ନୂଆଦିଲ୍ଲୀ: ଶୁକ୍ରବାର ସଂସଦର ଉଭୟ ଗୃହରେ NEET-UG ପରୀକ୍ଷାର ପ୍ରଶ୍ନ ପତ୍ର ଲିକ୍ ପ୍ରସଙ୍ଗରେ ଏକ ବଡ଼ ଆଲୋଡ଼ନ ସୃଷ୍ଟି ହୋଇଥିଲା । ଲୋକସଭାରେ ଏହି ପ୍ରସଙ୍ଗରେ ଆଲୋଚନା ବେଳେ ବିରୋଧୀଦଳର ନେତା ରାହୁଲ ଗାନ୍ଧୀଙ୍କ ମାଇକ୍ ବନ୍ଦ ହୋଇଯାଇଥିଲା । ସେ ଏ ବିଷୟରେ ପ୍ରଶ୍ନ ଉଠାଇଥିଲେ । ସେ ଏହାକୁ ନେଇ ଲୋକସଭା ବାଚସ୍ପତି ଓମ ବିର୍ଲାଙ୍କୁ ତାଙ୍କ ମାଇକ୍ ଅନ୍ କରିବାକୁ କହିଥିଲେ । ଆଉ ଏହା ଉପରେ ବାଚସ୍ପତି ବିର୍ଲା କହିଛନ୍ତି ଯେ, ମୁଁ ମାଇକ୍ ଅଫ୍ କରେ ନାହିଁ, ଏଠାରେ କୌଣସି ବଟନ୍ ନାହିଁ । ପ୍ରଶ୍ନ ହେଉଛି, ତେବେ ଲୋକସଭାରେ ସାଂସଦଙ୍କ ମାଇକ୍ କିଏ ଅନ୍ ଏବଂ ଅଫ୍ କରେ ? 

ସୂଚନାଥାଉକି, ସଂସଦର ଉଭୟ ଗୃହରେ, ସଂସଦର ପ୍ରତ୍ୟେକ ସଦସ୍ୟଙ୍କ ଟେବୁଲରେ ମାଇକ୍ରୋ ଫୋନ୍ ଅଛି, ଯାହା ମାଧ୍ୟମରେ ସେ ସଂସଦ ଅଧିବେଶନରେ ବାଚସ୍ପତି ଏବଂ ଅନ୍ୟ ସଦସ୍ୟଙ୍କ ନିକଟରେ ନିଜର ମତାମତ ପହଞ୍ଚାଇଥାନ୍ତି । ଲୋକସଭାରେ ଆଲୋଚନାରେ ନିଜର ମତାମତ ଉପସ୍ଥାପନ କରୁଥିବା ସଦସ୍ୟଙ୍କ ମାଇକ୍ ଚାଲୁ ରହିଥାଏ । ସେ କହିବା ସମାପ୍ତ କରିବା ମାତ୍ରେ ତାଙ୍କ ମାଇକ୍ ବନ୍ଦ କରିଦିଆଯାଏ । 

ଲୋକସଭା ଏବଂ ରାଜ୍ୟସଭାରେ ସାଂସଦଙ୍କ ମାଇକ୍ରୋଫୋନ୍ ଅନ୍ କିମ୍ବା ଅଫ୍ କରିବାକୁ ବାଚସ୍ପତିଙ୍କ ନିକଟରେ କୌଣସି ସୁଇଚ୍ ନଥାଏ । ରାହୁଲ ଗାନ୍ଧୀଙ୍କୁ ଲୋକସଭା ବାଚସ୍ପତି ଓମ ବିର୍ଲା ମଧ୍ୟ ଏହି ସମାନ କଥା କହିଛନ୍ତି । ପ୍ରଶ୍ନ ହେଉଛି, ଯଦି କୌଣସି ବିତର୍କ ସମୟରେ କାହାର ମାଇକ୍ ସୁଇଚ୍ ଅଫ୍ କରିବାକୁ ପଡିବ ତେବେ ବ୍ୟବସ୍ଥା କ’ଣ ରହିଛି ? ଏଥିପାଇଁ ଲୋକସଭାର ବାଚସ୍ପତି ସିଧାସଳଖ ମାଇକ ବନ୍ଦ କରିବାକୁ କୁହନ୍ତି ନାହିଁ । ଏବେ ଆସନ୍ତୁ ଜାଣିବା ଏହାର ଭିତର କଥା...

ବାସ୍ତବରେ, ସଂସଦ ସଦସ୍ୟଙ୍କ ମାଇକ୍ରୋଫୋନ୍ ପାଇଁ ସୁଇଚ୍ ଲୋକସଭାରେ ବାଚସ୍ପତି ଆସନର ଉଭୟ ପାର୍ଶ୍ୱରେ ବସିଥିବା ସାଉଣ୍ଡ ଇଞ୍ଜିନିୟର ମାନଙ୍କ ପାଖରେ ଥାଏ । ତାଙ୍କ ପାଖରେ ପ୍ରତ୍ୟେକ ସାଂସଦଙ୍କ ନମ୍ବର ଏବଂ ମାଇକ୍ ଉପରେ ନିୟନ୍ତ୍ରଣ ଅଛି।  ଉଦାହରଣ ସ୍ୱରୂପ, ଶୂନ୍ୟ କାଳ ସମୟରେ ପ୍ରତ୍ୟେକ ସାଂସଦ କହିବା ପାଇଁ ତିନି ମିନିଟ୍ ପାଆନ୍ତି । ଏହି ଅବଧି ସମାପ୍ତ ହେବା ମାତ୍ରେ ସାଉଣ୍ଡ ଇଞ୍ଜିନିୟର ତାଙ୍କ ମାଇକ୍ ବନ୍ଦ କରିଦିଅନ୍ତି । ସେହିଭଳି, ଯେତେବେଳେ ବାଚସ୍ପତିଙ୍କ ଚେୟାରରୁ ନିର୍ଦ୍ଦେଶ ଆସେ, ସାଉଣ୍ଡ ଇଞ୍ଜିନିୟରମାନେ ତାହାକୁ ଅନୁପାଳନ କରିଥାନ୍ତି । ବାଚସ୍ପତି କହିବା ମାତ୍ରେ କିଛି ରେକର୍ଡ ହୋଇନଥାଏ ଏବଂ ମାଇକ୍ ବନ୍ଦ କରିଦିଆଯାଏ । 

ଶୁକ୍ରବାର ଲୋକସଭା ପ୍ରକ୍ରିୟା ଆରମ୍ଭ ହେବା ମାତ୍ରେ NEET-UG ପରୀକ୍ଷାରେ ଅନିୟମିତତା ପ୍ରସଙ୍ଗ ଉଠିଥିଲା । କଂଗ୍ରେସ ନେତା ରାହୁଲ ଗାନ୍ଧୀ ଲୋକସଭାରେ NEET ପେପର ଲିକ୍ ବିଷୟରେ ଆଲୋଚନା କରିବାକୁ ସମୟ ମାଗିଥିବାବେଳେ ବାଚସ୍ପତି ଓମ ବିର୍ଲା ରାଷ୍ଟ୍ରପତିଙ୍କ ଅଭିଭାଷଣ ଉପରେ ଆଲୋଚନା କରିବା ପରେ NEET ପେପର ଲିକ୍ ପ୍ରସଙ୍ଗରେ ଆଲୋଚନା କରିବାକୁ ଚାହୁଁଥିଲେ। ଏହି ପ୍ରସଙ୍ଗରେ ସଂସଦରେ ଏକ ବିରାଟ ଉତ୍ତେଜନା ଦେଖାଦେଇଥିଲା । କଂଗ୍ରେସ ଅଭିଯୋଗ କରିଛି ଯେ ଯେତେବେଳେ ସେ ଲୋକସଭାରେ NEET ପେପର ଲିକ୍ ଉପରେ ଆଲୋଚନା କରିବାକୁ ଦାବି କରିଥିଲେ, ସେତେବେଳେ ରାହୁଲ ଗାନ୍ଧୀଙ୍କ ମାଇକ୍ ବନ୍ଦ ହୋଇଯାଇଥିଲା।

ଲୋକସଭାରେ ପ୍ରକ୍ରିୟା ଆରମ୍ଭ ହେବା ମାତ୍ରେ ବିରୋଧୀ ଦଳର ନେତା ରାହୁଲ ଗାନ୍ଧୀ ତାଙ୍କ ମାଇକ୍ ଟର୍ନ୍ ଅନ୍ କରିବାକୁ ଦାବି କରିଥିଲେ। ଏହା ଉପରେ ଲୋକସଭା ବାଚସ୍ପତି କହିଛନ୍ତି ଯେ ତାଙ୍କ ପାଖରେ ମାଇକ୍ ବଟନ୍ ନାହିଁ ।