ଭୁବନେଶ୍ୱର,୦୧/୧୦: ଲୋକଙ୍କୁ ଆତ୍କୃଷ୍ଟ କରିବାକୁ ପ୍ରଯୋଜକଙ୍କ ନୂଆ ଉପାୟ । ଗୋଟିଏ ଟିକଟ୍ରେ ଦର୍ଶକ ମାଗଣାରେ ଦେଖିବେ ଆଉ ଏକ ସିନେମା । ଚକ୍ର ନିର୍ଦ୍ଧାରଣ କରିବ ୪ଟି ସିନେମା ଭିତରୁ କେଉଁ ଟିକଟ୍ ମିଳିବ । ତେବେ ଆସନ୍ତା ଅକ୍ଟୋବର ୪ ତାରିଖରେ ରିଲିଜ୍ ହେଉଛି ସିନେମା "ସନମ୍ ତୁ ସୁହାନା’ । ଏହି ଅବସରରେ ଆସନ୍ତା ୪ ରୁ ୬ ତାରିଖ ପର୍ଯ୍ୟନ୍ତ ସ୍ପିନ୍ ଅଫର୍ ଘୋଷଣା କରିଛନ୍ତି ପ୍ରଯୋଜକ ବିନି ପଟ୍ଟନାୟକ ।
ଦଶହରାରେ ତଥା ଅକ୍ଟୋବର ୯ ତାରିଖରେ ଆସୁଥିବା ଅନ୍ୟ ୪ଟି ଫିଲ୍ମ ‘କର୍ମ’, ‘ଭିଲେନ୍’, ‘ଖୋକାଭାଇ ତମ ପାଇଁ’ ଓ ‘ଦୁର୍ଗା’ ସିନେମାକୁ ମଧ୍ୟ ସେ ନିଜ ଫିଲ୍ମ ମାଧ୍ୟମରେ ପ୍ରମୋସନ୍ କରୁଛନ୍ତି । ସୋମବାର ଏନେଇ ଏକ ସାମ୍ବାଦିକ ସମ୍ମିଳନୀ ହୋଇଯାଇଛି । ସାମ୍ବାଦିକ ସମ୍ମିଳନୀରେ ପ୍ରଯୋଜକ ବିନି ପଟ୍ଟନାୟକ ଏବଂ ମିଡିଆ ପ୍ଲାନର୍ ପ୍ରଣୟ ଜେଠୀ ଉପସ୍ଥିତ ରହି ସବିଶେଷ ବର୍ଣ୍ଣନା କରିଛନ୍ତି ।
୪ ରୁ ୬ ତାରିଖ ଭିତରେ ଯେଉଁ ଦର୍ଶକ "ସନମ୍ ତୁ ସୁହାନା’ ସିନେମାର ଟିକଟ୍ କାଟି ଦେଖିବାକୁ ଆସିବେ ସେମାନେ ଏକ ସ୍ପିନ୍ ଗେମ୍ ଖେଳିବାର ସୁଯୋଗ ପାଇବେ । ଏହି ସ୍ପିନ୍ର ତଥା ଚକ୍ର ଘୁରାଇବା ଫଳରେ ଯେଉଁ ଫିଲ୍ମରେ ତୀର ଚିହ୍ନ ଅଟକିବ ସେହି ଫିଲ୍ମର ଟିକଟ୍ ମାଗଣା ମିଳିବ ବୋଲି ପ୍ରଯୋଜକ କହିଛନ୍ତି । ଏଥିପାଇଁ କୌଣସି ସମୟ ସୀମା ନାହିଁ ବରଂ ଗୋଟିଏ ଟିକଟ୍ ପିଛା ଅନ୍ୟ ଗୋଟିଏ ଟିକଟ୍ର ବମ୍ପର ଅଫର୍ ବୋଲି ସେ କହିଛନ୍ତି । ଅନ୍ୟ ପ୍ରଯୋଜକମାନଙ୍କ ସହ ଏ ବିଷୟରେ ଆଲୋଚନା ସରିଛି ସେମାନଙ୍କ ସହ ମିଳିତ ସହଯୋଗରେ ଏହି ଅଫର୍ ଘୋଷଣା ହୋଇଥିବା ସେ ଜଣାଇଛନ୍ତି । ଏମିତି କରିବା ଫଳରେ ଲୋକମାନେ ତାଙ୍କ ଫିଲ୍ମ ସାଙ୍ଗକୁ ଅନ୍ୟ ଫିଲ୍ମ ଦେଖିବାର ସୁଯୋଗ ପାଇବେ । ତା’ସହ ଓଡ଼ିଆ ଫିଲ୍ମର ଲଢ଼େଇ ନୁହଁ, ବରଂ ଚଳିତ ବର୍ଷ ଦଶହରାରେ ଭାଇଚାରା ଦେଖିବାକୁ ମିଳିବ ବୋଲି ସେ କହିଛନ୍ତି ।
