ମୁମ୍ୱାଇ : ଗୋବିନ୍ଦାଙ୍କ ଲାଇସେନ୍ସ ରିଭଲଭରରୁ ମଙ୍ଗଳବାର ସକାଳେ ଭୁଲରେ ଗୁଳି ଫୁଟି ଯାଇଥିଲା, ଯେଉଁଥିରେ ସେ ଆହତ ହୋଇ ଥିଲେ। ପାଦରେ ଗୁଳି ବାଜିବା ପରେ ତାଙ୍କୁ ଜୁହୁ ସ୍ଥିତ କ୍ରିଟିକେୟାର ହସ୍ପିଟାଲରେ ଭର୍ତ୍ତି କରାଯାଇଛି। ଘଣ୍ଟାଏ ଯାଏ ଚାଲି ଥିବା ସର୍ଜରୀ ପରେ ଗୁଳିକୁ ବାହାର କରାଯାଇ ଥିଲା। ଗୋବିନ୍ଦାଙ୍କ ସ୍ଥିତି ଏବେ ବିପଦମୁକ୍ତ, କିନ୍ତୁ ଏବେ ବି ତାଙ୍କୁ କିଛି ଦିନ ଯାଏ ହସ୍ପିଟାଲର ରହିବାକୁ ହେବ। ସେପଟେ ପୁଲିସ ତାଙ୍କର ଲାଇସେନ୍ସ ରିଭଲଭରକୁ ମଧ୍ୟ ସିଜ୍ କରିଛି।
ଗୋବିନ୍ଦାଙ୍କ ସର୍ଜରୀ କରିଥିବା ଡାକ୍ତର ରମେଶ ଅଗ୍ରୱାଲ କହିଛନ୍ତି କି, ଗୁଳିକୁ ବାହାର କରି ଦିଆ ଯାଇଛି ଏବଂ ଅଭିନେତାଙ୍କର ସ୍ଥିତି ଠିକ୍ ଅଛି। ଆଗାମୀ ୩ରୁ ୪ ଦିନରେ ଗୋବିନ୍ଦାଙ୍କୁ ହସ୍ପିଟାଲରୁ ମୁକ୍ତି ମିଳି ଯିବ। ହେଲେ ମାସ ସାରା ଆରାମ କରିବାକୁ ପଡ଼ିବ। ହସ୍ପିଟାଲରୁ ହିଁ ଅଭିନେତା ନିଜର ପ୍ରଶଂସକଙ୍କ ପାଇଁ ଏକ ଅଡ଼ିଓ ମେସେଜ୍ ମଧ୍ୟ ଜାରି କରିଛନ୍ତି, ଯେଉଁଥିରେ ସେ ପୂରା ତଥ୍ୟ ଦେଇଛନ୍ତି। ସେ କହିଛନ୍ତି ଯେ , ମୋ ଠାରେ ଗୁଳି ବାଜିଛି, କିନ୍ତୁ ତାକୁ ବାହାର କରି ଦିଆ ଯାଇଛି। ମୁଁ ଡାକ୍ତରଙ୍କୁ ଓ ଆପଣମାନଙ୍କ ପ୍ରାର୍ଥନା ପାଇଁ ଧନ୍ୟବାଦ ଦେଉଛି।
ଗୋବିନ୍ଦାଙ୍କ ମ୍ୟାନେଜର ଶଶି ସିହ୍ନାଙ୍କ ଅନୁସାରେ , ଅଭିନେତାଙ୍କ ସହ ଏହି ଘଟଣା ମଙ୍ଗଳବାର ସକାଳେ ଘଟି ଥିଲେ , ସେତେବେଳେ ସେ କୋଲକାତା ଯିବାକୁ ପ୍ରସ୍ତୁତ ହେଉଥିଲେ। ମ୍ୟାନେଜର କହିଥିଲେ, ତାଙ୍କର କୋଲକାତାରେ ଏକ ଶୋ’ ଥିଲା , ସେଥିପାଇଁ ସେ ସକାଳ ୬ଟାରେ ଫ୍ଲାଇଟ୍ରେ ଚଢିବାର ଥିଲା। ଗୋବିନ୍ଦା ଏୟାରପୋର୍ଟ ପାଇଁ ବାହାରୁ ଥିଲେ, ସେତେବେଳେ ଏହି ଘଟଣା ଘଟିଲା।
ଏହା ଭଗବାନଙ୍କ କୃପା ଯେ, ଗୋବିନ୍ଦାଙ୍କ ପାଦରେ ହିଁ ଆଘାତ ଲାଗି ଥିଲା ଏବଂ କିଛି ବି ଗୁରୁତର ସ୍ଥିତି ଉପୁଜି ନଥିଲା। ଅଭିନେତାଙ୍କ ପତ୍ନୀ ସୁନୀତା ଆହୁଜା ମଧ୍ୟ କୋଲକାତାରେ ହିଁ ଥିଲେ ଏବଂ ଅଭିନେତା ନିଜ ଘରେ ଏକୁଟିଆ ଥିଲେ। ଗୁଳି ବାଜିବାର ଖବର ପାଇବା କ୍ଷଣି ସୁନୀତା ମଧ୍ୟ ମୁମ୍ୱାଇ ଅଭିମୂଖେ ବାହାରି ଆସିଥିଲେ।
ମ୍ୟାନେଜରଙ୍କ କହିବାନୁସାରେ , ଗୋବିନ୍ଦା ନିଜ ରିଭଲଭରକୁ ଆଲମାରୀରେ ରଖିଥିଲେ , ସେ ଯିବାକୁ ପ୍ରସ୍ତୁତ ହେବା ବେଳେ ବନ୍ଧୁକଟି ସେଠାରୁ ତଳେ ଖସି ପଡ଼ିଥିଲା ଏବଂ ଗୁଳି ଫୁଟି ଯାଇଥିଲା। ଅଭିନେତା ନିଜ ପତ୍ନୀ ଓ ମ୍ୟାନେଜରଙ୍କୁ ତୁରନ୍ତ ଏ ବିଷୟରେ କହି ଥିଲେ। ମ୍ୟାନେଜର ତୁରନ୍ତ ସେଠାରେ ପହଞ୍ଚି ଅଭିନେତାଙ୍କୁ ହସ୍ପିଟାଲ ନେଇଥିଲେ। ଏହି ସମୟରେ ପୁଲିସକୁ ମଧ୍ୟ ସୂଚନା ଦିଆଯାଇ ଥିଲା । ପୁଲିସ ତୁରନ୍ତ ପହଞ୍ଚି ଥିଲା ।
