ନୂଆଦିଲ୍ଲୀ: କଂଗ୍ରେସର ବରିଷ୍ଠ ନେତା ସୋନିଆ ଗାନ୍ଧୀ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଟାର୍ଗେଟ କରିଛନ୍ତି । ଲୋକସଭା ନିର୍ବାଚନରେ ବିଜେପି କମ୍ ଆସନ ପାଇବାକୁ ନେଇ ସେ ମୋଦୀଙ୍କୁ ଦାୟି କରିଛନ୍ତି । ଏହା ମୋଦୀଙ୍କ ପରାଜୟ ବୋଲି କହିଛନ୍ତି ସୋନିଆ । ସେ କହିଛନ୍ତି, ବିଜେପିକୁ କମ୍ ସିଟ୍ ମିଳିବା ମୋଦୀଙ୍କ ରାଜନୈତିକ ଏବଂ ନୈତିକ ପରାଜୟକୁ ଦର୍ଶାଉଛି ।
ଏହା ବ୍ୟତୀତ ସେ ଦାବି କରିଛନ୍ତି, ଯେଉଁ ରାଜ୍ୟରେ ବିଜେପି ସରକାର ରହିଛି ସେଠାରେ ସଂଖ୍ୟାଲଘୁଙ୍କ ଘର ଉପରେ ବୁଲଡୋଜର ଚାଲିଛି । ଏକ ଖବର କାଗଜରେ ପ୍ରକାଶିତ ଆର୍ଟିକିଲ୍କୁ ନେଇ ସୋନିଆ ଗାନ୍ଧୀ କହିଛନ୍ତି ଯେ, ୨୦୨୪ ନିର୍ବାଚନରେ ପିଏମଙ୍କ ବ୍ୟକ୍ତିଗତ, ରାଜନୈତିକ ଏବଂ ନୈତିକ ପରାଜୟ ହୋଇଛି । ୧୯୭୫ ଏମର୍ଜେନ୍ସି ପରେ ୧୯୭୭ରେ ହୋଇଥିବା ନିର୍ବାଚନ ସଂପର୍କରେ ସୋନିଆ ଗାନ୍ଧୀ କହିଛନ୍ତି । ଜରୁରିକାଳୀନ ପରିସ୍ଥିତି ପରେ ମିଳିଥିବା ଜନମତକୁ ମୁଣ୍ଡପାତି ସ୍ବୀକାର କରିଥିଲୁ । ତେଣୁ ୧୯୮୦ ଜନମତ ପୁଣି ଥରେ ପ୍ରତ୍ୟାବର୍ତ୍ତନ କରିଥିଲା । ଏହାକୁ ମୋଦୀ ସକକାର କେବେ ପାଇପାରିଲେ ନାହିଁ ବୋଲି ସୋନିଆ ଗାନ୍ଧୀ କହିଛନ୍ତି ।
ସେପଟେ ଲୋକସଭା ବାଚସ୍ପତି ନିର୍ବାଚନରେ ବିଜେପି ବିରୋଧୀଙ୍କ ସମର୍ଥନ ଲୋଡ଼ିଥିଲା । କିନ୍ତୁ ପରମ୍ପରା ଅନୁସାରେ ଉପବାଚସ୍ପତି ପଦବୀ ବିରୋଧୀଙ୍କୁ ମିଳିବାର ଥିଲା । କିନ୍ତୁ ସରକାର ଆମର ଦାବିକୁ ସ୍ବୀକାର କଲେ ନାହିଁ ବୋଲି ସୋନିଆ ଗାନ୍ଧୀ ଅଭିଯୋଗ କରିଛନ୍ତି । ଏହା ବ୍ୟତୀତ ଗତ ଲୋକସଭାରେ ବିନା ଚର୍ଚ୍ଚାରେ ବିଲ୍ ପାସ କରାଗଲା । ତମାମ ସାଂସଦଙ୍କୁ ନିଲମ୍ବିତ କରାଗଲା । ପ୍ରଧାନମନ୍ତ୍ରୀ ପରୀକ୍ଷା ଉପରେ ଚର୍ଚ୍ଚା କରୁଛନ୍ତି କିନ୍ତୁ ନିଟ୍ ମାମଲା ଉପରେ ଚୁପ୍ ରହିଛନ୍ତି । ଏହାରି ମଧ୍ୟରେ ଦେଶରେ ସଂଖ୍ୟାଲଘୁଙ୍କ ବିରୋଧରେ ହିଂସା ଏବଂ ସେମାନଙ୍କୁ ଭୟ ଦେଖାଇବା ମାମଲା ହଠାତ ବୃଦ୍ଧି ପାଇଛି ବୋଲି ସୋନିଆ ଦାବି କରିଛନ୍ତି ।
ଏହା ସହ କଂଗ୍ରେସ ନେତା ମଣିପୁର ହିଂସାକୁ ନେଇ ମଧ୍ୟ ପ୍ରଧାନମନ୍ତ୍ରୀ ମୋଦୀଙ୍କ ଉପରେ ବର୍ଷିଛନ୍ତି । ମଣିପୁର ଜଳୁଥିଲା କିନ୍ତୁ ସେଠାକୁ ଯିବାକୁ ପ୍ରଧାନମନ୍ତ୍ରୀଙ୍କ ପାଖରେ ସମୟ ନଥିଲା । ପ୍ରଧାନମନ୍ତ୍ରୀଙ୍କ ୪୦୦ ପାର ନାରାକୁ ଜନତା ପ୍ରତ୍ୟାଖାନ କରିଛନ୍ତି । ଏଥିପାଇଁ ତାଙ୍କୁ ଆତ୍ମ ବିଶ୍ଳେଷଣ କରିବା ଦରକାର ବୋଲି ସୋନିଆ ଗାନ୍ଧୀ କହିଛନ୍ତି ।