ଭୁବନେଶ୍ୱର,୨୮/୦୬: ଗଣତାନ୍ତ୍ରିକ ପ୍ରକ୍ରିୟାରେ ଛାତ୍ରଛାତ୍ରୀ ବାଛିବେ ମନ ପସନ୍ଦର ପ୍ରତିନିଧି । କ୍ୟାମ୍ପସ୍କୁ ଫେରିବ ଭୋଟ । ୬ବର୍ଷ ବ୍ୟବଧାନରେ କଲେଜ ଓ ବିଶ୍ୱବିଦ୍ୟାଳୟ କ୍ୟାମ୍ପସ ପୁଣି ଦେଖିବ ଛାତ୍ର ସଂସଦ ନିର୍ବାଚନ । ଏମିତି ଆଶା ସଞ୍ଚାର ହୋଇଛି । ଛାତ୍ର ସଂସଦ ନିର୍ବାଚନ ସପକ୍ଷରେ ଅଛନ୍ତି ଉଚ୍ଚ ଶିକ୍ଷା ମନ୍ତ୍ରୀ । ନୂଆ ସରକାର ଯେ ଗଣତାନ୍ତ୍ରିକ ପଦ୍ଧତିରେ ଛାତ୍ର ପ୍ରତିନିଧି ବାଛିବା ସପକ୍ଷରେ, ତାର ଇଙ୍ଗିତ ମଧ୍ୟ ମନ୍ତ୍ରୀ ଦେଇସାରିଛନ୍ତି । ଛାତ୍ର ସଂସଦ ନିର୍ବାଚନ ନେଇ ଉଚ୍ଚଶିକ୍ଷା ମନ୍ତ୍ରୀ ସୂରଜ ସୂର୍ଯ୍ୟବଂଶୀ ଅନୁକୂଳ ମତ ରଖିବା ପରେ ଛାତ୍ର ସଂଗଠନଠାରୁ ଆରମ୍ଭ କରି ଛାତ୍ରନେତା ଯାଏ ସମସ୍ତେ ବେଶ ଉତ୍ସାହିତ ।
ସମ୍ଭାବ୍ୟ ନିର୍ବାଚନକୁ ନେଇ କ୍ୟାମ୍ପସ୍ରେ ରହିଛି ଛାତ୍ରଛାତ୍ରୀଙ୍କ ମଧ୍ୟରେ ନାହିଁ ନ ଥିବା ଉତ୍ସାହ । ସବୁ କିଛି ଠିକ୍ ରହିଲେ ପୂଜା ଛୁଟି ପୂର୍ବରୁ ଭୋଟ୍କୁ ନେଇ କଲେଜ କ୍ୟାମ୍ପସ ଉଷ୍ମ ହେବ । ଏଥିପାଇଁ ଅଣ୍ଟା ଭିଡ଼ିଲେଣି ଛାତ୍ର ନେତା ଓ ସଂଗଠନ । କ୍ୟାମ୍ପସ୍ରେ ନିଜ ଆଡ଼କୁ ନୂଆ ପିଲାଙ୍କୁ ଆକୃଷ୍ଟ କରିବା ଲାଗି ଲାଗିପଡ଼ିଲେଣି । ଏଥିପାଇଁ ହେଲ୍ପ ଡେସ୍କ ଖୋଲି ନିଜ ବ୍ୟାନରରେ ପିଲାଙ୍କୁ ନିଜ ଆଡ଼କୁ ଟାଣିବାକୁ ଆରମ୍ଭ ହୋଇଛି କସରତ । ଉଚ୍ଚଶିକ୍ଷା ମନ୍ତ୍ରୀ ସୂର୍ଯ୍ୟବଂଶୀ ଗଣମାଧ୍ୟମକୁ ସୂଚନା ଦେଇ କହିଛନ୍ତି, ଛାତ୍ର ସଂସଦ ନିର୍ବାଚନ ନେଇ ବିଚାରବିମର୍ଶ ଚାଲିଛି । ସରକାର ଛାତ୍ର ସମାଜ ପାଇଁ ସକାରାତ୍ମକ ନିଷ୍ପତ୍ତି ନେବେ । ବିଭିନ୍ନ ଦିଗ ଉପରେ ଆଲୋଚନା କରି ଛାତ୍ରଙ୍କ ପାଇଁ ଯାହା ଠିକ୍ ହେବ ତାହା କରାଯିବ ।
ରାଜ୍ୟରେ ୨୦୧୮ ମସିହାରୁ ଛାତ୍ର ସଂସଦ ନିର୍ବାଚନ ବନ୍ଦ ରହିଛି । ହେଲେ ନୂଆ ଉଚ୍ଚଶିକ୍ଷା ମନ୍ତ୍ରୀ ଛାତ୍ର ସଂସଦ ନିର୍ବାଚନ ହେବ ବୋଲି ଆଶିଂକ ଇସାରା ଦେବା ପରେ ଛାତ୍ର ନେତାଙ୍କ ମଧ୍ୟରେ ଉତ୍ସାହ ଆସିଛି । ଏବେ ଯୁକ୍ତ ୩ ନାମଲେଖା ଚାଲୁଥିବା ବେଳେ ସମସ୍ତ କଲେଜ ଓ ବିଶ୍ୱବିଦ୍ୟାଳୟରେ ହେଲ୍ପ ଡେସ୍କ କରିବାକୁ ବିଜୁ ଛାତ୍ର ଜନତା ଦଳ (ବିସିଜେଡି) ଓ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ (ଏବିଭିପି) ନିଜର ଛାତ୍ର ନେତାଙ୍କୁ ନିର୍ଦ୍ଦେଶ ଦେଇଛନ୍ତି । ପ୍ରାୟ କ୍ୟାମ୍ପସରେ ଖୋଲିସାରିଲାଣି ହେଲ୍ପ ଡେସ୍କ । ସେମାନେ ଆସୁଥିବା ପିଲାଙ୍କୁ ନାମଲେଖାରେ ସାହାଯ୍ୟ କରିବା ସହ ପୁସିଂ କାର୍ଡ ଦେଉଛନ୍ତି । ପିଲାଙ୍କ ଫୋନ୍ ନମ୍ବର ନୋଟ୍ କରି ରଖୁଛନ୍ତି । ପିଲାଙ୍କ ମନ ଜିଣିବାକୁ ଚାଲିଛି କସରତ । କଲେଜ ଓ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ମଧ୍ୟ ନିଜକୁ ପ୍ରସ୍ତୁତ କଲେଣି । ଏପରିକି କ୍ୟାମ୍ପସ୍ରେ ପୋଷ୍ଟର ମଧ୍ୟ ଦେଖିବାକୁ ମିଳିଲାଣି ।
ଏବିଭିପି ରାଜ୍ୟ ସଂପାଦକ ଅରିଜିତ ପଟ୍ଟନାୟକ କହିଛନ୍ତି, ଏବିଭିପି ସମ୍ଭାବ୍ୟ ନିର୍ବାଚନକୁ ନେଇ ପ୍ରସ୍ତୁତ ହେଉଛି । ରାଜ୍ୟସ୍ତରୀୟ ନେତାଙ୍କୁ ବିଭିନ୍ନ କ୍ୟାମ୍ପସ୍ର ଦାୟିତ୍ୱ ଦିଆସରିଛି । ସମସ୍ତେ କ୍ୟାମ୍ପସ୍ରେ ଡେରା ପକାଇଛନ୍ତି । ଜୁଲାଇ ୯ ରୁ ନୂଆ ମେମ୍ବରସିପ୍ ଡ୍ରାଇଭ୍ ଆରମ୍ଭ ହେବ । ଗଣେଶ ପୂଜା ପୂର୍ବରୁ ଏବିଭିପି ସବୁ କଲେଜ ଓ ବିଶ୍ୱବିଦ୍ୟାଳୟରେ ପ୍ରାର୍ଥୀଙ୍କୁ ମଇଦାନକୁ ଓହ୍ଲାଇବ
ବିଜୁ ଛାତ୍ର ଜନତା ଦଳ ରାଜ୍ୟ ସଭାପତି ଦେବୀ ରଞ୍ଜନ ତ୍ରିପାଠୀ କହିଛନ୍ତି, ଛାତ୍ରଙ୍କ ଅଧିକାର ଓ ସ୍ୱର ପାଇଁ ବିସିଜେଡି ସବୁ କ୍ୟାମ୍ପସରେ କ୍ୟାମ୍ପସ କମିଟି କରିଥିଲା । ଏହା ମାଧ୍ୟମରେ ସମସ୍ୟାର ସମାଧାନ ପାଇଁ ସ୍ୱର ଉତ୍ତୋଳନ କରୁଥିଲା । ନୂଆ ସରକାର ଛାତ୍ର ସଂସଦ ନିର୍ବାଚନ ପାଇଁ ନିଷ୍ପତ୍ତି ନେଲେ ତାହା ଏକ ସ୍ୱାଗତଯୋଗ୍ୟ ପଦକ୍ଷେପ ହେବ । ମାତ୍ର ସ୍ୱଚ୍ଛତା ଓ ଶୃଙ୍ଖଳାରେ ନିର୍ବାଚନ ହେବା ଦରକାର । ନିର୍ଦ୍ଦିଷ୍ଟ ରୋଡ୍ ମ୍ୟାପ୍ ନେଇ ନିର୍ବାଚନକୁ ଓହ୍ଲାଇବ ଛାତ୍ର ବିଜେଡି । ଯଦି ନିର୍ବାଚନ ହୁଏ ତେବେ ଦୃଢ଼ତାର ସହ ଲଢ଼େଇ କରିବୁ ।
ଛାତ୍ର କଂଗ୍ରେସ ରାଜ୍ୟ ସଭାପତି ୟାସିର ନୱାଜ କହିଛନ୍ତି, ୨୦୧୮ରୁ ଏପର୍ଯ୍ୟନ୍ତ ଛାତ୍ର ସଂସଦ ନିର୍ବାଚନ ବିଜେଡି ସରକାର ବନ୍ଦ ରଖିଥିଲା। ସେ ସମୟରେ ବିଜେପି ନେତାମାନେ ଚିତ୍କାର କରି ଛାତ୍ର ସଂସଦ ନିର୍ବାଚନ କରିବାକୁ ଦାବି କରୁଥିଲେ । ତେଣୁ ଶିକ୍ଷାର୍ଥୀଙ୍କ ହକ୍ ପାଇଁ ଛାତ୍ର ସଂସଦ ନିର୍ବାଚନ ତାରିଖ ତୁରନ୍ତ ଘୋଷଣା ହେଉ । ଯଦି ଛାତ୍ର ସଂସଦ ନିର୍ବାଚନ ନ ହୁଏ ତେବେ ଛାତ୍ର କଂଗ୍ରେସ ରାଜରାସ୍ତାରେ ଲଢ଼େଇ କରିବ ।
ଏଆଇଏସ୍ଏଫ୍ ରାଜ୍ୟ ସଭାନେତ୍ରୀ ସଂଘମିତ୍ରା ଜେନା କହିଛନ୍ତି, କ୍ୟାମ୍ପସ୍ରେ ଗଣତାନ୍ତ୍ରିକ ପରିବେଶ ଅଭାବରୁ ରାଗିଂ ବଢ଼ୁଛି । ଗୁଣାତ୍ମକ ଶିକ୍ଷାରେ ବାଧା ସୃଷ୍ଟି ହେଉଛି । ପରିବାରବାଦ ରାଜନୀତି ହେଉଛି । ନୂଆନେତା ଆସୁନାହାନ୍ତି । ଏବେ ନୂଆ ସରକାର । ଆଶା ଅଛି, ଚଳିତ ଶିକ୍ଷାବର୍ଷରେ ଛାତ୍ର ସଂସଦ ନିର୍ବାଚନ ହେବ ।
