ମୁମ୍ବାଇ ୦୬/୦୭: ‘ଗ୍ୟାଙ୍ଗ୍ସ ଅଫ୍ ୱସେପୁର’ ଓ ‘ମୋନିକା, ଓ ମାଇଁ ଡାର୍ଲିଙ୍ଗ୍’ ଭଳି ଫିଲ୍ମ ଜରିଆରେ ଦର୍ଶକଙ୍କଠୁ ଭଲପାଇବା ପାଇଥିବା ହୁମା କୁରେଶୀ ଏବେ ଏକ ନୂଆ ପୁଲିସ ଡ୍ରାମା ଫିଲ୍ମ ‘ବୟାନ୍’ରେ ନଜର ଆସିବେ । ବିକାଶ ମିଶ୍ର ଫିଲ୍ମର କାହାଣୀ ଲେଖିବା ସହିତ ନିର୍ଦ୍ଦେଶନା ଦାୟିତ୍ୱ ନିର୍ବାହ କରିଛନ୍ତି । ଫିଲ୍ମରେ ହୁମାଙ୍କ ସହ ଗୁରୁତ୍ୱପୂର୍ଣ୍ଣ ଭୂମିକାରେ ନଜର ଆସିବେ ଚନ୍ଦ୍ରଚୂଡ଼ ସିଂହ ଓ ସଚିନ ଖେଡ଼େକର ।
ରାଜସ୍ଥାନର ପୃଷ୍ଠଭୂମିରେ ଫିଲ୍ମଟି ପର୍ଯ୍ୟବସିତ । ରୁହି ନାମ୍ନୀ ଜଣେ ମହିଳା ଗୁପ୍ତଚରଙ୍କୁ ନେଇ ଏହାର କାହାଣୀ ଗତିଶୀଳ । ନିଜର ପ୍ରଥମ ମାମଲାର ଯାଞ୍ଚ୍ ଲାଗି ରୁହିକୁ ଏକ ଛୋଟ ସହରକୁ ପଠାଯାଇଛି । କିନ୍ତୁ ସ୍ଥାନୀୟ ଶାସନରେ ପ୍ରତିପକ୍ଷଙ୍କ ପ୍ରଭାବ ଯୋଗୁ ସେଠାରେ ସେ ବଡ଼ ଆହ୍ୱାନର ସମ୍ମୁଖୀନ ହୋଇଛି । ତା’ର ବାପା ଜଣେ ପ୍ରସିଦ୍ଧ ଲ ଏନ୍ଫୋର୍ସମେଣ୍ଟ୍ ଅଫିସର ହୋଇଥିବାବେଳେ ତାଙ୍କ ସମ୍ମାନକୁ ରକ୍ଷା କରୁଥିବା ରୁହିର ଯାତ୍ରା ଏଥିରେ ଦେଖିବାକୁ ମିଳିବ । ଫିଲ୍ମର ସବୁ ଦାୟିତ୍ୱ ହୁମାଙ୍କ କାନ୍ଧରେ ଥିବାବେଳେ ଏହାକୁ ନେଇ ଖୁବ୍ ଉତ୍ସାହିତ ବୋଲି ସେ ଗଣମାଧ୍ୟମକୁ କହିଛନ୍ତି ।
