠାରୁ ରାଜ୍ୟସଭାର ବୈଠକ ଆରମ୍ଭ ହେବ । ବିରୋଧୀ ଦଳ ପକ୍ଷରୁ ଏକଥା ସ୍ପଷ୍ଟ କରିଦିଆଯାଇଛି କି ସରକାରଙ୍କୁ ଏଥର ଗୃହରେ ବିରୋଧୀଙ୍କ ‘ରୌଦ୍ର’ ରୂପ ଦେଖିବାକୁ ପଡିବ । ଅର୍ଥାତ ଅଧିବେଶ କାଳରେ ଜୋରଦାର ହଙ୍ଗାମା ହେବାର ସମ୍ଭାବନା ରହିଛି । ଏନ୍ଡିଏ ଓ ଇଣ୍ଡିଆ ମେଣ୍ଟର ପ୍ରଥମ ମୁକାବିଲା ଲୋକସଭା ବାଚସ୍ପତି ନିର୍ବାଚନକୁ ନେଇ ହୋଇପାରେ । ଅତୀତରେ ଲୋକସଭା ବାଚସ୍ପତି ଓ ଉପବାଚସ୍ପତି ପଦ ସହମ୍ମତି ଭିତ୍ତିରେ ହେଉଥିଲା । କିନ୍ତୁ ଏଥର ସେଭଳି ସ୍ଥିତି ଦେଖିବାକୁ ମିଳିବ ନାହିଁ । ପୂର୍ବରୁ କାମଚଳା ବାଚସ୍ପତି ଭାବେ ବିଜେପି ସାଂସଦ ଭର୍ତ୍ତୃହରି ମହତାବଙ୍କ ନିଯୁକ୍ତିକୁ ଇଣ୍ଡିଆ ମେଣ୍ଟ ପକ୍ଷରୁ କଡା ବିରୋଧ କରାଯାଇଛି ।
କଂଗ୍ରେସ ସାଂସଦ ରାହୁଲ ଗାନ୍ଧୀ ନିଟ୍ ପରୀକ୍ଷାକୁ ନେଇ ସୃଷ୍ଟି ହୋଇଥିବା ବିବାଦ ପ୍ରସଙ୍ଗରେ କେନ୍ଦ୍ର ସରକାରଙ୍କୁ ଘେରିବାକୁ ଯୋଜନା କରିଛନ୍ତି । ଏହାଛଡା ସେନାରେ ଅଗ୍ନିବୀର ନିଯୁକ୍ତି ଓ ନିର୍ବାଚନ ଫଳ ପ୍ରକାଶ ପୂର୍ବଦିନ ଷ୍ଟକ ମାର୍କେଟରେ ହୋଇଥିବା ଘୋଟାଲାକୁ ନେଇ ମଧ୍ୟ ସରକାରଙ୍କୁ ଜୋର୍ଦାର ବିରୋଧ କରାଯିବ । ଏଥିସହ କେନ୍ଦ୍ର ସରକାର ଆସନ୍ତା ଜୁଲାଇ ପହିଲାରୁ ଲାଗୁ କରିବାକୁ ଯାଉଥିବା ୩ ନୂଆ ଅପରାଧ ଆଇନକୁ ନେଇ କଂଗ୍ରେସ ଓ ଟିଏମ୍ସି ବିରୋଧ କରିବେ ବୋଲି ପୂର୍ବରୁ ଇଙ୍ଗିତ କରିସାରିଛନ୍ତି । ଏହି ଆଇନ ସଂସଦରେ ସେତେବେଳେ ଗୃହୀତ କରାଯାଇଥିଲା ଯେଉଁ ସମୟରେ ବିରୋଧୀ ଦଳର ୧୪୬ ଜଣ ସାଂସଦଙ୍କୁ ଗୃହରୁ ନିଲମ୍ବିତ କରାଯାଇଥିଲା ।
ଲୋକସଭା ନିର୍ବାଚନ ପରେ ବିରୋଧୀମାନେ ଅଧିକ ସକ୍ରିୟ ହୋଇଉଠିଛନ୍ତି । ବିଶେଷକରି ରାହୁଲ ଗାନ୍ଧୀ, ଅଖିଳେଶ ଯାଦବ, ମମତା ବାନାର୍ଜୀଙ୍କ ସମେତ ଆରଜେଡି ଓ ଆପ୍ ନେତାମାନେ ଏନ୍ଡିଏ ସରକାରଙ୍କୁ ଟାର୍ଗେଟ କରିବାରେ ଆଦୌ ହେଳା କରୁନାହାନ୍ତି । କଂଗ୍ରେସ ନେତା ଜୟରାମ ରମେଶ ଅଭିଯୋଗ କରିଛନ୍ତି କି ଲୋକସଭାର କଂଗ୍ରେସ ସାଂସଦ କୁଡିକୁନ୍ନିଲ ସୁରେଶ ସବୁଠାରୁ ବରିଷ୍ଠତମ ହୋଇଥିବା ବେଳେ ତାଙ୍କୁ ଅଣଦେଖା କରି ଭର୍ତ୍ତୃହରିଙ୍କୁ କାମଚଳା ବାଚସ୍ପତି କରାଯାଇଛି । ଏହା ସଂସଦୀୟ ପରମ୍ପରାର ଉଲ୍ଲଂଘନ । ମାତ୍ର ତାଙ୍କର ଏଭଳି ଅଭିଯୋଗକୁ ବିଜେପି ଖଣ୍ଡନ କରିଛି ।
କଂଗ୍ରେସ ନେତା କୋଡିକୁନ୍ନିଲ ସୁରେଶ ଓ ବିଜେପିର ବୀରେନ୍ଦ୍ର କୁମାର ଉଭୟେ ଅଷ୍ଟାଦଶ ଲୋକସଭାରେ ସେମାନଙ୍କର ଅଷ୍ଟମ କାର୍ଯ୍ୟକାଳ ଆରମ୍ଭ କରିବାକୁ ଯାଉଛନ୍ତି । ୨୦୧୯ ଲୋକସଭା ନିର୍ବାଚନ ପରେ ବୀରେନ୍ଦ୍ର କୁମାରଙ୍କୁ କାମଚଳା ବାଚସ୍ପତି ନିଯୁକ୍ତ କରାଯାଇଥିଲା । ବୀରେନ୍ଦ୍ର କୁମାର ବର୍ତ୍ତମାନ କେନ୍ଦ୍ରମନ୍ତ୍ରୀ ହୋଇସାରିଛନ୍ତି । ସେଭଳି କ୍ଷେତ୍ରରେ ବର୍ତ୍ତମାନ କୋଡିକୁନ୍ନିଲ ସୁରେଶ ସବୁଠାରୁ ବରିଷ୍ଠ ସଦସ୍ୟ ଅଛନ୍ତି । କିନ୍ତୁ ତାଙ୍କ ବଦଳରେ ଲୋକସଭାକୁ ୭ ଥର ନିର୍ବାଚିତ ହୋଇଥିବା ଭର୍ତ୍ତୃହରିଙ୍କୁ କାମଚଳା ବାଚସ୍ପତି ନିଯୁକ୍ତ କରାଯିବାକୁ କଂଗ୍ରେସ ଗ୍ରହଣ କରିପାରିନାହିଁ । ତେଣୁ ଗୃହର ପ୍ରଥମ ଦିନରୁ ହିଁ ହଙ୍ଗାମା ସୃଷ୍ଟି ହେବାର ସମ୍ଭାବନା ରହିଛି । ଆସନ୍ତା ୨୬ରେ ବାଚସ୍ପତି ନିର୍ବାଚନ ହେବ ।
ଲୋକସଭାର ୫୪୩ ଆସନରୁ ବର୍ତ୍ତମାନ ଏନ୍ଡିଏର ସଂଖ୍ୟା ୨୯୩ ରହିଥିଲା ବେଳେ ସେଥିରେ ବିଜେପିର ସଦସ୍ୟ ସଂଖ୍ୟା ୨୪୦ ରହିଛି । ଗତ ୨୦୧୪ ଓ ୨୦୧୯ରେ ବିଜେପିକୁ ପୂର୍ଣ୍ଣ ବହୁମତ ମିଳିଥିଲା ବେଳେ ଏଥର ଲୋକସଭା ନିର୍ବାଚନରେ ତାହା ହୋଇନାହିଁ । ଯାହାଫଳରେ ସରକାର ଗଠନ କରିବା ଲାଗି ବିଜେପି ତାର ଅନ୍ୟ ସହଯୋଗୀ ଦଳମାନଙ୍କ ଉପରେ ସମ୍ପୂର୍ଣ୍ଣ ଭାବେ ନିର୍ଭର କରିବାକୁ ପଡିଛି । ଅନ୍ୟପକ୍ଷରେ ଇଣ୍ଡିଆ ମେଣ୍ଟର ସଦସ୍ୟ ସଂଖ୍ୟା ୨୩୪ ରହିଛି । ଫଳରେ ପୂର୍ବାପେକ୍ଷା ଇଣ୍ଡିଆ ମେଣ୍ଟ ଏବେ ଦୃଢ଼ ବିରୋଧୀ ଦଳ ଭାବେ ଉଭା ହୋଇଛି । ତେଣୁ ସଂସଦରେ ବିଭିନ୍ନ ପ୍ରସଙ୍ଗରେ ସରକାରଙ୍କୁ ଘେରିବାକୁ ଇଣ୍ଡିଆ ମେଣ୍ଟକୁ ଏବେ ଶକ୍ତି ମିଳିଯାଇଛି ।
