ପୁରୀ ୦୨/୦୭: ଆଜି ରଥଯାତ୍ରା ପ୍ରସ୍ତୁତି ପର୍ବର ଅନ୍ତିମ ସମୀକ୍ଷା ବୈଠକ ବସୁଛି । ଏଥିରେ ମୁଖ୍ୟମନ୍ତ୍ରୀ ଶ୍ରୀ ମାଝୀ ଉପସ୍ଥିତ ରହି ସମୀକ୍ଷା କରିବେ । ରଥଯାତ୍ରାରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ସମେତ ବହୁ କେନ୍ଦ୍ରୀୟ ନେତା, ବିଶିଷ୍ଟ ବ୍ୟକ୍ତିଙ୍କ ଆଗମନ କାର୍ଯ୍ୟକ୍ରମ ରହିଛି । ତେଣୁ ସୁରକ୍ଷା, ସୁବନ୍ଦୋବସ୍ତ ପ୍ରମୁଖ ଅଂଶ । ଏହା ସହିତ ମହାପ୍ରଭୁଙ୍କ ୪ ଦ୍ୱାର ଖୋଲିବା ପରେ ଭିଡ଼ ନିୟନ୍ତ୍ରଣ, ନିୟମିତ ଠିକ୍ ଭାବେ ନୀତିକାନ୍ତି ସମ୍ପନ୍ନ ଓ ଶୃଙ୍ଖଳିତ ଦର୍ଶନ ତଥା ସ୍ଲଟ୍ ବୁକିଂ କରି ଦର୍ଶନ ବ୍ୟବସ୍ଥା, ଶ୍ରୀମନ୍ଦିର ଓ ରତ୍ନଭଣ୍ଡାର ସୁରକ୍ଷା, ୫୦୦ କୋଟିର କପର୍ସ ଫଣ୍ଡ୍ର ବିନିଯୋଗ ଭଳି ସରକାରଙ୍କ ଆଗରେ ବିଭିନ୍ନ କାର୍ଯ୍ୟକ୍ରମ ଏବଂ ଆହ୍ୱାନ ରହିଛି ।
ସୂଚନା ମୁତାବିକ, ମଙ୍ଗଳବାର ପୂର୍ବାହ୍ନ ୧୧ଟା ୧୫ମିନିଟ୍ରେ ଏହି ବୈଠକ ବସିବ । ଏନେଇ ପ୍ରଶାସନ ପକ୍ଷରୁ ସୂଚିତ କରାଯାଇଛି । ବୈଠକରେ ମୁଖ୍ୟମନ୍ତ୍ରୀଙ୍କ ସମେତ ରାଜ୍ୟ ମନ୍ତ୍ରିମଣ୍ଡଳର ବହୁ ମନ୍ତ୍ରୀ ଓ ସଚିବଙ୍କ ସମେତ ବରିଷ୍ଠ ପୁଲିସ ଅଧିକାରୀମାନେ ଯୋଗଦେବାର କାର୍ଯ୍ୟକ୍ରମ ରହିଛି । ପୁରୀ ସହରର ରାସ୍ତା, ସଫେଇ, ସୁରକ୍ଷା ବ୍ୟବସ୍ଥା ବିପର୍ଯ୍ୟସ୍ତ ଅବସ୍ଥାରେ ପଡ଼ିଥିବା ବେଳେ ମୁଖ୍ୟମନ୍ତ୍ରୀ ଏହାର ସମୀକ୍ଷା କରିବେ । ବୈଠକରେ ଉପସ୍ଥିତ ବୁଦ୍ଧିଜୀବୀ, ସେବାୟତ, ସାମ୍ବାଦିକଙ୍କ ମତାମତକୁ ଦୃଷ୍ଟିରେ ରଖି ମୁଖ୍ୟମନ୍ତ୍ରୀ କାର୍ଯ୍ୟାନୁଷ୍ଠାନ ମଧ୍ୟ ଗ୍ରହଣ କରିବେ ।