ଭୁବନେଶ୍ୱର,୩୦/୦୬: ରାଜ୍ୟରେ ଖୋଲିବ ୨ଶହ ଗୋଶାଳା । ଗୋ-ପାଳନକୁ ଦିଆଯିବ ପ୍ରୋତ୍ସାହନ । ଦୁଗ୍ଧ ବନ୍ୟା ଯୋଜନାରେ ଚାଷୀଙ୍କୁ ଗୋପାଳନ ପାଇଁ ସୁବିଧା ସୁଯୋଗ ଦିଆଯିବ । ଗୋକୁଳ ଓ କ୍ଷୀରଧାରା ଯୋଜନାରେ ରାଜ୍ୟରେ ଦୁଗ୍ଧ ଉତ୍ପାଦନକୁ ବୃଦ୍ଧି କରାଯିବ। ସେହିପରି ରାଜ୍ୟରେ ଗୋ-ଚାଲାଣ ବନ୍ଦ କରିବାକୁ ସବୁ ପ୍ରକାର ପଦକ୍ଷେପ ନିଆଯିବ ବୋଲି ମତ୍ସ୍ୟ ଓ ପଶୁ ସମ୍ପଦ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ ଚେତାବନୀ ଦେଇଛନ୍ତି ।
ମନ୍ତ୍ରୀ ଶ୍ରୀ ମଲ୍ଲିକ କହିଛନ୍ତି, ରାଜ୍ୟରେ ଦୁଗ୍ଧ ଉତ୍ପାଦନ ବୃଦ୍ଧି ପାଇଁ ଗୋ-ପାଳନକୁ ପ୍ରୋତ୍ସାହନ ଦିଆଯିବ । ଗୋ-ପାଳନ ପାଇଁ ଦିଆଯାଉଥିବା ସବସିଡି ଟଙ୍କାକୁ ବୃଦ୍ଧି କରାଯିବ । ସେହିପରି ପ୍ରାଣୀ ରୋଗର ନିଦାନ ପାଇଁ ପ୍ରତି ବ୍ଲକରେ ଖୋଲିବ ପ୍ରାଣୀ ରୋଗ ପ୍ରତିଷ୍ଠାଗାର । ଫଳରେ ଅଧିକ ପ୍ରାଣୀଙ୍କ ଚିକିତ୍ସା ସୁବିଧାରେ ହେବ ବୋଲି ମନ୍ତ୍ରୀ କହିଛନ୍ତି ।
ସେହିପରି ରାଜ୍ୟରେ ଅଧିକ ସଂଖ୍ୟକ କ୍ଷୁଦ୍ର ଓ ମଧ୍ୟମ ଶିଳ୍ପ ପ୍ରତିଷ୍ଠାକୁ ଗୁରୁତ୍ୱ ଦିଆଯିବ । ଏମ୍ଏସ୍ଏମ୍ଇ ବିଭାଗ ଜରିଆରେ ଗ୍ରାମାଞ୍ଚଳର ଯୁବକମାନଙ୍କୁ ଶିଳ୍ପ ପ୍ରତିଷ୍ଠା କରିବାକୁ ପ୍ରୋତ୍ସାହନ ଦିଆଯିବ । ନୂଆ ଶିଳ୍ପର ବିକାଶ କରାଯିବା ସହ ରାଜ୍ୟରେ ଥିବା ରୁଗ୍ଣ ଶିଳ୍ପଗୁଡ଼ିକୁ ପୁନରୁଦ୍ଧାର କରାଯିବ । ପ୍ରତି ବ୍ଲକରେ ଭିତ୍ତିଭୂମି ବିକାଶ କରାଯିବ । ଏ ନେଇ ଶିଳ୍ପପତିଙ୍କ ସହ ଆଲୋଚନା ସରିଛି ବୋଲି ମନ୍ତ୍ରୀ ଶ୍ରୀ ମଲ୍ଲିକ ସୂଚନା ଦେଇଛନ୍ତି ।
ରପ୍ତାନିର ୪୦% ଏହି ବିଭାଗରୁ ହେଉଥିବାରୁ ଏହାକୁ ଅଧିକ ଗୁରୁତ୍ୱ ଦିଆଯିବ ବୋଲି ମନ୍ତ୍ରୀ କହିଛନ୍ତି । ରାଜ୍ୟରେ ଅଧିକ ମାଛ ଚାଷ କରାଯିବ । ଏଥିପାଇଁ ମତ୍ସ୍ୟ ମିଶନ ଜରିଆରେ ଚାଷୀଙ୍କୁ ପ୍ରୋତ୍ସାହନ ଯୋଗାଇ ଦିଆଯିବ । ମାଛ ଚାଷ ବଢ଼ିବା ସହ ଗ୍ରାମାଞ୍ଚଳରେ ମତ୍ସ୍ୟଜୀବୀଙ୍କ ପାଇଁ ସ୍ୱତନ୍ତ୍ର ଶୀତଳଭଣ୍ଡାର ପ୍ରତିଷ୍ଠା କରାଯିବ । ଏ ନେଇ ଭିତ୍ତିଭୂମି ବିକାଶ କରାଯିବ । ଯାହାଦ୍ୱାରା ରାଜ୍ୟରେ ଆର୍ଥିକ ବିକାଶ ସମ୍ଭବ ହେବ ବୋଲି ମନ୍ତ୍ରୀ କହିଛନ୍ତି ।
