ମୋହନା, ୦୪/୦୭ : ଭାରସାମ୍ୟ ହରାଇ ଓଲଟିଲା ଟ୍ରାକ୍ଟର। ବୁଧବାର ବିଳମ୍ୱିତ ରାତିରେ ଗଜପତି ଜିଲ୍ଲା ମୋହନା ଥାନା କଳାମେରି ନିକଟରେ ଏଭଳି ମର୍ମନ୍ତୁଦ ଦୁର୍ଘଟଣା ଘଟିଛି। ଏହି ଦୁର୍ଘଟଣାରେ ଡ୍ରାଇଭରଙ୍କ ମୃତ୍ୟୁ ହୋଇଥିବା ବେଳେ ଜଣେ ଗୁରୁତର ହୋଇଛନ୍ତି। ମୃତକ ହେଲେ ମୋହନା ଥାନା ପାଟୁପଦର ଗାଁର ଟୁକୁନା ଦଳାଇ (୪୫ ବର୍ଷ)। ସେହିଭଳି ଗୁରୁତର ଆହତ ଜଣକ ହେଲେ ସେହି ଗାଁର ଏଲିଶା ନାୟକ (୨୨ବର୍ଷ)।
ସୂଚନାନୁଯାୟୀ, ବୁଧବାର ରାତିରେ କଳାମେରି ନିକଟସ୍ଥ ଡି.କଲୋନୀରେ ଟୁକୁନା ଦଳାଇ ଟ୍ରାକ୍ଟରରେ ଜମିରେ ଚାଷ କରୁଥିଲେ। ଚାଷ କାମ ସାରି ବିଳମ୍ୱିତ ରାତିରେ ଟ୍ରାକ୍ଟର ନେଇ ପାଟୁପଦର ଫେରୁଥିଲେ। ଏହି ସମୟରେ କଳାମେରି ନିକଟରେ ଭାରସାମ୍ୟ ହରାଇ ଟ୍ରାକ୍ଟରଟି ରାସ୍ତା କଡକୁ ଓଲଟି ପଡ଼ିଥିଲା। ଡ୍ରାଇଭର ଟୁକୁନା ଓ ଅନ୍ୟ ଜଣେ ଶ୍ରମିକ ଏଲିଶା ଗୁରୁତର ଆହତ ହୋଇଥିଲେ। ସ୍ଥାନୀୟ ଲୋକେ ଉଦ୍ଧାର କରି ସେମାନଙ୍କୁ ମୋହନା ମେଡିକାଲରେ ଭର୍ତ୍ତି କରିଥିଲେ। ତେବେ ଡାକ୍ତର ଟୁକୁନାକୁ ମୃତ ଘୋଷଣା କରିଛନ୍ତି। ଗୁରୁତର ଏଲିଶାର ଚିକିତ୍ସା ଚାଲିଥିବା ବେଳେ ମୋହନା ପୋଲିସ ଘଟଣାର ତଦନ୍ତ କରୁଛି।